រាជធានីភ្នំពេញ ៖ បុរសម្នាក់បើករឺុម៉កម៉ូតូទៅបុកចំកញ្ចក់រថយន្តស៊េរីទំនើបមួយគ្រឿងដែលបើកបត់ឆ្លងផ្លូវបណ្តាលឱ្យបាក់កញ្ចក់រថយន្តអស់មួយចំហៀង សំណាងល្អអ្នកបើកបរទាំងសងខាងមិនមានរងរបួស ក៍ប៉ុន្តែបុរសបើករឺុម៉កម៉ូតូត្រូវក្រុមអង្គរក្សម្ចាស់រថយន្តចាប់ក្របួច ក.អាវ អូសទៅមើលកញ្ចក់រថយន្តដែលបាក់ បង្កការភ្ញាក់ផ្អើលដល់អ្នកដំណើរតាមដងផ្លូវ ។ ហេតុការណ៍នេះកើតឡើងកាលពីវេលាម៉ោង ៨ និង១០នាទី យប់ថ្ងៃទី ១៦ កញ្ញា ២០១៤ នៅចំណុចមុខសណ្ឋាគារកាំបូឌីយ៉ាន់ណា ផ្លូវព្រះស៊ីសុវត្តិ ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីបុរសបើករឺុម៉កម៉ូតូបានឱ្យដឹងថា មុនពេលកើតហេតុគឺគាត់បានបើករឺុម៉កម៉ូតូតាមផ្លូវព្រះស៊ីវត្តិ ក្នុងល្បឿនលឿន ក្នុងទិសដៅពីជើងទៅ ត្បូង ស្របពេលជាមួយគ្នានោះដែរ ក៏មានរថយន្តស៊េរីទំនើបមួយគ្រឿង ពាក់ស្លាកលេខភ្នំពេញ 2Y-6197 បើកបរដោយបុរសម្នាក់តាមផ្លូវព្រះស៊ីសុវត្តិក្នុងទិសដៅ ពីត្បូងទៅជើងខណៈមកដល់ចំណុចកើតហេតុ រថយន្តស៊េរីទំនើបនោះបានបើកបត់ឆ្លងផ្លូវ ពេលនោះរឺុម៉កម៉ូតូគាត់បានមកដល់វ៉ាក់អឺ គ្នានិងចាប់ហ្រ្វាំងមិនទាន់ក៏បានជ្រុលទៅបុកចំកញ្ចក់រថយន្តស៊េរីទំនើបនោះបណ្តាលឱ្យបាក់កញ្ចក់អស់មួយចំហៀង ប៉ុន្តែមិនបណ្តាលឱ្យមានអ្នករងរបួសទេ ។ ភ្លាមៗបុរសម្ចាស់រថយន្តបានហៅអង្គរក្សរបស់ខ្លួនប្រហែលជិត១០នាក់ មកកន្លែងកើតហេតុ ហើយក្រុមអង្គរក្សបានចាប់ក្របួច ក.អាវ របស់គាត់ទាញឱ្យទៅមើលកញ្ចក់រថយន្តដែលបាក់បង្កការភ្ញាក់ផ្អើលទាំងយប់ ។
អ្នកយកព័ត៌មានបានសុំធ្វើការសាកសួរព័ត៌មានពីភាគីខាងរថយន្តដើម្បីចង់បានព័ត៌មានទាំងសងខាងតែម្ចាស់រថយន្តមិនបានសហការផ្តល់ព័ត៌មាននោះទ។
យ៉ាងណាក៏ដោយនៅក្រោយពេលកើតហេតុសមត្ថកិច្ចបានចុះមកពិនិត្យនៅកន្លែងកើតហេតុ និងបានយកទាំងរថយន្ត និងរឺុម៉កម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយតាមនិតិវិធីច្បាប់ ។
ចែករំលែកព័តមាននេះ