ខេត្តកំពង់ឆ្នាំង ៖ រាត្រីទឹកឃ្មុំរវាងគូស្រករថ្មោងថ្មីនៃពីធីអាពាហ៍ពីពាហ៍ដែលត្រូវបានបញ្ចប់ដោយពិធី«ព្រះថោងតោងស្បៃនាងនាគ» គឺកូនក្រមុំដឹកដៃកូនកម្លោះចូលបន្ទប់ គ្រប់គ្នាសង្ឃឹមថានឹងមានសេចក្តីសុខ
ខេត្តកំពង់ឆ្នាំង ៖ រាត្រីទឹកឃ្មុំរវាងគូស្រករថ្មោងថ្មីនៃពីធីអាពាហ៍ពីពាហ៍ដែលត្រូវបានបញ្ចប់ដោយពិធី«ព្រះថោងតោងស្បៃនាងនាគ» គឺកូនក្រមុំដឹកដៃកូនកម្លោះចូលបន្ទប់ គ្រប់គ្នាសង្ឃឹមថានឹងមានសេចក្តីសុខសុភមង្គលយ៉ាងពិតប្រាកដ ព្រោះតែមង្គលការតាមប្រពៃណីពីបុរាណរបស់ខ្មែរដែលមិនអាចខ្វះបានក្រោមកិច្ច ម្តាយទុកឪពុកដាក់ពិតជាគ្មានអ្វីមកជាឧបសគ្គឡើយ ។
ផ្ទុយទៅវិញគូស្រករមួយគូដែលនឹងលើកយកមកអធិប្បាយនេះ គឺពិតជាធ្វើឱ្យកូនក្រមុំ និងកូនកម្លោះពោះម៉ាយកូន២ សក់ល្បាយអាចម៏ខ្លា ខកចិត្តត្បិតរាត្រីទឹកឃ្មុំក្លាយជាទឹកខ្មេះ ទាល់តម្រិះខាងប្រុសប្តឹងទាមទារបណ្ណាការ៣ពាន់៥រយដុល្លារពីខាងស្រីវិញ ដែលបញ្ហានេះធ្វើឱ្យភាគីទាំងសងខាង ដែលមុននេះមិនបានប៉ុន្មានផងធ្លាប់តែល្អូកល្អិនដាក់គ្នា ប្រែក្លាយជាមើលមុខគ្នាមិនចំទៅវិញ ។
នៅលើគ្រែឬស្សីក្រោមផ្ទះពីអំពីឈើប្រក់ស័ង្កសីតូចល្មម នាងជាកូនក្រមុំដែលខកចិត្តក្នុងមង្គលការមិនដូចបំណងបានព្យាយាមបង្ហាញរូបថតរៀបការ និងបានប្រាប់ថា នាងមានឈ្មោះ សឹម ម៉ារី អាយុ១៨ឆ្នាំ ជាកូនពៅគេក្នុងចំណោមបងប្អូន៥នាក់ (ប្រុស២ស្រី៣) ម្តាយនាងជាស្ត្រីមេម៉ាយមានឈ្មោះ ម៉ាត់ នូណាត អាយុ៦០ឆ្នាំ គ្រួសារនាងមានទីលំនៅភូមិចារ្យថ្មី ឃុំអណ្ទូងស្នាយ ស្រុករលាប្អៀរ ខេត្តកំពង់ឆ្នាំង។
រូបនាងបានរៀបការនៅថ្ងៃទី១៥ មករា ២០១៥ ជាមួយបុរសពោះម៉ាយកូន២ម្នាក់ មានឈ្មោះណុប គឹមសូ អាយុ៤៨ឆ្នាំ មានទីលំនៅភូមិធម្មត្រ័យ សង្កាត់ព្រៃស ខណ្ឌដង្កោ រាជធានីភ្នំពេញ ។ នាងបានស្គាល់គ្នានិងព្រមភ្ជាប់និស្ស័យស្នេហ៍ជាមួយបុរសខាងលើនេះតាមរយៈបងថ្លៃរបស់បងស្រីនាង មុនពេលរៀបមង្គលការតែប៉ុន្មានថ្ងៃប៉ុណ្ណោះ ។ ក្រោយពីបានព្រមព្រៀងជាមួយម្តាយនាងហើយកូនកម្លោះជាគូដណ្តឹងនាង បានប្រគល់ប្រាក់សម្រាប់រៀបមង្គលការឱ្យទៅម្តាយនាងចំនួន៣ពាន់ដុល្លារ និងបានបំពាក់ចិញ្ចៀនពេជ្រ១វង់ ម៉ូតូស៊េរី០១៤មួយគ្រឿង ខ្សែ.កមាស១ខ្សែ និងស្លាកដៃមាស១ខ្សែឱ្យនាងមុនពេលរៀបការទៀតផង ។
នាង សឹម ម៉ារី ជាកូនក្រមុំបានបន្តថា នៅថ្ងៃរៀបមង្គលការ ក្រោយពីពិធីទទួលភ្ញៀវបានបញ្ចប់ជាបណ្តើរៗ មានភ្ញៀវដែលជាសាច់ញាតិបានហៅនាងឱ្យចូលរួមតុផឹកជាមួយ ស្រាប់តែពេលនោះកូនកម្លោះមានចិត្តប្រចណ្ឌមកលើនាង ហើយបានផឹកស្រារហូតយប់ជ្រៅ ខណៈដែលនាងអស់កម្លាំង ព្រោះហត់នឿយចាត់ចែងក្នុងពីធីមង្គលការ ក៏បានចូលទៅដេកនៅបន្ទប់មុន ។ នៅវេលារំលងអាធ្រាតស្ងាត់ ភ្ញៀវបងប្អូនបានទៅផ្ទះអស់ បុរសកូនកម្លោះបានចូលមកដេកជាមួយនាង តែនាងប្រាប់ថា «ខ្ញុំអស់កម្លាំងណាស់ចាំថ្ងៃស្អែកទៅ» ស្រាប់តែពេលនោះ បុរសជាប្តីនាងបានច្រឡោតខឹង និងបានឡូឡា ព្រមជាមួយគ្នានោះបានយករូបថតកូនក្រមុំកម្លោះដែលគេសម្រាប់ដាក់តាំងមុខរោងការមកបោកចោល រួចរត់ទៅដេកនៅក្រោមផ្ទះ បើទោះនាងខំចុះមកអង្វរឱ្យទៅដេកលើផ្ទះ និងបានព្យាយាមពន្យល់ថា «វាមិនល្អមើលទេបង ថ្ងៃផ្សំដំណេកបងមកដេកក្រោមផ្ទះអ៊ីចឹង ពេលនេះឱ្យតែបងឡើងសម្រានលើផ្ទះខ្ញុំព្រមតាមបងទាំងអស់» តែបុរសជាប្តីមិនស្តាប់ឡើយ ។
នាង សឹម ម៉ារី បានបន្តថា ស្អែកឡើងប្តីនាងមិនបាននិយាយអ្វីទេ គិតតែខឹង និងចោទនាងគ្រប់បែបយ៉ាង ហើយបានផឹកស្រា និងដេកក្រោមផ្ទះទៀត ។ លុះព្រឹកឡើងថ្ងៃទី១៧ មករា ២០១៥ គាត់បាននិយាយថា«យើងគ្មាននិស្ស័យនឹងគ្នាទេ» គាត់ក៏បានធ្វើលិខិតលែងលះមួយសន្លឹក ( នាងជាប្រពន្ឋបានយកក្រដាស់ពាក្យលិខិតលែងលះ១ស្លឹកមកបង្ហាញ) ដោយក្នុងខ្លឹមសារដាក់ថា យើងទាំង២បានព្រមព្រៀងលែងលះគ្នា ដោយមិនប្តឹងផ្តល់ និងទាមទារសំណងអ្វីនឹងគ្នាឡើយ ហើយក៏បានផ្តឹតមេដៃទាំងអស់គ្នា និងមានសាក្សីសងខាងដឹងឮផងដែរ ។
ក៏ប៉ុន្តែពេលគាត់ត្រឡប់ទៅផ្ទះនៅរាជធានីភ្នំពេញវិញស្រាប់តែថ្ងៃទី១៨ មករា ប្តីនាងបាននាំក្រុមគ្រួសារគាត់មករករឿងឈ្លោះ ដោយបានសម្លុតថា ត្រូវសងប្រាក់ចំនួន៣.៥០០ដុល្លារទៅខាងប្តីវិញ បើមិនដូច្នោះទេ នឹងប្តឹងចាប់ដាក់គុកដាក់ច្រវាក់ជាពុំខាន ។ នាងបាននិយាយថា ប្រាក់៣ពាន់ដុល្លារបានចាត់ចែងថ្លៃមង្គលការអស់ហើយ ចំណែកចិញ្ចៀនពេជ្រ១វង់ ប្តីគាត់ជាអ្នកបញ្ជាឱ្យគាត់លក់ដើម្បីសងថ្លៃបណ្ណាការដែលខាត បានប្រាក់ចំនួន១.៧០០ដុលា្លរ ហើយប្រាក់ទាំងនោះបានចាត់ចែងសងគេហើយ ចំណែកខ្សែ.ក ខ្សែដៃ នាងបានដោះឱ្យទៅប្តីវិញអស់ហើយដែរ ។
នាងបានខំអង្វរភាគីខាងប្តីថា ខ្ញុំសុខចិត្តសងទៅប្តីចំនួន២ពាន់ដុល្លារចុះ តែក្រុមគ្រួសារខាងប្តីនៅតែមិនព្រម ហើយបានចោទគ្រួសារនាងជាអ្នករៀបចំគំនិតបោកប្រាស់ បើគ្មានប្រាក់ចំនួន៣.៥០០ដុល្លារទេខាងប្តី នឹងប្តឹងដាក់គុកជាពុំខាន។
នាងបានបញ្ជាក់ថា នាង និងគ្រួសារគ្មានគំនិតបោកប្រាស់ឡើយ បើមានគំនិតបោកប្រាស់មែន ខ្សែ.ក ខ្សែដៃដែលនៅនឹងខ្លួន នាងមិនឱ្យទៅប្តីវិញទេ។ លោក សុខ យ៉ាន មេឃុំអណ្តូងស្នាយបានមានប្រសាសន៍ថា គ្រួសារនេះពេលមកសុំច្បាប់ការលោកមិនបានអនុញ្ញាត្តច្បាប់ឱ្យទេ ព្រោះខាងស្រីមិនទានគ្រប់អាយុ នៅខ្វះខែ នេះបើតាមច្បាប់ចាស់ ឯច្បាប់ថ្មីនៅមិនទាន់អនុម័តនៅឡើយ ។ តែទោះបីឃុំមិនអនុញ្ញាត្តក៏គេបានរៀបចំការហើយដែរ តែពេលរៀបការហើយស្រាប់តែមានរឿងសុំលែងលះគ្នាទៅវិញ តែគេគ្រាន់តែមកជម្រាបឱ្យដឹងទេ មិនទាន់ឃើញមានពាក្យបណ្តឹងនៅឡើយទេ ។
ទោះយ៉ាងណារឿងរ៉ាវខាងលើនេះ គឺជាការបកស្រាយរបស់ភាគីនាងជាប្រពន្ធតែប៉ុណ្ណោះ ចំណែកភាគីបុរសជាប្តីមិនអាចសុំការបំភ្លឺបានទេ ដែលសង្ឃឹមថា បន្ទាប់ពីមានការចុះផ្សាយនេះទៅភាគីខាងប្រុសនឹងមានប្រតិកម្មតវ៉ាជាពុំខាន ដែលសារព័ត៌មានយើងនឹងរង់ចាំទទួលការស្រាយបំភ្លឺដោយរីករាយ ៕
ចែករំលែកព័តមាននេះ