រាជធានីភ្នំពេញ ៖ ផ្លូវបេតុងមួយខ្សែបានក្លាយទៅជាប្រព័ន្ធលូបង្ហូររំដោះទឹកស្អុយហូរកាត់ផ្លូវដូចប្រឡាយទឹកទៅហើយទើបរថយន្តកូរ៉េមួយគ្រឿងបួងចង្កូតបត់ត្រង់ចំណុចផ្លូវបែកជា៤មិនផុត ធ្វើឱ្យប៉ះជញ្ជាំងផ្ទះប្រជាពលរដ្ឋ ហើយព្យាយាមបើករត់គេចត្រូវម្ចាស់ផ្ទះដេញតាមទាន់ ។
ហេតុការណ៍នេះបានកើតឡើងកាលពីវេលាម៉ោង១១ និង៣០នាទីយប់ ថ្ងៃទី៣០ មករា តាមផ្លូវបេតុង ក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ ប្រជាពលរដ្ឋបានឲ្យដឹងថា ផ្លូវបេតុងមួយខ្សែបានក្លាយជាទៅប្រព័ន្ធលូរំដោះទឹកស្អុយរបស់រោងចក្រនៅក្បែរនោះហូរកាត់ផ្លូវធ្វើឲ្យដាច់ក្រហេងក្រហូងមានទឹកដក់ដូចប្រឡាយទឹករាប់ខែរាប់ឆ្នាំមកហើយមិនឃើញមានអាជ្ញាធរពាក់ព័ន្ធណាចេញមកជួសជុលទេ ទុកបណ្តោយឲ្យផ្លូវបេតុងក្លាយជាទៅប្រឡាយទឹកស្អុយដែលពិបាកក្នុងការធ្វើដំណើរ ជាពិសេសត្រង់ចំណុចផ្លូវបែកជា៤ទៀត ។
ជាក់ស្តែងរថយន្តកូរ៉េ ពណ៌ខៀវ ពាក់ស្លាកលេខ កំពង់ចាម 3A 0166 ជារថយន្តដឹកទំនិញ បើកបរតាមផ្លូវបេតុងពីលិចទៅកើត ពេលមកដល់ចំណុចខាងលើរថយន្តបត់ឆ្វេង តែស្ថានភាពផ្លូវក្រហេងក្រហូងហើយ មានទឹកភក់ជ្រាំ រថយន្តបើកកាត់អាចនឹងផុងជាប់កង់ ដូច្នេះរថយន្តត្រូវបើកវាងសិន ទើបបត់ តែបត់អត់ផុតធ្វើឲ្យវាត់គូទប៉ះជញ្ជាំងផ្ទះប្រជាពលរដ្ឋនៅក្បែរនោះស្រាំអស់មួយផ្ទាំង។
ម្ចាស់ផ្ទះបានឲ្យដឹងថា ខណៈពេលដែលគាត់កំពុងតែសម្រាកលង់លក់ស្រាប់តែលាន់សូរគ្រាំងទើបគាត់ចាក់សោផ្ទះរត់ចេញមកក្រៅដេញតាមរថយន្តបង្កបើករត់បានប្រមាណ៥០ម៉ែត្រ ដោយសារតែរថយន្តបែកកង់ក្រោយខាងឆ្វេងអ្នកបើកបរបានឈប់រថយន្តរត់គេចខ្លួនបាត់ ។
ក្រោយពេលកើតហេតុរថយន្តបង្កត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌពោធិ៍សែនជ័យរង់ចាំធ្វើការដោះស្រាយបន្តទៀត ។
ទាក់ទិននឹងគ្រោះថ្នាក់ចរាចរណ៍នេះប្រជាពលរដ្ឋបានសំណូមពរដល់អាជ្ញាធរពាក់ព័ន្ធមេត្តាជួយចុះទៅមើលផ្លូវខាងលើនេះផង និងរៀបចំប្រព័ន្ធលូឲ្យបានត្រឹមត្រូវផងមុននឹងជួសជុលផ្លូវឡើងវិញ ៕
ចែករំលែកព័តមាននេះ