រាជធានីភ្នំពេញ ៖ បេក្ខជនជាប់ឆ្នោតជាតំណាងរាស្ត្រ និងសកម្មជនគណបក្សសង្គ្រោះជាតិចំនួន៨នាក់ ដែលត្រូវបានអាជ្ញាធរឃាត់ខ្លួនក្នុងពេលកើតមានអំពើហិង្សានៅទីលានប្រជាធិបតេយ្យ កាលពីពេលថ្មីៗកន្លងមក និងបញ្ជូនទៅដាក់នៅពន្ធនាគារព្រៃស ពេលនេះត្រូវបានអាជ្ញាធរដោះលែងឱ្យមានសេរីភាពវិញហើយ បន្ទាប់ពីបានជាប់ឃុំនៅទីនោះអស់រយៈពេល១សប្តាហ៍គត់ ។
ការដោះលែងនោះបានធ្វើឡើង កាលពីវេលាម៉ោង៤និង៤០នាទីរសៀល ថ្ងៃទី២២ ខែកក្កដា ឆ្នាំ២០១៤ ក្រោមតំណក់ទឹកភ្លៀងធ្លាក់ជោកជាំដូចជួយប្រោះព្រំ ដោយមានអ្នកគាំទ្រទៅទទួលមានចំនួនច្រើនរយនាក់ ។ អ្នកដែលទៅទទួលនោះត្រូវបានគេសង្កេតឃើញមានដូចជា លោក យិន ថារ៉ូ លោក ជា ប៉ូច និងលោក ដាំ សិទ្ធ ជាដើម ដែលជាតំណាងរាស្ត្រជាប់ឆ្នោតរបស់គណបក្សសង្គ្រោះជាតិ ។ បេក្ខជនតំណាងរាស្ត្រ ដែលត្រូវអាជ្ញាធរដោះលែងនោះរួមមាន ១-លោក ហូ វា៉ន់ ២-លោក រៀល ខេមរិន្ទ ៣-លោក ម៉ែន សុថាវរិន្ទ ៤-លោក កែ ភិរម្យ ៥-លោក ឡុង រី ៦-លោក នុត រំដួល និង៧-លោក អឿ ណារិទ្ធ ជាសកម្មជនរបស់គណបក្ស ។
អ្នកទាំង៧នាក់នេះ ត្រូវបានដោះលែងចេញតាមច្រកមណ្ឌលកែប្រែ ម១ ។ ចំណែកទី៨ លោកស្រី មូរ សុខហួរ ជាបេក្ខជនតំណាងរាស្រ្ដត្រូវបានដោះលែងតាមច្រកមណ្ឌលកែប្រែ ម២ នៃពន្ធនាគារព្រៃស ហើយម្នាក់ៗបានទទួលកម្រងផ្កាពាក់គ្រប់គ្នា ជាការស្វាគមន៍ និងអបអរសាទរ ។
អ្នកគាំទ្រដែលទៅទទួល បានប្រើពាក្យផ្សេងៗ ដូចជាយុត្ដិធម៌ត្រូវតែឈ្នះជាដើម ។ មិនតែប៉ុណ្ណោះ ការដោះលែងនោះបានធ្វើឡើងនៅក្រោមមេឃភ្លៀងរលឹម គ្មានអ្នកណាខ្លាចទទឹកទេ ។ ចំណែកសមត្ថកិច្ចបានទៅការពារសន្ដិសុខសុវត្ថិភាពនៅទីនោះ ។
ក្រោយពេលចាកចេញដល់ខាងក្រៅមាត់ច្រកទ្វារមណ្ឌលកែប្រែ ម២ លោកស្រី មូរ សុខហួរ បានថ្លែងថា លោកស្រីមានការត្រេកអរខ្លាំងណាស់ដែលត្រូវបានអាជ្ញាធរដោះលែងរូបលោកស្រី និងបេក្ខជនតំណាងរាស្រ្ដ ព្រមទាំងសកម្មជនដទៃទៀតដែលត្រូវជាប់ឃុំឱ្យមានសេរីភាពវិញ ស្ថិតក្រោមក្រសែភ្នែកអ្នកគាំទ្រជាច្រើននាក់បែបនេះ ។ លោកស្រី មូរ សុខហួរ បានបន្ដថា «ការចរចារវាងគណបក្សប្រជាជននិងគណបក្សសង្គ្រោះជាតិ កាលពីព្រឹកថ្ងៃទី២២ កក្កដា បានបញ្ជាក់ឱ្យឃើញថា ជាការត្រូវរ៉ូវគ្នាដើម្បីប្រទេសជាតិ និងប្រជាពលរដ្ឋ ហើយលោកស្រីមានការត្រេកអរខ្លាំងដែលតំណាងរាស្រ្ដទាំងអស់មានសេរីភាពឡើងវិញ ហើយការសាមគ្គីគ្នាអ្វីៗក៏បានជោគជ័យ» ។
ទាក់ទិននឹងការដោះលែងបេក្ខភាពតំណាងរាស្រ្ដ និងសកម្មជនគណបក្សសង្គ្រោះជាតិខាងលើនេះត្រូវបានអាជ្ញាធរឱ្យដឹងថា ធ្វើឡើងតាមដីកាសម្រេចរបស់លោក កែវ មុនី ចៅក្រមសាលាដំបូងរាជធានីភ្នំពេញឱ្យដោះលែងនៅក្រៅឃុំបណ្តោះអាសន្នទាំង៨នាក់ ៕
ចែករំលែកព័តមាននេះ