រាជធានីភ្នំពេញ ៖ យុវជនពីរនាក់ស្រវឹងស្រាជិះម៉ូតូហុងដាឌ្រីមមួយគ្រឿងដោយធ្វើដំណើរក្នុងល្បឿនលឿននិងវ៉ារថយន្តមួយគ្រឿងទៀត ក៍ជ្រុលចង្កូតទៅបុករឺុម៉កម៉ូតូបើកបញ្រ្ចាសទិសគ្នាចំពីមុខពេញទំហឹង បណ្តាលឱ្យរងរបួសធ្ងន់-ស្រាល ៤នាក់ ។ ហេតុការណ៍នេះកើតឡើងនៅវេលាម៉ោង ៥ និង១០នាទី ព្រឹក ថ្ងៃទី ២១ កញ្ញា ២០១៤ នៅចំណុចផ្លូវព្រះស៊ីសុវត្តិ កែងនឹងផ្លូវលេខ ១៣០ ស្ថិតក្នុងសង្កាត់ផ្សារចាស់ ខណ្ឌដូនពេញ ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញយុវជនស្រវឹងស្រាពីរនាកជិះម៉ូតូហុងដាឌ្រីម សេ១២៥ មួួយគ្រឿង ពណ៌ក្រហម ពាក់ស្លាកលេខកណ្តាល 1L-2717 ដោយធ្វើដំណើរក្នុងល្បឿនយ៉ាងលឿនតាមផ្លូវព្រះស៊ីសុវត្តិ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ម៉ូតូបានព្យាយាមបើកវ៉ារថយន្តមួយគ្រឿង ដែលបើកស្របទិសគ្នា ហើយក៏ជ្រុលចង្កូតទៅបុកចំពីមុខរឺុម៉កម៉ូតូដឹកត្រី ជិះពីរនាក់ប្តី-ប្រពន្ធ ដែលធ្វើដំណើរបញ្រ្ចាសទិសគ្នា ពេញទំហឹងបណ្តាលឱ្យរងរបួសធ្ងន់-ស្រាល៤នាក់ដោយ យុវជនបើកម៉ូតូបាក់ភ្លៅ និងយុវជនជិះពីក្រោយរងរបួសស្រាល ចំណែកបុរសចំណាស់បើករឺុម៉កម៉ូតូដាច់កែងជើងខាងឆ្វេង ហើយប្រពន្ធរងរបួសស្រាល ។
ក្រោយពេលកើតហេតុជនរងគ្រោះត្រូវបានគេបញ្ជូនទៅសង្រ្គោះនៅមន្ទីរពេទ្យ ចំណែកម៉ូតូ និងរឺុម៉កម៉ូតូត្រូវសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយគ្នាតាមនិតិវិធីច្បាប់ ។
ចែករំលែកព័តមាននេះ