រាជធានីភ្នំពេញ ៖ យុវជន២នាក់ក្នុងចំណោម៤នាក់ជិះម៉ូតូ២គ្រឿង ខណៈជិះចេញពីកម្មវិធីជប់លៀងត្រឡប់ទៅផ្ទះវិញ ម៉ូតូមួយគ្រឿងបានជិះទៅបុករថយន្តធុនធំចំណុះ៥តោន កំពុងឆ្លងផ្លូវចំពាក់កណ្ដាល បណ្ដាលឱ្យយុវជនម្នាក់ខ្ទាតចូលក្រោមកង់រថយន្តកិនខ្ទេចក្បាលស្លាប់យ៉ាងអាណោចអាធ័ម ចំណែកម្នាក់ទៀតរងរបួសស្រាល ។
ហេតុការណ៍នេះកើតឡើងកាលពីវេលាម៉ោង០៣ និង៤០នាទីឈានចូលថ្ងៃទី២២ វិច្ឆិកា ២០១៤ ស្ថិតត្រង់ចំណុចស្ដុបសាន់ថោន
ប្លាស្សា តាមបណ្ដោយផ្លូវសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ ។
ប្រភពឱ្យដឹងថា ជនរងគ្រោះដែលស្លាប់ឈ្មោះហ៊ន រតនៈ ភេទប្រុស អាយុ២១ឆ្នាំ ជាជាងជួសជុលរថយន្តនៅម្ដុំផ្សារដេប៉ូ ស្នាក់នៅផ្ទះជួលក្នុងសង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិព្រៃបណ្ដំ ឃុំបន្ទាយខាងកើត ស្រុកបន្ទាយមាស ខេត្ត
កំពត ។ ចំណែកអ្នករងរបួសស្រាលឈ្មោះង៉ែត ដេត ភេទប្រុស អាយុ២២ឆ្នាំ ធ្វើការអង្គការ NGO ស្នាក់ភូមិស្លែងរលើង សង្កាត់ទឹកថ្លា ខណ្ឌសែនសុខ ជិះម៉ូតូមួយគ្រឿងម៉ាកហុងដាស្គូពី ពណ៌ស ពាក់ស្លាកលេខភ្នំពេញ 1CE-3554 ។ រីឯអ្នកបើករថយន្តឈ្មោះហៀក សុខ អាយុ៣៣ឆ្នាំ បើករថយន្តធុនធំមួយគ្រឿងចំណុះ៥តោន ពាក់ស្លាកលេខភ្នំពេញ 3B-3973 មានស្រុកកំណើតនៅខេត្តព្រៃវែង ។
ប្រភពបន្តថា មុនពេលកើតហេតុ យុវជន៤នាក់ជិះម៉ូតូ២គ្រឿងចេញពីកម្មវិធីជប់លៀងមិត្តភក្តិនៅម្ដុំពោធិ៍ចិនតុង ហើយជិះម៉ូតូធ្វើដំណើរក្នុងបំណងត្រឡប់ទៅផ្ទះ តាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ស្រាប់តែមកដល់ចំណុចកើតហេតុ ក៏មានរថយន្តដឹកទំនិញធុនធំមួយគ្រឿង ធ្វើដំណើរតាមបណ្ដោយផ្លូវណតប្រ៊ីត ទិសដៅពីជើងទៅត្បូង បើកឆ្លងស្ដុបក៏ត្រូវយុវជន២នាក់ដែលជិះម៉ូតូស្កូបពីក្នុងល្បឿនលឿនបោះពួយទៅបុករថយន្តចំពាក់កណ្ដាលរថយន្តពេញទំហឹង បណ្ដាលឱ្យយុវជនម្នាក់ខ្ទាតចូលក្រោមកង់រថយន្តកិនខ្ទេចក្បាលស្លាប់តែម្តង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ