ខេត្តកំពង់ឆ្នាំង ៖ យុវជនម្នាក់ត្រូវបានមន្ត្រីនគរបាលមូលដ្ឋាន ធ្វើការចាប់ឃាត់ខ្លួន នៅព្រឹកថ្ងៃទី២១ ខែកញ្ញា ឆ្នាំ២០១៤ នេះ បន្ទាប់ពីមានពាក្យបណ្តឹងពីឪពុកម្តាយយុវតីរងគ្រោះ ថា បានចាប់រំលោភកូនស្រី គាត់ជាអនីតិជន អាយុ១៤ឆ្នាំ ដែលបានប្រព្រឹត្តឡើងជាច្រើនលើក ខណៈដែលឪពុកម្តាយនាងមិននៅផ្ទះ ក្នុងអំឡុងដើមខែកញ្ញា ឆ្នាំ២០១៤ នៅផ្ទះកេ្មងស្រីរងគ្រោះ ស្ថិតក្នុងភូមិក្រសាស់ថ្មី ឃុំឈូក.ស ស្រុកកំពង់ត្រឡាច ។
លោក ហ៊ុន វាសនា អធិការនគរបាល ស្រុកកំពង់ត្រឡាច បាននិយាយអោយដឹងថា ជនសង្ស័យរូបនោះមានឈ្មោះ ភាព លី អាយុ១៨ឆ្នាំ មានទីលំនៅជិតគ្នាជាមួយជនរងគ្រោះ ។ ចំណែកក្មេងស្រីរងគ្រោះ មានអាយុ១៤ឆ្នាំ មានឪពុកម្តាយជាអ្នកប្រកបរបរដើរលក់ កាំបិត ពូថៅ និងសម្ភារៈផ្សេងៗ ដែលទទួលទិញពីជាងដំដែក យកទៅលក់តាម ស្រុក ខេត្ត ឆ្ងាយៗ ហើយ១០ថ្ងៃ ឬកន្លះខែ ទើបមកផ្ទះម្តង ។
លោកអធិការបានបន្តថា ដោយសារតែជនសង្ស័យខាងលើ ទើបបានមកស្នាក់នៅជាមួយបងប្រុសខ្លួន ដែលមានទីលំនៅជិត កុមារីរងគ្រោះ ទើបគេដឹងថា ឪពុកម្តាយនាង មិននៅផ្ទះ ហើយបានឆ្លៀតឱកាសទៅចាប់នាងរំលោភ៤-៥ លើកមកហើយ តែយុវតីរងគ្រោះមិនចាំថ្ងៃ និងមិនហ៊ានប្រាប់អ្នកណា ព្រោះនាងនៅម្នាក់ឯង ។ ទើបតែនៅយប់ថ្ងៃទី២០ ខែកញ្ញា ឆ្នាំ២០១៤ នេះ ម្តាយឪពុក នាងបានត្រឡប់ពីលក់កាំបិត ពូថៅវិញ នាងបានប្រាប់រឿងរ៉ាវ ដែលបានកើតឡើងមកលើរូបនាង ហើយនៅព្រឹកស្អែកឡើង ថ្ងៃទី២១ ខែកញ្ញា ទើប ឪពុកម្តាយមកប្តឹងសមត្ថកិច្ច នឹងមានការចាប់ខ្លួនតែម្តង ។
នៅចំពោះមុខសមត្ថកិច្ច ជនសង្ស័យបានបញ្ចាក់ថា ៖ រូបគេពិតជាបានទៅដេកនៅជាមួយនាងមែន តែគ្រាន់តែដេកឱប លេងក្រៅៗទេ ។ ប៉ុន្តែទោះយ៉ាងនេះក្តី យុវតីរងគ្រោះបាននិយាយថា គឺពិតជាបានចាប់នាងរំលោភ រហូតធ្លាក់ឈាមទៀតផង ។
ទោះយ៉ាងណាមន្ត្រីនគរបាលបានធ្វើការស្តីបន្ទោស ដល់អាណាព្យាបាល ក្មេងស្រីរងគ្រោះថា ៖ មិនគួរបណ្តោយអោយកូនអាយុ១៤ឆ្នាំ ដេកនៅម្នាក់ឯងបែបនេះឡើយ ។ ជនសង្ស័យត្រូវបានមន្ត្រីនគរបាល ស្រុកកំពង់ត្រឡាច កសាងសំណុំរឿងបញ្ជូនមកស្នងការដ្ឋាន ដើម្បីសាកសួរ និងកសាងសំណុំរឿងបន្ថែមបញ្ជូនទៅតុលាការដើម្បីចាត់ការតាម និតិវិធីច្បាប់ ៕
ចែករំលែកព័តមាននេះ