រាជធានីភ្នំពេញ ៖ យុវជន២នាក់ស្រវឹងស្រាជោកជាំបានបើកម៉ូតូយ៉ាងលឿនទៅបុកចំចំហៀងខាងក្រោយរថយន្តតាក់ស៊ី ក្រុមហ៊ុនឆយ វីអាយភី កំពុងបើកចេញពីអាកាសយានដ្ឋានភ្នំពេញអន្តរជាតិបណ្តាលឱ្យយុវជនទាំង២នាក់របួសបែកមុខបែកមាត់ ។ ហេតុការណ៍ខាងលើនេះកើតឡើងកាលពីវេលាម៉ោង ៩និង៣០នាទីយប់ ថ្ងៃទី២០ សីហា ២០១៤ នៅចំណុចមុខច្រកចូលអាកាសយានដ្ឋានភ្នំពេញអន្តរជាតិ តាមបណ្តោយមហាវិថីសហព័ន្ធរុស្ស៊ី ស្ថិតនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូហុងដាឌ្រីម សេ១២៥ ពណ៌ខ្មៅ មួយគ្រឿង ពាក់ស្លាកលេខភ្នំពេញ BI-2052 ជិះដោយយុវជនស្រវឹងស្រាជោកជាំពីរនាក់បានធ្វើ ដំ ណើរតាមមហាវិថី សហព័ន្ធរុស្ស៊ី ក្នុងទិសដៅពីលិចទៅកើតមកដល់ចំណុចកើតហេតុក៏បានជិះទៅបុកគូថក្រោយចំហៀងខាងឆ្វេង រថយន្តតាក់ស៊ីក្រុមហ៊ុន ឆយ វីអាយភី ពណ៌ខ្មៅពាក់ស្លាកលេខ AP14 2.0509 បើកបរដោយបុរសម្នាក់ធ្វើដំណើរចេញពីអាកាសយានដ្ឋានភ្នំពេញអន្តរជាតិ បណ្តាលឱ្យយុវជនជិះម៉ូតូទាំងពីរនាក់របួសបែកមុខបែកមាត់ ។
ក្រោយពេលកើតហេតុភាគីទាំងពីរបានធ្វើការសម្រួលគ្នានៅនឹងកន្លែងតែមិនត្រូវគ្នា ក៏ត្រូវសមត្ថកិច្ចយកទាំងរថយន្តនិងម៉ូតូមកកាន់អធិការដ្ឋានខណ្ឌពោធិ៍សែនជ័យដើម្បីដោះស្រាយគ្នាតាមនិតិវិធីច្បាប់ ។
ចែករំលែកព័តមាននេះ