ខេត្តព្រះសីហនុ ៖ បុរសជាបុគ្គលិកផ្ទះសំណាក់ GBT3 ម្នាក់ បានរងរបួសធ្ងន់ និងត្រូវបានបញ្ជូនទៅសង្គ្រោះនៅមន្ទីរពេទ្យឯរាជធានីភ្នំពេញ បន្ទាប់ពីត្រូវជនជាតិអាមេរិកដែលអះអាងថា ជាមិត្តភក្តិជនរងគ្រោះវាយកាលពីវេលាម៉ោង៩និង១០នាទីយប់ថ្ងៃទី២០ ធ្នូ
ខេត្តព្រះសីហនុ ៖ បុរសជាបុគ្គលិកផ្ទះសំណាក់ GBT3 ម្នាក់ បានរងរបួសធ្ងន់ និងត្រូវបានបញ្ជូនទៅសង្គ្រោះនៅមន្ទីរពេទ្យឯរាជធានីភ្នំពេញ បន្ទាប់ពីត្រូវជនជាតិអាមេរិកដែលអះអាងថា ជាមិត្តភក្តិជនរងគ្រោះវាយកាលពីវេលាម៉ោង៩និង១០នាទីយប់ថ្ងៃទី២០ ធ្នូ នៅផ្ទះជួលមួយកន្លែងស្ថិតក្នុងភូមិ៥ សង្កាត់លេខ៤ ក្រុងព្រះសីហនុ ។
យោងតាមប្រភពពីលោកអនុសេនីយ៍ទោ លុយ ហាង នាយបុ៉ស្តិ៍រដ្ឋបាលសង្កាត់លេខ៤ បានឱ្យដឹងថា នៅយប់ថ្ងៃកើតហេតុ បុ៉ស្តិ៍នគរបាលរដ្ឋបាលសង្កាត់លេខ៤ បានទទួលពាក្យបណ្តឹងពីប្រជាពលរដ្ឋថា មានករណីធ្វើទារុណកម្មមួយកើតឡើងដោយជនបរទេសបានវាយដំជនជាតិខ្មែរយ៉ាងព្រៃផ្សៃ ។ ពេលនោះកម្លាំងនគរបាលបុ៉ស្តិ៍បានចុះទៅដល់កន្លែងកើតហេតុភ្លាម ហើយឃើញជនរងគ្រោះដួលសន្លប់បាត់ស្មារតីលើឥដ្ឋការ៉ូក្នុងផ្ទះជួលរបស់ជនបរទេសរូបនោះយ៉ាងអាណោចអាធ័មជាទីបំផុត ។
ប្រភពព័ត៌មានបន្តថា បន្ទាប់មកលោកក៏រាយការណ៍មកកាន់អធិការដ្ឋាននគរបាលក្រុងការិយាល័យអន្តោប្រវេសន៍ និងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត ទើបឃាត់ខ្លួនជនជាតិអាមេរិករូបនេះមកកាន់ស្នងការដ្ឋាននគរបាលខេត្តដើម្បីសាកសួរ។ ជនបរទេសរូបនេះឈ្មោះ Barnett Jason Richard អាយុ៣៣ឆ្នាំ កាន់លិខិតឆ្លងដែនលេខ ៥២៧៤៤២៨៦៤ ជាអ្នកទេសចររយៈពេលវែង ស្នាក់នៅផ្ទះជួលកន្លែងកើតហេតុខាងលើ ។ ឯជនរងគ្រោះឈ្មោះ នាង សារិន អាយុ២៩ឆ្នាំ ជាអ្នកនាំភ្ញៀវនៅផ្ទះសំណាក់ GBT3 មានស្រុកកំណើតនៅស្រុកកំពង់ត្របែក ខេត្តព្រៃវែង ។
ចំពោះប្រភពច្បាស់ការណ៍ជុំវិញដើមហេតុនៃការធ្វើទារុណកម្មនេះ សមត្ថកិច្ចនៅពុំទាន់រកឃើញមូលហេតុច្បាស់លាស់នៅឡើយទេ ។ ដោយឡែកយោងតាមប្រភពពីបុគ្គលិកផ្ទះសំណាក់ GBT3 ដូចគ្នាឱ្យដឹងថា ជនជាតិអាមេរិក និងជនរងគ្រោះបានរាប់អានគ្នាជាមិត្តភក្តិរយៈពេល២ទៅ៣ខែមកហើយ ហើយជារៀងរាល់ថ្ងៃអ្នកទាំងពីរទៅណាមកណា ក៏ទៅជាមួយគ្នា សូម្បីតែផ្ទះជួលនៅកន្លែងកើតហេតុ ក៏ជនរងគ្រោះជាអ្នកធានាជួល តភ្ជាប់ចរន្តអគ្គិសនី ទឹក និងទិញសម្ភារតុបតែងដែរ បុ៉ន្តែមិនដឹងមូលហេតុអ្វីបានជាជនបរទេសនេះបែរជាលើកដៃវាយទៅកើត ។ ប្រភពដដែលបន្តថា នៅមុនកើតហេតុមួយថ្ងៃ ជនជាតិអាមេរិក និងជនរងគ្រោះបានផឹកស៊ីជាមួយគ្នា ។
ជុំវិញបញ្ហានេះ យោងតាមប្រភពជិតដិតមួយលួចបង្ហើបឱ្យដឹងថា ហេតុការណ៍នេះគេសង្ស័យថា អាចជាបញ្ហាស្នេហាត្រីកោណរវាងស្ត្រីអាមេរិកជាប្រពន្ធ និងបុរសរងគ្រោះ ព្រោះរយៈពេលចុងក្រោយនេះ គេសង្កេតឃើញស្ត្រីជាប្រពន្ធជនបង្កមានភាពស្និទ្ធស្នាលជាមួយជនរងគ្រោះណាស់ ។ បុ៉ន្តែនេះគ្រាន់ជាការសង្ស័យបុ៉ណ្ណោះ ឯរឿងរ៉ាវយ៉ាងណានោះ គ្មាននរណាម្នាក់ដឹងក្រៅពីជនរងគ្រោះ និងជនដែលបង្ករបួសស្នាមទេ ។ ទោះជាបែបណា ជនអាមេរិករូបនេះត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការទៅតាមផ្លូវច្បាប់ និងត្រូវបានឃុំខ្លួនហើយកាលពីល្ងាចថ្ងៃទី២១ ធ្នូ ។ ដោយឡែនជនរងគ្រោះ តាមព័ត៌មានចុងក្រោយឱ្យដឹងថា បានស្លាប់កាលពីព្រឹកថ្ងៃទី២២ ធ្នូ ៕
ចែករំលែកព័តមាននេះ