ក្រុងប៉ោយប៉ែត ៖ តាមប្រភពច្បាស់ការណ៍ពីលោកឱក សុផាន ដែលជាប់ពាក់ព័ន្ធក្នុងករណីរឿងទម្លាក់អភិបាលក្រុងប៉ោយប៉ែត បានប្រាប់អ្នកសារព័ត៌មានតាមទូរស័ព្ទនៅព្រឹកថ្ងៃទី៣០ មករា ២០១៥ នេះឱ្យដឹងថា លោកស្ត្រី ទ្រី ណាត់បារាំង អាយុ៤៧ឆ្នាំ ដែលត្រូវបានកម្លាំងកងរាជអាវុធហត្ថ (PM) ក្រុងប៉ោយប៉ែត ខេត្តបន្ទាយមានជ័យ ឃាត់ខ្លួនកាលពីរសៀលថ្ងៃទី២៦ មករា ២០១៥ កន្លងមក នៅចំណុចភោជនីយដ្ឋានកញ្ចុះ៥០ (ហៅស្តង់តាងួន) ស្ថិតក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត យកទៅសួរនាំក្នុងករណីរឿងរត់ការទម្លាក់លោកង៉ោ ម៉េងជ្រួន អភិបាលក្រុងប៉ោយប៉ែត ហើយតម្រូវឱ្យឈ្មោះឱក សុផាន ឡើងកាន់តំណែងជាអភិបាលក្រុងថ្មីជំនួនវិញនោះ រហូតមកដល់ល្ងាច ថ្ងៃទៅ២៩ មករា គឺលោកស្រីឈ្មោះទ្រី ណាត់បារាំង ក្រោយពេលសមត្ថកិច្ចប៉េអឹម ខេត្តសួរនាំរួច បានបញ្ជូនខ្លួនទៅដល់តុលាការខេត្ត ដើម្បីសួរនាំបន្ត រួចមកត្រូវបានត្រូវបានខាងតុលាការខេត្តដោះលែងឱ្យមានសេរីភាពវិញហើយ ។
ជុំវិញបញ្ហាពាក់ព័ន្ធក្នុងករណីខាងលើ អ្នកសារព័ត៌មានបានព្យាយាមទូរស័ព្ទសុំការបំភ្លឺពីលោកផាន់ វណ្ណរ័ត្ន ព្រះរាជអាជ្ញាអមសាលាដំបូង ខេត្តបន្ទាយ មានជ័យ តែលោកព្រះរាជអាជ្ញាបានប្រាប់ថា រឿងនេះ គឺលោកឡុង ជាប ព្រះរាជអាជ្ញារងជាអ្នកកាន់ក្តី ។ យ៉ាងណាក៏ដោយ លោកផាន់ វណ្ណរ័ត្ន ព្រះរាជអាជ្ញាអមសាលាដំបូងខេត្ត បានបង្ហើបឱ្យដឹងថា ក្នុងករណីនេះ លោកព្រះរាជអាជ្ញារងរបស់លោកបានរាយការណ៍ប្រាប់ថា បានចោទប្រកាន់ទៅតាមផ្លូវច្បាប់ផងដែរ ។
ចំណែកលោកឡុង ជាប ព្រះរាជអាជ្ញារងខេត្ត ខណៈពេលអ្នកសារព័ត៌មានទូរស័ព្ទជួបកាលពីវេលាម៉ោង១និង១៥នាទីព្រឹក ថ្ងៃទី៣០ មករា នេះ លោកប្រាប់ថា ជាប់បើកសាវនាការកាត់ក្តីមិនអាចបំភ្លឺបានទេ៕
ចែករំលែកព័តមាននេះ