រាជធានីភ្នំពេញ ៖ បុរសម្នាក់បានរងរបួសធ្ងន់សន្លប់នៅនឹងកន្លែងកើតហេតុ ខណៈជិះម៉ូតូតាមផ្លូវត្រូវរថយន្តបើកមកបុកចំពីមុខពេញទំហឹង ។ ហេតុការណ៍គ្រោះថ្នាក់ចរាចរណ៍នេះកើតឡើងកាលណីវេលាម៉ោង ៩ យប់ ថ្ងៃទី១៥ កញ្ញា ២០១៤ នៅចំណុចមុខភោជនីយដ្ឋានវិចិត្រ៥ តាមបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តម៉ាកហ៊ីយ៉ាន់ដាយ ពណ៌ទឹកប្រាក់ មួួយគ្រឿង ពាក់ស្លាកលេខភ្នំពេញ3B-1253 បើកបរដោយបុរសម្នាក់យ៉ាងលឿនតាមផ្លូវ១៩៨៦ ក្នុងទិសដៅពីកើតទៅលិច ខណៈមកដល់ចំណុចកើតហេតុ រថយន្តបានបើកហៀរចូលផ្លូវម៉ូតូម៉ាកសង់ស៊េរី៩៨ ពណ៌ខ្មៅមួយគ្រឿង ពាក់ស្លាកលេខ ខ.០០១៤ ក.ច១ ដែលបើកដោយបុរសម្នាក់ក្នុងទិសដៅបញ្រ្ចាសគ្នា ហើយរថយន្តក៏បានបុកម៉ូតូចំពីមុខពេញទំហឹងរួចកិនពីលើម៉ូតូ បណ្តាលឱ្យបុរសជិះម៉ូតូរងរបួសធ្ងន់សន្លប់នៅនឹងកន្លែងចំណែកម៉ូតូខូចខាតមួយកំណាត់មុខ ។បន្ទាប់ពីបើករថយន្តបុកនិងកិនម៉ូតូជនរងគ្រោះហើយ តៃកុងរថយន្តបានបើកទ្វាររថយន្តចុះរត់គេចខ្លួនបាត់ស្រមោលតែម្តង ។
ក្រោយពេលកើតហេតុសមត្ថកិច្ចបានបញ្ជូនជនរងគ្រោះទៅសង្រ្គោះនៅមន្ទីរពេទ្យ ចំណែករថយន្តបង្កនិងម៉ូតូរបស់ជនរងគ្រោះត្រូវសមត្ថកិច្ចយកទៅរក្សានៅអធិការដ្ឋានខណ្ឌសែនសុខដើម្បីដោះស្រាយគ្នាជាក្រោយតាមផ្លូវច្បាប់ ។
ចែករំលែកព័តមាននេះ