លោកស៊ីវ ស៊ីចាន់ អតីតឯកអគ្គរដ្ឋទូត សហរដ្ឋអាមេរិកប្រចាំអង្គការសហប្រជាជាតិ ត្រូវបានសាលាដំបូងរាជធានីភ្នំពេញកោះហៅឱ្យចូលបំភ្លឺកាលពីខែមុននឹងតម្រូវឱ្យស្នាក់នៅក្នុងប្រទេសកម្ពុជា រួមនឹងដៃគូពាណិជ្ជកម្មរបស់លោក៣នាក់ផ្សេងទៀតដែលមានជាប់ពាក់ព័ន្ធនឹងករណីឆបោកប្រាក់ពីលោកស្រីវេជ្ជបណ្ឌិតអេង លីគង់ (Eng Lykuong) ម្ចាស់គ្លីនិកព្យាបាលធ្មេញMaster Care ចំនួន១លានដុល្លាអាមេរិក ។
នៅក្នុងពាក្យបណ្តឹងនោះលោកស្រីបាននិយាយថា កាលពីឆ្នាំ២០១២ លោក ស៊ីវ ស៊ីចាន់ ព្រមទាំងដៃគូពាណិជ្ជកម្មរបស់គាត់បីរូបទៀតគឺលោក San Richer ,លោក Williams Nojay និងលោក Thomas Willems បានមកបញ្ចុះបញ្ចូលឱ្យលោកស្រីធ្វើវិនិយោគទុនខ្នាតធំផ្នែកកសិកម្មគឺក្រុមហ៊ុន Akra Agriculture Partners ដោយចំណាយដើមទុន១លានដុល្លារអាមេរិក ហើយលោកស្រីក៏បានយល់ព្រម ក៏ប៉ុន្តែចាប់តាំងពីពេលនោះមកការវិនិយោគមួយនេះមិនដំណើរការរហូតមកដល់បច្ចុប្បន្ន ។
ព្រះរាជអាជ្ញារងអមសាសាដំបូងរាជធានីភ្នំពេញ គឺលោកស្រីប៊ុន្នីញ បានកោះហៅលោកសីុចាន់ និងសហសេវិករបស់លោកចំនួន៣នាក់ផ្សេងទៀតគឺលោក San Richer លោក Williams Nojay សមាជិកសភារដ្ឋញូវយ៉ក និងលោក Thomas Willems អតីតនាយកមូនិធិគាំទ្រប្រព័ន្ធអប់រំអន្តរជាតិកម្ពុជា ឱ្យចូលបំភ្លឺតាមពាក្យបណ្តឹងរបស់ជនរងគ្រោះកាលពីថ្ងៃទី៧ ខែកក្កដា ឆ្នាំ ២០១៤ ជុំវិញករណីឆបោកប្រាក់១លានដុល្លាអាមេរិកនោះ ។
លោកខៀវ សុភ័ក្ត្រ អ្នកនាំពាក្យរបស់ក្រសួងមហាផ្ទៃអះអាងថា ក្រសួងបានអនុវត្តតាមដីការបស់តុលាការក្នុងការឃ្លាំមើលជនជាប់ចោទទាំង៤រូបនោះ ក៏ប៉ុន្តែលោក ស៊ីវ ស៊ីចាន់ និងលោក Thomas Willems បានចាកចេញពីប្រទេសមុនពេលដីការបស់តុលាការកោះហៅ ។ ចំណែកលោក San Richer និងលោក Williams Nojay មិនព្រមបង្ហាញខ្លួនក្នុងតុលាការទេ ខណៈពួកគេកំពុងស្ថិតក្នុងសហរដ្ឋអាមេរិក ។ លោក ខៀវ សុភ័ក្ត្រ និយាយថា យើងពិតជាពិបាកធ្វើការណាស់ព្រោះលោក ស៊ីវ ស៊ីចាន់ ជាជនជាតិអាមេរិក និងរស់នៅក្នុងប្រទេសកំណើត តែបើលោកជាជនជាតិកម្ពុជានោះយើងនឹងប្រើប្រាស់នីតិវិធីច្បាប់ទៅលើរូបគាត់ ។
ការវិនិយោគខ្នាតធំនេះលោកស្រីលីគួង បានចំណាយដើមទុន១លានដុល្លារដើម្បីបង្កើតហេដ្ឋារចនាសម្ព័ន្ធក្រុមហ៊ុនកាលពីចុងឆ្នាំ២០១២ និងដើមឆ្នាំ ២០១៣ ជាមួយនឹងដើមទុនសរុប៤លានដុល្លាអាមេរិក ។ ជាមួយនឹងដើមទុនដ៏ធំនេះលោកស្រីរំពឹងថា លោកស្រីនឹងបានតំណែងជាក្រុមប្រឹក្សានាយក តែអ្វីៗដែលលោកស្រីបានគិតនោះគឺត្រូវបាត់បង់ក្រោមដៃជនឆបោកទាំងនោះទៅវិញ ។ លោកស្រីបាននិយាយទាំងងឿងឆ្ងល់ថា ក្រុមហ៊ុនមួយនេះព្យាយាមបញ្ចុះបញ្ចូលលោកស្រីឱ្យផ្ញើលុយដើម្បីដំណើរការអង្គប្រជុំរបស់ថ្នាក់ដឹកនាំក្រុមហ៊ុន ផ្ទុយទៅវិញនេះជាគម្រោងបោកប្រាស់ ។ ក្រោយមកលោកស្រីស៊ើបដឹងថាក្រុមហ៊ុនមួយនេះមិនបានចុះកិច្ចសហប្រតិបត្តិការ និងទទួលស្គាល់ដោយសហព័ន្ធនាំអង្ករចេញទៅក្រៅប្រទេសទេ ។
លោកស្រីអេង លីគួង ឱ្យដឹងទៀតថា ចាប់តាំងពីការវិនិយោគនេះបរាជ័យ លោកស្រីបានចំណាយប្រាក់អស់៦ម៉ឺនដុល្លារអាមេរិកលើសំណុំរឿងនេះ រួមបញ្ចូលទាំងការរកមេធាវីអាមេរិក សិង្ហបុរី និងមេធាវីកម្ពុជា ឱ្យជួយដោះស្រាយរឿងក្តីមួយនេះ ។ លោកស្រីនិយាយថា ខ្ញុំដាក់ពាក្យបណ្តឹងនេះដើម្បីឱ្យជនបោកប្រាស់ទាំងនោះប្រឈមមុខនឹងច្បាប់ និងត្រូវសងសំណងជាទឹកប្រាក់ប្រមាណជា២០០.០០០ដុល្លារអាមេរិកដល់ខ្ញុំ ។ ទោះបីជាមានការកោះហៅពីតុលាការកម្ពុជា តាមសារអេឡិចត្រូនិកជាច្រើនលើកច្រើនសារក៏ដោយក៏លោក ស៊ីវ សីុចាន់ និងលោក Ing Kereya មេធាវីរបស់លោក Willems Nojay ព្រមទាំងលោក San Richer បដិសេធន៍សុំមិនធ្វើអត្ថាធិប្បាយអ្វីទាំងអស់ ។
ក្រុមហ៊ុនមួយក្នុងចំណោមក្រុមហ៊ុនដែលពួកគេមិនបានសហការជាមួយនោះគឺ ក្រុមហ៊ុននាំចូលនិងនាំចេញអង្ករសុខ កែវ ។ លោក El Roisat អ្នកគ្រប់គ្រងផ្នែកទីផ្សាប្រចាំក្រុមហ៊ុនសុខ កែវ និយាយថា គាត់បានជួបជាមួយអ្នកតំណាងក្រុមហ៊ុនAkra កាលពីឆ្នាំ២០១៣ហើយចាប់ពីពេលនេះគាត់ចាប់ផ្ដើមមានការសង្ស័យ ។ ពួកគេអះអាងថា ក្រុមហ៊ុនរបស់ពួកគេបានចុះក្នុងបញ្ជី និងទទួលស្គាល់ដោយសហរដ្ឋអាមេរិក តែពេលដែលខ្ញុំចាប់ផ្តើមវាយឈ្មោះក្រុមហ៊ុនរបស់ពួកគេក្នុងគេហទំព័រស្រាវជ្រាវគឺមិនមានទិន្នន័យឬភស្ថុតាងដែលបរិយាយពីក្រុមហ៊ុនរបស់ពួកគេទេ ។ លោក El Roisat បន្ថែមថា ពួកគេបានព្រមព្រៀងថា ទិញអង្ករក្នុងតម្លៃ៩០០ដុល្លារអាមេរិកក្នុង១តោន តែនឹងទទួលបានផលចំណេញច្រើនជាងនេះបើសិនជាពួកគេទិញអង្ករក្នុងតម្លៃ១.៦០០ដុល្លារអាមេរិកក្នុង១តោន ។
លោក គឹម សាវុធ នាយកសហព័ន្ធនាំចេញអង្កក្រៅប្រទេសនិយាយថា ក្រុមហ៊ុនកសិកម្ម Akra ធ្លាប់មានទំនាក់ទំនងជាមួយលោកកាលពី២ទៅ៣ឆ្នាំមុន ហើយរូបលោកក៏បានសហការជាមួយក្រុមហ៊ុនមួយនេះដោយផ្អែកលើការវិនិយោគទ្រង់ទ្រាយធំ ក៏ប៉ុន្តែក្ដីសង្ឃឹមរបស់លោកត្រូវរលាយ ។ ចំណែកឯអ្នកនាំពាក្យរាជរដ្ឋាភិបាលកម្ពុជាលោក ផៃ ស៊ីផាន អ្នកជាប់ពាក់ព័ន្ធរវាងភាគីដើមបណ្តឹង និងក្រុមហ៊ុន Akra Partner បដិសេធន៍មិនអត្ថាធិប្បាយក្នុងសុំណុំរឿងមួយនេះទេ ។ លោក ស៊ីវ ស៊ីចាន់ គឺជាជនជាតិខ្មែរ-សញ្ជាតិអាមេរិកអតីតឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ ទទួលបន្ទុកផ្នែកសេដ្ឋកិច្ច និងក្រុមប្រឹក្សាជាតិ ក្នុងឆ្នាំ២០០១ដល់២០០៦ ។ ក្រៅពីមុខតំណែងខាងលើនេះលោកជាអ្នកនិពន្ធជំនាន់ថ្មី ទើបតែបញ្ចប់រឿង ឆ្អឹងមាស (Golden Bones) ដែលរៀបរ៉ាប់ពីការរស់រានមានជីវិតក្នុងរបបខ្មែរក្រហម ។
ក្នុងឆ្នាំ២០១២ រូបលោកធ្វើមាតុភូមិនិវត្តមកកាន់ប្រទេសកម្ពុជាដើម្បីផ្សព្វផ្សាយពីអាជីវកម្មដោយយកឈ្មោះក្រុមហ៊ុន Akra ដែលទទួលស្គាល់ក្នុងសហរដ្ឋអាមេរិក ជាយុទ្ធសាស្ត្រទីផ្សារវិនិយោគវិស័យកសិកម្មក្នុងប្រទេសកម្ពុជា ៕
ចែករំលែកព័តមាននេះ