រាជធានីភ្នំពេញ ៖ បុរសម្នាក់បានស្លាប់នៅនឹងកន្លែងកើតហេតុបន្ទាប់ពីជិះម៉ូតូទៅបុកពីក្រោយរថយន្តកុងតឺន័រអស់ប្រេងឈប់កណ្តាលផ្លូវ ដោយគ្មានដាក់សញ្ញាសម្គាល់ ។ ហេតុការណ៍នេះកើតឡើងកាលពីវេលាម៉ោង១និង៣០នាទីរំលងអាធ្រាត្រ ឈានចូលថ្ងៃទី ២៩ សីហា ២០១៤ នៅចំណុចមុខវិទ្យាល័យពងទឹក តាមបណ្តោយផ្លូវជាតិលេខ៣ ស្ថិតក្នុងភូមិវត្តស្លែង សង្កាត់ពងទឹក ខណ្ឌដង្កោ ។
ជនរងគ្រោះមានឈ្មោះ កែវ វុត្ថា ភេទប្រុស អាយុ២៤ឆ្នាំ មុខរបរបើករថយន្តដឹកដីនៅខេត្តព្រះសីហនុ មានស្រុកកំណើតនៅភូមិគង នយ សង្កាត់គងនយ ខណ្ឌដង្កោ ។
ប្រភពព័ត៌មានបានឱ្យដឹងថានៅមុនពេលកើតហេតុ ជនរងគ្រោះបានជិះម៉ូតូហុងដាឌ្រីម សេ១២៥ ពណ៌ខ្មៅមួយគ្រឿងពាក់ស្លាកលេខភ្នំពេញ 1BJ-3787 ដោយធ្វើដំណើរក្នុងទិសដៅពីត្បូងទៅជើង តាមផ្លូវជាតិលេខ៣ខណៈមកដល់ចំណុចកើតហេតុក៏បានជិះទៅបុកពីក្រោយរថយន្តកុងតឺន័រមួយគ្រឿង ពណ៌ទឹកប្រាក់ លាយក្រហម របស់ក្រុម ហ៊ុនផែស្ងួតអូល័រវើលវ៉ាយ ដែលអស់ប្រេងឈប់លើផ្លូវដោយគ្មានដាក់ស្លាកសញ្ញាសម្គាល់ បណ្តាលឱ្យបុរសបើកម៉ូតូស្លាប់នៅនឹងកន្លែងកើតហេតុ ។ ពេលកើតហេតុភ្លាមៗមិនមានអ្នកណាដឹងនោះទេហើយតៃកុងរថយន្តកុងតឺន័របានរត់គេចខ្លួន ពេលនោះផងដែរមេការនៅក្រុម ហ៊ុនផែស្ងួតអូល័រវើលវ៉ាយ បានបញ្ជាឱ្យតៃកុងរថយន្តមួយទៀតឈ្មោះ ផាត សំអាត អាយុ៣៤ឆ្នាំ ទៅបើកយករថយន្តពីកន្លែងកើតហេតុមកទុក ស្របពេលនោះដែរក៏មានប៉ូលិសពងទឹកបានចេញល្បាតក៏ប្រទះឃើញក៏ធ្វើការឃាត់ខ្លួនឈ្មោះផាតសំអាតនោះ ។ ដោយឡែកនៅវេលារំលងអាធ្រាត្រ ថ្ងៃដដែលនោះផងដែរប៉ូលិសប៉ុស្តិ៍ព្រៃស ក៏បានធ្វើការឃាត់ខ្លួនបុរសម្នាក់ឈ្មោះ ហុង ណាំសំណាង អាយុ២៤ឆ្នាំ មានស្រុកកំណើតនៅភូមិប៉ក់វ៉ាន់ ឃុំពោធិ៍ចិន្តា ស្រុកត្រាំកក់ ខេត្តតាកែវពេលកំពុងដើរដោះស្បែកជើង ដោយសង្ស័យជាប់ពាក់ព័ន្ធនិងករណីគ្រោះថ្នាក់ចរាចរណ៍ខាងលើ ។ បន្ទាប់ពីប៉ូលិសប៉ុស្តិ៍ព្រៃស ឃាត់ខ្លួនបុរសខាងលើរួចមកក៏បានឆែកឆេររកឃើញបុងសម្រាប់បើករថយន្តចេញចូលទៅក្នុងក្រុម ហ៊ុនផែស្ងួតអូល័រវើលវ៉ាយ តែមេការនៅក្រុម ហ៊ុនផែស្ងួតអូល័រវើលវ៉ាយមិនទទួលស្គាលថាជាតៃកុងរថយន្តរបស់ក្រុមហ៊ុនខ្លួននោះទេ ។
ក្រោយពេលកើតហេតុ សមត្ថកិច្ចបានបញ្ជូនខ្លួនជនសង្ស័យដែលជាប់ពាក់ព័ន្ធរួមជាមួយម៉ូតូជនរងគ្រោះនិងរថយន្តកុងតឺន័រ ទៅកាន់ការរិយាល័យចរាចរនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាតាមនិតិវិធីច្បាប់ ។
ចែករំលែកព័តមាននេះ