ខេត្តកំពង់ឆ្នាំង ៖ បុរសម្នាក់បានស្លា.ប់ភ្លាមៗនៅកន្លែងកើតហេតុ បន្ទាប់ពីត្រូវរថយន្តមួយគ្រឿងបុកយ៉ាងពេញទំហឹងលើកំណាត់ផ្លូវជាតិលេខ៥ ត្រង់ចំណុចភូមិសំរោង ឃុំតាជេស ស្រុកកំពង់ត្រឡាច ខណៈពេលបុរសរូបនោះជិះម៉ូតូបត់ឆ្លងថ្នល់ ។
ខេត្តកំពង់ឆ្នាំង ៖ បុរសម្នាក់បានស្លាប់ភ្លាមៗនៅកន្លែងកើតហេតុ បន្ទាប់ពីត្រូវរថយន្តមួយគ្រឿងបុកយ៉ាងពេញទំហឹងលើកំណាត់ផ្លូវជាតិលេខ៥ ត្រង់ចំណុចភូមិសំរោង ឃុំតាជេស ស្រុកកំពង់ត្រឡាច ខណៈពេលបុរសរូបនោះជិះម៉ូតូបត់ឆ្លងថ្នល់ ។ ហេតុការណ៍នេះបានកើតឡើងកាលពីវេលាម៉ោង៣ និង៥០នាទីរសៀល ថ្ងៃទី២៦ វិច្ឆិកា ២០១៤ ។
លោក ហ៊ុល វាសនា អធិការក្រុងកំពង់ឆ្នាំង បាននិយាយថា ជនរងគ្រោះមានឈ្មោះ ស៊ឹម កុសល អាយុ៥៨ឆ្នាំ មានទីលំនៅភូមិតាមលក្រោម ឃុំកោះថ្កូវ ស្រុកជលគីរី។ មុនពេលកើតហេតុគេឃើញបុរសរងគ្រោះជិះម៉ូតូម៉ាកវ៉េវ អាល់ហ្វា ពណ៌ខ្មៅគ្មានស្លាកលេខ តាមបណ្តោយផ្លូវជាតិលេខ៥ លុះមកដល់ចំណុចកើតហេតុក៏បានបត់ឆ្លងថ្នល់បំណងទៅផ្ទះ ខណៈនោះមានរថយន្តមួយគ្រឿងម៉ាកវីហ្គោ ពណ៌ស ពាក់ស្លាកលេខ 2X.4717 បើកបរដោយជនពុំស្គាល់ឈ្មោះក្នុងល្បឿនយ៉ាងលឿនពីត្បូងមកជើងបានបុកម៉ូតូជនរងគ្រោះពេញទំហឹង បណ្តាលឱ្យជនរងគ្រោះស្លាប់នៅនឹងកន្លែងកើតហេតុ ចំណែករថយន្តមិនបានឈប់មើលជនរងគ្រោះឡើយ គឺបានបើករត់គេចខ្លួនបាត់ស្រមោល ។
លោកអធិការក្រុងបានបន្តថា ភ្លាមៗនោះ លោកបានប្រើវិទ្យុទាក់ទងតាមស្រុកក្រុងឱ្យជួយស្ទាក់ចាប់ តែចាប់មិនបាន មិនដឹងថា រត់គេចទៅផ្លូវណា ព្រោះផ្លូវច្រើនពេក ឬក៏ទៅសម្ងំលាក់ខ្លួននៅកន្លែងណាឡើយ ។ លោកបានបញ្ជាក់ថា តាមពិតរថយន្តខាងលើនេះបើកលឿនពេក ជនរងគ្រោះមើលទំនងថា អាចឆ្លងផុតថ្នល់ជាតិ តែពេលឆ្លងត្រូវរថយន្តនោះបុកតែម្តង ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ