ខេត្តព្រៃវែង ៖ ប្រជាពលរដ្ឋនៅគ្រប់ភូមិ-ឃុំ-ស្រុក ក្នុងទឹកដីខេត្តព្រៃវែង មានការព្រួយបារម្ភខ្លាំងចំពោះសុខភាព និងជីវភាពរស់នៅប្រចាំថ្ងៃរបស់ពួកគាត់ ដោយសារតែសព្វថ្ងៃនេះពួកគាត់សង្កេតឃើញថា មានទំនិញខ្លះដែលនាំមកពីប្រទេសវៀតណាមដូចជា បន្លែគ្រប់ប្រភេទ ផ្លែឈើគ្រប់មុខ ភេសជ្ជៈគ្រឿងកំប៉ុង ត្រីសាច់-មាន់-ទា ជ្រូកចូលតាមច្រករបៀងក្តី ច្រកអន្តរជាតិបន្ទាយចក្រីក្តី ឬច្រកផ្សេងៗទៀតក្តី មន្ត្រីប្រចាំការឬមន្ត្រីជំនាញឈរជើងនៅទីនោះពុំបានយកចិត្តទុកដាក់ធ្វើការត្រួតពិនិត្យឱ្យបានត្រឹមត្រូវម៉ត់ចត់ទេ ហាក់ដូចជាមានភាពធូររលុង ។
ប្រភពព័ត៌មានលើកឡើងថា ទំនិញដែលនាំចូលពេលយប់មានដូចជាបន្លែបង្ការគ្រប់មុខ ផ្លែឈើគ្រប់ប្រភេទ គឺនៅម៉ោង៣ឬម៉ោង៤ទៀបភ្លឺនាំចូលដល់គ្រប់ផ្សារក្នុងខេត្តព្រៃវែង រួចឈ្មួញទាំងនោះនានិយាយថា បន្លែផ្លែឈើទាំងនោះជាផលិតផលក្នុងស្រុក ។ ការបន្លំពីប្រភពដូច្នេះគឺទី១-លក់ឆាប់ដាច់ ទី២-ងាយស្រួលចែកចាយបន្តទៅតាមផ្សារតូចៗទៀត ។ រីឯសាច់មាន់ ទា ជ្រូក ឈ្មួញនាំចូលពេលថ្ងៃ ខ្លះមានច្បាប់ ខ្លះអត់់ច្បាប់ ។ ជាក់ស្តែង ដូចជាមាន់ទាំងទ្រុងៗទំនងជាអត់ច្បាប់ទើបឈ្មួញយកមាន់ទាំងទ្រុងៗទាំងនោះទៅបង្កប់នៅក្នុងរទេះដឹកផ្លែចេកដើម្បីបន្លំភ្នែកមន្ត្រីពេទ្យសត្វងាយស្រួួលនាំចូលទៅទីផ្សារ ។
ប្រជាពលរដ្ឋដែលឃើញហើយឆ្ងល់ក៏ចោទសួរទៅមន្ទីរពេទ្យសត្វថា តើមាន់ទាំងទ្រុងៗនោះនាំមកពីណា? ឯមន្ត្រីពេទ្យសត្វឆ្លើយថា មិនដឹង ។ ប្រជាពលរដ្ឋបន្តថា បើមន្ត្រីពាក់ព័ន្ធគ្រប់ស្ថាប័នធ្វើមិនដឹងមិនឮរបៀបនេះ វាជាហេតុធ្វើឱ្យប៉ះពាល់យ៉ាងធ្ងន់ធ្ងរទៅលើសុខភាពរបស់ពួកគាត់ ហើយគ្មានអ្នកណាទទួលខុសត្រូវ ។ ពួកគាត់ខំដាំស្រូវ ពោត ពេលបានផលស្រាប់តែស្រូវពោតចុះថោក ។ ខំដាំបន្លែបង្ការចិញ្ចឹមមាន់ទា ជ្រូក ដើម្បីកសាងជីវភាពឱ្យបានធូរធារ ប៉ុន្តែបែរជាមានការនាំចូលយ៉ាងគំហុកធ្វើឱ្យផលិតផលក្នុងស្រុកគ្មានទីផ្សារ ។ បើរបៀបនេះពួកគាត់គ្មានអ្វីសង្ឃឹមទេ ចុងក្រោយមានតែធ្វើចំណាកស្រុកទៅរកការងារធ្វើនៅប្រទេសគេប៉ុណ្ណោះ ។
ទាក់ទងទៅនឹងបញ្ហាខាងលើនេះ ប្រជាពលរដ្ឋគ្រប់ភូមិ ឃុំ ស្រុក ក្នុងខេត្តព្រៃវែង សុំឱ្យលោកអភិបាលខេត្តមេត្តាជួយពិនិត្យមើលមន្ត្រីក្រោមឱវាទដែលពាក់ព័ន្ធទៅនឹងបញ្ហាខាងលើនេះ សូមឱ្យមន្ត្រីជំនាញគ្រប់ស្ថាប័នដែលឈរជើងតាមគោលដៅ ត្រួតពិនិត្យគ្រប់មុខទំនិញឱ្យបានត្រឹមត្រូវមុននឹងអនុញ្ញាតឱ្យនាំចូល ។ នេះទើបជាការរួមចំណែកជួយកាត់បន្ថយភាពក្រីក្ររបស់ប្រជាពលរដ្ឋយ៉ាងពិតប្រាកដ មិនមែនឱ្យឈរជើងចាំតែយកលុយដាក់ហោប៉ៅនោះឡើយ៕
ចែករំលែកព័តមាននេះ