ខេត្តស្វាយរៀង ៖ កុមារាម្នាក់អាយុ៤ឆ្នាំបានរងរបួសធ្ងន់ដោយសារគោយន្តដឹកបាវស្រូវកិនចំពីលើពោះបណ្តាលឱ្យធ្លាយពោះវៀនចេញមកក្រៅតាមរន្ធគូទសន្លប់នៅនឹងកន្លែង។ ករណីដ៏រន្ធត់នេះបានកើតឡើងកាលពីវេលាម៉ោង១០ព្រឹក ថ្ងៃទី២៨ វិច្ឆិកា ២០១៤ នៅចំណុចវាលស្រែភូមិប្រសូត្រទី១ ឃុំកណ្តៀងរាយ ស្រុកស្វាយទាប។
បើតាមនគបាលប៉ុស្តិ៍រដ្ឋបាលឃុំកណ្តៀងរាយឲ្យដឹងថា កុមារារងគ្រោះឈ្មោះរិន ពេត អាយុ៤ឆ្នាំ មានទីលំនៅភូមិព្រៃសង្កែ ឃុំខ្សែត្រ ស្រុកកំពង់រោទិ៍។ បើតាមស្ត្រីឈ្មោះអេន ម៉ុន អាយុ២៨ឆ្នាំ ត្រូវជាម្តាយកុមារារងគ្រោះបានប្រាប់ឲ្យដឹងថា គាត់មានកូន៣នាក់ហើយ កូនដែលរងគ្រោះជាកូនទី២ ដោយគ្រួសារក្រីក្រគ្មានដីធ្វើស្រែ ប្តីក៏មកជួលដីស្រែអ្នកភូមិប្រសូត្រចំនួន២ហិកតាដើម្បីធ្វើស្រែយកផលផ្គត់ផ្គង់ជីវភាព។ នៅមុនពេលកើតហេតុក្រុមគ្រួសារក៏បានជួលម៉ាស៊ីនបូតស្រូវមួយគ្រឿងមកច្រូតស្រូវពេលដែលម៉ាស៊ីនបូតស្រូវបានកន្លះហិកតា ប្តីគាត់ក៏ប្រមូលបាវស្រូវដាក់លើគោយន្តពេញរ៉ឺម៉ករៀបដឹកចេញទៅដាក់លើទួលជិតផ្លូវជាតិលេខ១ ស្របពេលនោះកូនប្រុសអាយុ៤ឆ្នាំបានរត់ឡើងជិះពីលើបាវស្រូវ ហើយបងប្រុសជីដូនមួយជាអ្នកបើកគោយន្តដឹកស្រូវនេះ ដោយមានបុរសជាឪពុកជិះគោយន្តទៅជាមួយដែរ។
លុះបើកគោយន្តចេញបានប្រមាណជា៥០ម៉ែត្រក៏ក្រលែងធ្លាក់កូនពីលើគោយន្តមកដីផ្ងាពោះ ហើយគោយន្តបានកិនចំពីលើពាក់កណ្តាលពោះលាន់ស្នូរភូសបណ្តាលឲ្យធ្លាយចេញពោះវៀនតាមរន្ធគូទមកក្រៅមួយទ្រេលធ្វើឲ្យកុមាររងគ្រោះស្រែកយំយ៉ាងខ្លាំងពេលនោះបុរសជាឪពុកបានឮក៏ក្រឡេកមើលក្រោយឃើញកូនធ្លាយពោះវៀនចេញតាមរន្ធគូទមួយទ្រេលទៅហើយក៏ប្រញ៉ាប់ប្រញាល់ដឹកកូនមកកាន់មន្ទីរពេទ្យខេត្តដើម្បីសង្គ្រោះ តែដោយរបួសធ្ងន់ធ្ងរពេកគ្រូពេទ្យក៏បញ្ជូនទៅមន្ទីរពេទ្យគន្ធបុប្ផាដើម្បីសង្គ្រោះបន្ត ប៉ុន្តែគ្រូពេទ្យនិយាយថា សង្ឃឹមតិចណាស់៕
ចែករំលែកព័តមាននេះ