រាជធានីភ្នំពេញ ៖ យុវជនស្រវឹងស្រាជោកជាំម្នាក់បានបើករថយន្តកូរ៉ូឡាមួយគ្រឿងគេចរថយន្តមួយគ្រឿងទៀតក៏បានជ្រុលទៅបុកទម្លុះរបងដីឡូត៍ផ្ទះអ្នកគ្រូបង្រៀនម្នាក់បណ្តាលឱ្យរថយន្តវិលមួយជុំ រងរបួសធ្ងន់ស្រាលទាំងអ្នកបើករថយន្តនិងមនុស្សប្រុស-ស្រី៣នាក់ ទៀតដែលរួមដំណើរជាមួយក្នុងរថយន្តនោះ ចំណែករថយន្ត
រាជធានីភ្នំពេញ ៖ យុវជនស្រវឹងស្រាជោកជាំម្នាក់បានបើករថយន្តកូរ៉ូឡាមួយគ្រឿងគេចរថយន្តមួយគ្រឿងទៀតក៏បានជ្រុលទៅបុកទម្លុះរបងដីឡូត៍ផ្ទះអ្នកគ្រូបង្រៀនម្នាក់បណ្តាលឱ្យរថយន្តវិលមួយជុំ រងរបួសធ្ងន់ស្រាលទាំងអ្នកបើករថយន្តនិងមនុស្សប្រុស-ស្រី៣នាក់ ទៀតដែលរួមដំណើរជាមួយក្នុងរថយន្តនោះ ចំណែករថយន្តរងការខូចខាតមួយកំណាត់មុខទាំងស្រុង ។ ហេតុការណ៍នេះកើតឡើងកាលពីវេលាម៉ោង១០ និង៣០នាទីយប់ ថ្ងៃទី ២៧ សីហា ២០១៤ នៅចំណុចដីឡូត៍មួយកន្លែង ជាប់នឹងផ្លូវបេតុងដីថ្មី ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
បើតាមប្រភពព័ត៌មានពីយុវជនឈ្មោះ ពន្លឺ វិរៈឧត្ថម ភេទប្រុស អាយុ១៩ឆ្នាំ ជាអ្នកបើករថយន្តបង្ក រស់នៅក្នុងសង្កាត់ទួលសង្កែ ខណ្ឌឬស្សីកែវ បានប្រាប់អ្នកយកព័ត៌មានឱ្យដឹងថា មុនពេលកើតហេតុរូបគេបានទៅផឹកស៊ីនៅក្នុងហាងមួយម្តុំពោធិ៍ចិនតុង ជាមួយបងប្អូន៣នាក់ទៀត ពេលបញ្ចប់ការផឹកស៊ីហើយនោះរូបគេរួមជាមួយនិង បងប្អូន៣នាក់ទៀត (ប្រុស២នាក់-ស្រីម្នាក់) បានឡើងលើរថយន្តដើម្បីជិះត្រឡប់ទៅផ្ទះវិញដោយធ្វើដំណើរតាមផ្លូវបេតុងដីថ្មី ក្នុងទិសដៅ ពីលិចទៅកើតខណៈមកដល់ចំណុចកើតហេតុក៏បានវ៉ាក់ជាមួយរថយន្តមួយគ្រឿងទៀត ពេលនោះរូបគេបានប្រឹងទាញចង្កូត កុំឱ្យប៉ះគ្នា បែជាជ្រុលចង្កូតទៅបុកទម្លុះរបងដីឡូត៍ផ្ទះអ្នកគ្រូបង្រៀន នៅសាលាបឋមសិក្សាសន្តិភាព ឈ្មោះអ៊ុក ម៉ារី អាយុ៥១ឆ្នាំ បណ្តាលឱ្យរបងរងការបាក់បែក ចំណែករថយន្តបានវិលមួយជុំខូចខាតមួយកំណាត់មុខទាំងស្រុង និងបណ្តាលឱ្យ រងរបួសនារីម្នាក់ធ្ងន់ និងបុរសបីនាក់ទៀតរងរបួសស្រាល។
ដោយឡែកបើតាមស្រ្តីជាម្ចាស់របងដីឡូត៍ខាងលើបានឱ្យដឹងថា ពេលកើតហេតុគឺគាត់កំពុងសម្រាន្តលង់លក់ក្នុងផ្ទះស្រាប់តែឮសូសម្លេងផាំង ហើយគាត់ក៏បានចេញមកមើល ទើបដឹងថាមានរថយន្តបុករងផ្ទះរបស់គាត់ ។ ពេលនោះគេឃើញក្រុមគ្រួសាររបស់ជនរងគ្រោះបានមកដល់កន្លែងកើតហេតុ ហើយស្រ្តីម្ចាស់របងដែលរងការខូចខាតបានទាមទារសំណងចំនួន៣០០ដុល្លារ ដើម្បីធ្វើការជួសជុលរបងឡើងវិញ ហើយក្រុមគ្រួសារជនរងគ្រោះក៏យល់ព្រមសងសំណងចំនួន៣០០ដុល្លារទៅម្ចាស់របង។
ក្រោយពេលកើតហេតុជនរងគ្រោះទាំង៤នាក់ត្រូវក្រុមគ្រួសារបញ្ជូនទៅសង្រ្គោះនៅមន្ទីរពេទ្យនិងបានហៅរថយន្តស្ទូចមកស្ទូចយករថយន្តបង្កទៅធ្វើការជួសជុលព្រោះបានដោះស្រាយសំណងជាមួយម្ចាស់របងនៅនិងកន្លែងកើតហេតុចប់អស់ហើយ ។
ចែករំលែកព័តមាននេះ