រាជធានីភ្នំពេញ ៖ ក្រុមហ៊ុន GS25 ដែលជាម៉ាកយីហោហាងលក់ទំនិញម៉ាតរបស់ប្រទេសកូរ៉េ និងដំណើរការដោយក្រុមហ៊ុន GS Retail បានប្រកាសនៅថ្ងៃនេះថា ក្រុមហ៊ុនកំពុងឈានជើងចូលក្នុងទីផ្សារប្រទេសកម្ពុជា តាមរយៈកិច្ចព្រមព្រៀងសិទ្ធិផ្តាច់មុខមេ (Master Franchise) ជាមួយដៃគូក្នុងស្រុកគឺក្រុមហ៊ុន META Retail ដែលគ្របដណ្តប់លើទូទាំងប្រទេសកម្ពុជា ។ បើតាមសេចក្ដីប្រកាសព័ត៌មានរបស់ក្រុមហ៊ុន GS25 បានឱ្យដឹងថា កិច្ចព្រមព្រៀងនេះត្រូវបានបញ្ចប់ជាស្ថាពរនៅក្នុងខែតុលា ឆ្នាំ ២០២៦ បន្ទាប់ពីមានការសិក្សាវាយតម្លៃយ៉ាងល្អិតល្អន់ និងការពិនិត្យរួមគ្នារយៈពេលមួយឆ្នាំរវាងក្រុមហ៊ុនទាំងពីរ ។

ក្រុមហ៊ុន GS25 បើកសាខាគោលដំបូងរបស់ខ្លួននៅក្នុងរាជធានីភ្នំពេញ នៅថ្ងៃសុក្រ ទី ២០ ខែវិច្ឆិកា ឆ្នាំ ២០២៦ ជាមួយនឹងគោលដៅពង្រីកសាខាឱ្យបាន ៥០០ ហាងនៅទូទាំងប្រទេសត្រឹមឆ្នាំ ២០៣០ ។ ក្រុមហ៊ុនបានចង្អុលបង្ហាញពីការកើនឡើងនៃអំណាចទិញរបស់អ្នកប្រើប្រាស់ និងចំនួនប្រជាជនវ័យក្មេង ថាជាកត្តាជំរុញដ៏សំខាន់នៅពីក្រោយការសម្រេចចិត្តនេះ ។ យោងតាមក្រសួងពាណិជ្ជកម្ម ហាងលក់ទំនិញ Convenience Stores និងមីនីម៉ាត គឺស្ថិតក្នុងចំណោមផ្នែកលក់រាយដែលមានការរីកចម្រើនលឿនបំផុតនៅក្នុងប្រទេស ។
កម្ពុជាមានប្រជាជនជាង ៦០% នៃចំនួនប្រជាជនសរុបមានអាយុក្រោម ៣៥ ឆ្នាំ ហើយអ្នកដែលមានអាយុក្នុងចន្លោះ ២០ ទៅ ៣៩ ឆ្នាំ មានចំនួនលើសពី ៣០% ជាក្រុមអតិថិជននិយមទិញទំនិញនៅតាមហាងលក់ទំនិញងាយស្រួលច្រើនជាងគេ ។ សាខាដំបូងនេះមានទំហំជាង ៣០០ ម៉ែត្រការ៉េ និងមានដាក់លក់ផលិតផលប្រមាណ ៣,០០០ មុខ ។ ផលិតផលទាំងនោះរួមមាន ម៉ាកយីហោផ្ទាល់ខ្លួនរបស់ក្រុមហ៊ុនគឺ YOUUS និង Real Price ក៏ដូចជាម៉ាកគ្រឿងសំអាងកូរ៉េ Son&Park ផងដែរ ។ ជម្រើសអាហារនៅក្នុងហាងនេះរួមមាន កាហ្វេស្រស់ៗ អាហារតាមផ្លូវបែបកូរ៉េ អាហារសម្រន់កូរ៉េដែលមានរូបរាងទាក់ទាញ អាហារដែលរៀបចំរួចជាស្រេចសម្រាប់ទទួលទានភ្លាមៗ និងអាហារវេចខ្ចប់ងាយស្រួលយកទៅតាមខ្លួន ដូចជា សាមកាក់គីមបាប់ (samgak gimbap) គីមបាប់ សាំងវិចបែបកូរ៉េ បាយប្រអប់បែបកូរ៉េ តុកបុកគី (tteokbokki) និងស៊ុបអូមុក (eomuk) ។

ទីតាំងនេះត្រូវបានរចនាឡើងដើម្បីក្លាយជាកន្លែងជួបជុំសង្គមដែលបើកដំណើរការ ២៤ ម៉ោងតែម្តង ដោយរួមបញ្ចូលគ្នាជាមួយនឹងគំនិតនៃ បែបហាងកាហ្វេស៊ីវិល័យ ដែលផ្តោតលើអតិថិជនក្នុងស្រុកដែលជាយុវវ័យជំនាន់ Gen Z និងអ្នកធ្វើការវ័យក្មេង ។ ដោយត្រូវបានរចនាឡើងជាកន្លែងជួបជុំបែបសង្គមដែលបើកបម្រើការ ២៤ ម៉ោងលើ ២៤ ម៉ោង ហាងនេះបានរួមបញ្ចូលគ្នារវាងទម្រង់ហាងលក់រាយបែបប្រពៃណី ជាមួយនឹងគំនិតរចនាបែបហាងកាហ្វេទាន់សម័យ ដែលផ្តោតសំខាន់លើអតិថិជនជំនាន់ Gen Z និងអ្នកធ្វើការវ័យក្មេង ។
ខណៈដែលទីផ្សារហាងលក់ទំនិញងាយស្រួលនៅប្រទេសកូរ៉េកំពុងឈានដល់កម្រិតពេញលេញ ការពង្រីកខ្លួនទៅកាន់ទីផ្សារក្រៅប្រទេសគឺជាជំហានបន្ទាប់ដ៏សមហេតុផលសម្រាប់ក្រុមហ៊ុន GS25 ។ វត្តមានរបស់ម៉ាកយីហោនេះត្រូវបានរំពឹងថានឹងនាំមកនូវបទពិសោធន៍ហាងលក់ទំនិញងាយស្រួលនៅក្នុងប្រទេសកម្ពុជាទៅកាន់កម្រិតថ្មីមួយទៀត ។

អំពីក្រុមហ៊ុន GS Retail
ក្រុមហ៊ុន GS Retail Co., Ltd. គឺជាក្រុមហ៊ុនលក់រាយរបស់ប្រទេសកូរ៉េខាងត្បូង និងជាក្រុមហ៊ុនបុត្រសម្ព័ន្ធរបស់សម្ព័ន្ធក្រុមហ៊ុន GS Group ដែលមានទីស្នាក់ការកណ្តាលនៅអគារ GS Tower ក្នុងសង្កាត់ Gangnam-gu ទីក្រុងសេអ៊ូល។ ក្រុមហ៊ុននេះជាអ្នកដំណើរការហាង GS25 ដែលត្រូវបានរំពឹងថានឹងមានសាខាសរុបប្រមាណ ២០,០០០ ហាងនៅទូទាំងប្រទេសកូរ៉េខាងត្បូងត្រឹមចុងឆ្នាំ២០២៦ ។ GS25 ត្រូវបានគេស្គាល់យ៉ាងច្បាស់តាមរយៈភាពសម្បូរបែបនៃភេសជ្ជៈ រួមមាន ទឹកដោះគោមានរសជាតិ និងភេសជ្ជៈត្រជាក់ៗ ក៏ដូចជាអាហារសម្រន់កូរ៉េ មីកូរ៉េ ប្រហិតត្រី និងគីមបាប់។ ហាងនេះក៏មានផ្តល់ជូននូវផលិតផលម៉ាកយីហោផ្ទាល់ខ្លួនគឺ YOUUS និង Real Price រួមជាមួយនឹងមុខម្ហូបជាច្រើនប្រភេទទៀតផងដែរ ។
អំពីក្រុមហ៊ុន META Retail
ក្រុមហ៊ុន META Retail Co., Ltd. គឺជាអ្នកគ្រប់គ្រងសិទ្ធិផ្តាច់មុខមេរបស់ GS25 នៅក្នុងប្រទេសកម្ពុជា ដោយជំរុញកំណើន និងការពង្រីកខ្លួនរបស់ម៉ាកយីហោនេះនៅក្នុងទីផ្សារក្នុងស្រុក ។ ក្រុមហ៊ុននេះត្រូវបានគាំទ្រដោយសមត្ថភាពដ៏រឹងមាំលើខ្សែច្រវាក់ផ្គត់ផ្គង់ ទីផ្សារ និងការគ្រប់គ្រងទំនាក់ទំនងអតិថិជន (CRM) ប្រតិបត្តិការ ការជ្រើសរើសបុគ្គលិក ការបណ្តុះបណ្តាល និងការរក្សាបុគ្គលិក រួមទាំងមានមជ្ឈមណ្ឌលបណ្តុះបណ្តាលផ្ទាល់ខ្លួនផងដែរ ។ ក្រុមហ៊ុន META Retail គឺជាក្រុមហ៊ុនបុត្រសម្ព័ន្ធរបស់សម្ព័ន្ធក្រុមហ៊ុន META HOLDING ដែលជាសម្ព័ន្ធក្រុមហ៊ុនពហុអាជីវកម្មដ៏សកម្ម និងសម្បូរបែប ដែលមានអាជីវកម្មគ្របដណ្តប់លើការអភិវឌ្ឍអចលនទ្រព្យ ការគ្រប់គ្រងអចលនទ្រព្យ ការលក់រាយ បដិសណ្ឋារកិច្ច ការផលិតចំណីអាហារ និងការគាំទ្រសហគមន៍ ។ ត្រូវបានបង្កើតឡើងក្នុងឆ្នាំ២០១៥ ក្រុមហ៊ុន META HOLDING បានរីកចម្រើនពីអាជីវកម្មអចលនទ្រព្យទៅជាសម្ព័ន្ធក្រុមហ៊ុនដ៏រឹងមាំមួយដែលមានបុគ្គលិកជាង ១,០០០ នាក់ និងមានប្រតិបត្តិការរួមបញ្ចូលគ្នាយ៉ាងពេញលេញ ៕ អត្ថបទសហការ






ចែករំលែកព័តមាននេះ