រាជធានីភ្នំពេញ ៖ លោក សាយ ហាក់ អគ្គលេខាធិការប្រតិបត្តិ និងជាមន្ត្រីជាន់ខ្ពស់គណបក្សហ្វ៊ុនស៊ិនប៉ិច កាលពីថ្ងៃទី២០ ខែកុម្ភៈ ឆ្នាំ២០១៥ បានចេញសេចក្តីប្រកាស
រាជធានីភ្នំពេញ ៖ លោក សាយ ហាក់ អគ្គលេខាធិការប្រតិបត្តិ និងជាមន្ត្រីជាន់ខ្ពស់គណបក្សហ្វ៊ុនស៊ិនប៉ិច កាលពីថ្ងៃទី២០ ខែកុម្ភៈ ឆ្នាំ២០១៥ បានចេញសេចក្តីប្រកាសព័ត៌មានជាសាធារណៈបង្ហាញពីទំនាស់ផ្ទៃក្នុងគណបក្ស ដោយវាយប្រហារលើលោក ញឹក ប៊ុនឆៃ ប្រធានស្តីទីគណបក្ស និងជាអនុប្រធានទី២ ក្នុងការកាន់កាប់ត្រាបញ្ជាគណបក្សដោយមិនមានការផ្ទេរសិទ្ធិពីសម្តេចក្រុមព្រះ ប្រធានគណបក្សហ្វ៊ុនស៊ិនប៉ិចជាមុន ។ ជម្លោះនេះបានកើតឡើងក្រោយពីសម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច និងសម្តេច នរោត្តម អរុណរស្មី អនុប្រធានទី១ អវត្តមានពីក្នុងប្រទេសកម្ពុជាមួយរយៈ។
លោក សាយ ហាក់ កាលពីរសៀលថ្ងៃទី២០ ខែកុម្ភៈ ឆ្នាំ២០១៥ បានប្រកាសជាសាធារណៈច្រានចោលរាល់លិខិតស្នាមដែលលោក ញឹក ប៊ុនឆៃ អនុប្រធានទី២ នៃគណបក្សហ្វ៊ុនស៊ិនប៉ិចបានយកត្រាគណបក្សទៅបោះលើលិខិតអញ្ជើញនិងលិខិតផ្សេងៗ ដោយអះអាងថា ទង្វើនេះខុសពីសេចក្តីសម្រេចរបស់សមាជបក្ស ។
ក្នុងលិខិតដែលកោះសន្តិភាពទទួលបានកាលពីល្ងាចថ្ងៃទី២១ ខែកុម្ភៈ លោក សាយ ហាក់ បានលើកឡើងថា «លិខិតដែលលោក ញឹក ប៊ុនឆៃ អនុប្រធានទី២គណបក្សយកត្រាគណបក្សទៅប្រើប្រាស់លើលិខិតអញ្ជើញនិងលិខិតផ្សេងៗពុំអាចចាត់ទុកជាផ្លូវការទេ ព្រោះលិខិតនេះធ្វើឡើងដោយពុំមានការផ្ទេរសិទ្ធិពីសម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច » ។
ចំណែកលោក ញឹក ប៊ុនឆៃ បានប្រតិកម្មតបវិញដោយថ្លែងថា «ខ្ញុំជាប្រធានស្តីទី ម៉េចក៏គាត់ថាខ្ញុំមិនអាចប្រើត្រាគណបក្សនោះ ព្រោះពេលនេះសម្តេចក្រុមព្រះ និងសម្តេចព្រះអនុជយាងទៅក្រៅប្រទេស ដូច្នេះខ្ញុំជាប្រធានស្តីទី វាមានទៅខុសអីទៅ ។ ខ្ញុំមិនដឹងថាគាត់យល់យ៉ាងម៉េចទេ?» ។
ស្របពេលជាមួយគ្នានេះដែរ ភាពចម្រូងចម្រាសនៅតាមមូលដ្ឋានកំពុងកើតមានចំពោះការសម្រេចប្តូរឡូហ្គោ ឬសញ្ញាគណបក្សដែលតាមការអះអាងរបស់លោក ញឹក ប៊ុនឆៃថា អ្នកគាំទ្រមិនព្រមឲ្យប្តូរសញ្ញាឡូហ្គោបក្សទេ ។
ភ្លាមៗនោះ អគ្គលេខាធិការដ្ឋានគណបក្សហ្វ៊ុនស៊ិនប៉ិច បានចេញលិខិតបដិសេធលិខិតរបស់លោក សាយ ហាក់ ដោយលើកឡើងថា យោងតាមសមាជ កាលពីថ្ងៃទី១៩ មករា ឆ្នាំ២០១៥ លោក សាយ ហាក់ គ្មានតួនាទីអ្វីនៅក្នុងគណបក្សហ្វ៊ុនស៊ិនប៉ិចនៅឡើយទេ ហើយលក្ខន្តិកៈគណបក្សនៅមានជាធរមាន ។ គ្មានរចនាសម្ព័ន្ធស្តីពីអគ្គលេខាធិការប្រតិបត្តិគណបក្សទេ ។
អគ្គលេខាធិការដ្ឋានគណបក្សហ្វ៊ុនស៊ិនប៉ិចបានបញ្ជាក់ថា «សហជីវិន សាយ ហាក់ កំពុងរំលោភបំពានលក្ខន្តិកៈគណបក្សហ្វ៊ុនស៊ិនប៉ិច និងថ្នាក់ដឹកនាំរបស់ខ្លួនហើយ»។ សេចក្តីប្រកាស ព័ត៌មានរបស់គណបក្សហ្វ៊ុនស៊ិនប៉ិចបានបញ្ជាក់ថា គណបក្សហ្វ៊ុនស៊ិនប៉ិចសូមច្រានចោលលិខិតរបស់លោក សាយ ហាក់ ទាំងស្រុង ។ អគ្គលេខាធិការដ្ឋានគណបក្សហ្វ៊ុនស៊ិនប៉ិចសូមបំភ្លឺជូនសាធារណជនដូចខាងក្រោម ៖
១-សមាជវិសាមញ្ញគណបក្សហ្វ៊ុនស៊ិនប៉ិចកាលពីថ្ងៃទី១៩ មករា ឆ្នាំ២០១៥ជ្រើសរើសម្តេចក្រុមព្រះ នរោត្តម រណឫទ្ធិ ជាប្រធានគណបក្សហ្វ៊ុនស៊ិនប៉ិច និងសម្តេចព្រះអនុជ នរោត្តម អរុណរស្មី ជាអនុប្រធានទី១ លោក ញឹក ប៊ុនឆៃ អនុប្រធានទី២ ដោយបានធ្វើវិសោធនកម្មលក្ខន្តិកៈ គណបក្សប្រកាសឲ្យមានតែអនុប្រធានគណបក្សប៉ុណ្ណោះ ។
២-សមាជវិសាមញ្ញមិនទាន់អនុម័តរំលាយលក្ខន្តិកៈគណបក្សហ្វ៊ុនស៊ិនប៉ិច ចុះថ្ងៃទី២៣ ខែមីនា ឆ្នាំ២០១៣ ដែលក្រសួងមហាផ្ទៃទទួលស្គាល់និងដែលមានជាធរមាននៅឡើយ ។
៣-រហូតមកដល់ពេលនេះ ក្រសួងមហាផ្ទៃនៅមិនទាន់ទទួលស្គាល់លទ្ធផលសមាជវិសាមញ្ញរបស់គណបក្សហ្វ៊ុនស៊ិនប៉ិចនៅឡើយទេ ។ ក្រសួងមហាផ្ទៃទើបតែចេញលិខិតចុះថ្ងៃទី១៤ កុម្ភៈថា ក្រសួងមហាផ្ទៃបានទទួលលិខិតជូនដំណឹងរបស់គណបក្សហ្វ៊ុនស៊ិនប៉ិចស្តីពីលទ្ធផលសមាជគណបក្សហ្វ៊ុនស៊ិនប៉ិចជ្រើសរើសសម្តេចក្រុមព្រះជាប្រធានប៉ុណ្ណោះ ។
៤-លោក សាយ ហាក់ មិនទាន់មានឋានៈនិងតួនាទីអីនៅក្នុងគណបក្សហ្វ៊ុនស៊ិនប៉ិចនៅឡើយទេ ពីព្រោះលក្ខន្តិកៈគណបក្សហ្វ៊ុនស៊ិនប៉ិចដែលនៅជាធរមានពុំមានរចនាសម្ព័ន្ធស្តីពីអគ្គលេខាធិការប្រតិបត្តិគណបក្សទេ។
គណបក្សហ្វ៊ុនស៊ិនប៉ិចបន្តថា «សហជីវិន សាយ ហាក់ កំពុងតែរំលោភបំពានលក្ខន្តិកៈ គណបក្សហ្វ៊ុនស៊ិនប៉ិចនិងថ្នាក់ដឹកនាំរបស់ខ្លួនហើយ» ។ គណបក្សហ្វ៊ុនស៊ិនប៉ិចបានអះអាងថា «សូមថ្នាក់ដឹកនាំគណបក្សហ្វ៊ុនស៊ិនប៉ិចជ្រាបនិងរក្សាភាពស្ងប់ស្ងៀម បំពេញភារកិច្ចរៀងៗខ្លួនជាប្រក្រតីរង់ចាំថ្នាក់ដឹកនាំកំពូលពិភាក្សាដោះស្រាយដោយសន្តិវិធី» ៕
ចែករំលែកព័តមាននេះ