រាជធានីភ្នំពេញ ៖ យុវជនបីនាក់ជិះម៉ូតូចេញពីក្លឹបកម្សាន្ត ធ្វើដំណើរត្រឡប់ទៅផ្ទះវិញត្រូវរថយន្តមិនស្គាល់អត្តសញ្ញាណ បើកវ៉ារថយន្តមួយគ្រឿងទៀតជ្រុលមកបុកពីក្រោយពេញទំហឹងបណ្តាលរបួសធ្ងន់-ស្រាល៣នាក់។ហេតុការណ៍នេះកើតឡើងកាលពីវេលាម៉ោង១ និង១០នាទី រំលងអាធ្រាត្រ ឈានចូលថ្ងៃទី ១៧ កញ្ញា ២០១៤ នៅតាមផ្លូវជាតិលេខ៤ ស្ថិតក្នុងចោមចៅ ខណ្ឌពោធិ៍សែនជ័យ។
ជនរងគ្រោះទី១.ឈ្មោះ ធា រ៉ា ភេទប្រុស អាយុ២១ឆ្នាំ របួសធ្ងន់ ,ទី២.ឈ្មោះសៀង ស៊ីថា ភេទប្រុស អាយុ២១ឆ្នាំ និងទី៣.ឈ្មោះ ភា សុវណ្ណ ភេទប្រុស អាយុ១៨ឆ្នាំ របួសស្រាល ។ ជនរងគ្រោះទាំង៣នាក់ រស់នៅក្នុងភូមិត្រាចទោល ស្រុកអង្គស្នួល ខេត្តកណ្តាល ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ យុវជនរងគ្រោះទាំងបីអ្នកបានចេញពីរាំលេងនៅក្នុងក្លឹបអាវ៉ាលូន នៅក្នុងសង្កាត់ទឹកថ្លា ដោយជិះម៉ូតូហុងដាឌ្រីម សេ១២៥ ពណ៌ខ្មៅ មួយគ្រឿង ពាក់ស្លាកលេខភ្នំពេញ1U-6832 ជិះគ្នាបីនាក់ ធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច ក្នុងបំណងត្រឡប់ទៅផ្ទះនៅស្រុកអង្គស្នួល ខេត្តកណ្តាល ខណៈពេលធ្វើដំណើរមកដល់ចំណុចកើតហេតុ ក៏មានរថយន្តមិនស្គាល់អត្តសញ្ញាណមួយគ្រឿង បើកស្របទិសគ្នា បានបើកវ៉ារថយន្តមួយគ្រឿងទៀត ហើយក៏ជ្រុលចង្កូតមកបុកចំពីក្រោយម៉ូតូ យុវជនរងគ្រោះទាំង៣នាក់ ពេញទំហឹងបណ្តាលឱ្យរងរបួសធ្ងន់ស្រាលតែម្តង ។
ក្រោយពេលកើតហេតុរថយន្តបង្កបានបន្ថែមល្បឿនបើករត់គេចបាត់ស្រមោល ចំណែកជនរងគ្រោះត្រូវក្រុមគ្រួសារមកទទួលយកទៅព្យាបាលរៀងៗខ្លួន ។
ចែករំលែកព័តមាននេះ