ខេត្តព្រះសីហនុ ៖ មនុស្សម្នាក់បានរងរបួសធ្ងន់ និងម្នាក់ទៀតរងរបួសស្រាល រួមជាមួយរថយន្តចំនួនពីរគ្រឿងបានរងការខូចខាតស្ទើរតែទាំងស្រុង ដោយសារគ្រោះថ្នាក់ចរាចរណ៏មួយដែលបានកើតឡើងកាលពីវេលាម៉ោង២១ និង៣៥នាទីយប់ ថ្ងៃទី២៤ ខែមករា ឆ្នាំ ២០១៥ ត្រង់ចំនុចក្បែរស្ថានីយ៏សាំងសូគីម៉ិចផ្លូវបំបែករ៉ា ស្ថិតក្នុភូមិ៣ សង្កាត់លេខ៣ ក្រុងព្រះសីហនុ ។
យោងតាមប្រភពពីសមត្ថកិច្ចប៉ូលីសចរាចរណ៏បានឱ្យដឹងថា គ្រោះថ្នាក់ចរាចរណ៏នេះបង្កឡើងដោយរថយន្តម៉ាកហាយឡែនឌ័រ ពណ៌ស្ក ពាក់ស្លាកលេខ ភ្នំពេញ 2Y 5905 បើកបរដោយឈ្មោះស៊ី យ៉ា ភេទប្រុស អាយុ២៤ឆ្នាំ មុខរបរបើកបរ មានទីលំនៅខេត្តកែប រងរបួសធ្ងន់ រួមដំណើរជាមួយឈ្មោះ ឈួន មុំ ភេទស្រី អាយុ៤៩ឆ្នាំ មុខរបរមេផ្ទះ រងរបួស្រាល បានបើករថយន្តទៅបុករថយន្តកុងតឺនឺរមួយគ្រឿងផ្សេងទៀតម៉ាកហ្វ្រិស ពណ៌ឈាមជ្រូក ពាក់ស្លាកលេខ 3A 0509 បើកបរដោយឈ្មោះ ជួ ហុកលីន ភេទប្រុស អាយុ២២ឆ្នាំ ទីលំនៅភូមិព្រែកជ្រៃ ឃុំវាល ស្រុកកំពង់ស្ពឺ ខេត្តកំពង់ស្ពឺ ជារថយន្តកម្មសិទ្ឋរបស់ក្រុមហ៊ុន PlM ដែលបានចតចោតនៅក្នុងចំណតក្បែរស្ថានីយ៏សាំងសូគីម៉ិច បណ្តាលឱ្យភាគីរថយន្តហាយឡែនឌ័រ រងការខូចខាតមួយកំណាត់មុខ ឯអ្នកបើកបរគៀបជាប់ក្នុងរថយន្ត ត្រូវបានអ្នកជិតខាងជួយគាស់ចេញដឹកមកសង្គ្រោះនៅគ្លីនិកឯកជនសេតេ រួចផុតពីជីវិត ។
យោងតាមសាក្សីនៅកន្លែងកើតហេតុបានឱ្យដឹងថា នៅវេលាកើតហេតុគេឃើញរថយន្តមួយគ្រឿងបើកចុះចំណោតរ៉ា ក្នុងទិសដៅសំដៅចេញពីក្រុងព្រះសីហនុ (ក្នុងស្ថានភាពបែបស្រវឹង ព្រោះនៅក្នុងរថយន្តក្រោយពេលកើតហេតុគេបានឃើញសាច់ក្លែម និងស្រាបៀ ABC នៅក្នុងរថយន្តធ្លាក់រាយប៉ាយ) ។ នៅពេលមកដល់ចំណុចកើតហេតុ ក៏ស្រាប់តែរថយន្តរេចង្កូតមកបុករថយន្តកុងតៃនឺរដែលចតចោលទាំងកំរោល លាន់ដូចរន្ទះខែប្រាំងទាំងកណ្តាលយប់ បណ្តាលឱ្យមានការភ្ញាក់ផ្អើលប្រជាពលរដ្ឋទៅចោមរោមមើលគ្រប់ៗគ្នា ។
ក្រោយកើតហេតុ រថយន្តទាំងពីរគ្រឿងត្រូវបានកំលាំងនគរបាលស្ទួចយកទៅរក្សាទុកនៅការិយាល័យចរាចរណ៏ផ្លូវគោកខេត្តរង់ចាំការដោះស្រាយនៅពេលបន្ទាប់ ៕
ចែករំលែកព័តមាននេះ