ADផ្ទាំងផ្សព្វផ្សាយពាណិជ្ជកម្ម

យុវជន​កម្ពុជា​បង្កើត​ប្រវត្តិសាស្ត្រ​ថ្មី​ដោយ​គ្រង​តំណែង​ជើងឯក​ពិភពលោក​ក្នុង​ការ​តស៊ូ​មតិ​នៅ JCI World Congress ឆ្នាំ​២០២៦

3 ថ្ងៃ មុន

រាជធានី​ភ្នំពេញ, ថ្ងៃ​ទី ​១៥ ខែវិច្ឆិកា ឆ្នាំ​ ២០២៦ ៖ យុវជន​កម្ពុជា​ចំនួន ៣ រូប បាន​នាំ​យក​មោទនភាព​ជូន​ជាតិ បន្ទាប់​ពី​បាន​គ្រង​តំណែង​ជា​ម្ចាស់​ជើងឯក​នៃ​ការ​ប្រកួត​តស៊ូ​មតិ​ពិភពលោក ឆ្នាំ​២០២៦ (2026 JCI World Debate Championship) ដែល​បាន​រៀបចំ​ឡើង​ក្នុង​សន្និបាត​ពិភពលោក​របស់ JCI (JCI World Congress) នៅ​ទីក្រុង Clark ប្រទេស​ហ្វី​លី​ពី​ន ​។

ក្រុម​ជ័យ​លា​ភី​តំណាង​ឱ្យ​សភា​យុវ​ពាណិជ្ជករ​អន្តរជាតិ​កម្ពុជា (JCI Cambodia) មក​ពី​សភា​យុវ​ពាណិជ្ជករ​អន្តរជាតិ​កម្ពុជា​សាខា​ចតុមុខ (JCI Chaktomuk) រួម​មាន​៖ កញ្ញា ស្លេៈ រ៉​យ្យ៉ា​ន​, កញ្ញា អ៊ុ​ង ខេមរា​បូរ​មី​ច័ន្ទ និង​លោក ស៊ា​ន ធាន​សឿង បាន​នាំ​មក​នូវ ជ័យជម្នះ និង​ជា​សមិទ្ធផល​ប្រវត្តិសាស្ត្រ​ដំបូង ដ៏​ត្រចះត្រចង់​របស់​ក្រុម​តស៊ូ​មតិ​កម្ពុជា បន្ទាប់​ពី​ពួក​គេ​បាន​ដណ្តើម​បាន​តំណែង​ជើងឯក​ក្នុង​ការ​ប្រកួត​តស៊ូ​មតិ​ប្រចាំ​តំបន់​អាស៊ី​-​ប៉ា​ស៊ី​ហ្វិ​ក ឆ្នាំ​២០២៦ (2026 JCI Asia-Pacific Debate Championship) នៅ​ទីក្រុង Niigata ប្រទេស​ជប៉ុន កាលពី​ខែមិថុនា​កន្លង​ទៅ​។

ពេញ​មួយ​ដំណើរការ​នៃ​មហាសន្និបាត JCI World Congress ដែល​ប្រព្រឹត្ត​ទៅ​ចាប់ពី​ថ្ងៃ​ទី​១១ ដល់​ថ្ងៃ​ទី​១៥ ខែវិច្ឆិកា ឆ្នាំ​២០២៦ ដោយ​មានការ​ចូលរួម​ពី​ថ្នាក់ដឹកនាំ​វ័យក្មេង​មក​ពី​ជាង ១២០ ប្រទេស ក្រុម​តំណាង​កម្ពុជា​ជា​ក្រុម​វ័យក្មេង​បំផុត​ក្នុង​ការ​ប្រកួត ប​ន្តែ​ពួក​គេ​បាន​បង្ហាញ​នូវ​សមត្ថភាព​ជជែក​ដេញដោល​យ៉ាង​មុត​ស្រួច ការ​ត្រិះ​រិះ​ពិចារណា​ស៊ីជម្រៅ ភាព​ក្លាហាន និង​ស្មារតី​ធ្វើ​ការងារ​ជា​ក្រុម​ដ៏​រឹង​មាំ​។ ពួក​គេ​បាន​ឆ្លងកាត់​វគ្គ​ជម្រុះ​ដំបូង វគ្គ​ពាក់កណ្តាល​ផ្តាច់ព្រ័ត្រ និង​បាន​យកឈ្នះ​គូប្រកួត​យ៉ាង​ស្វិតស្វាញ និង​បាន​នាំ​ក្រុម​កម្ពុជា​ឈាន​ទៅ​ដល់​វគ្គ​ផ្តាច់ព្រ័ត្រ​ពិភពលោក ឈាន​ទៅ​ដល់​ការ​នាំ​យក​ពានរង្វាន់​ជើងឯក​ពិភពលោក​មក​ជូន​ជាតិ​មាតុភូមិ​ក្នុង​ប្រវត្តិសាស្ត្រ​ជា​លើក​ដំបូង​!

សមិទ្ធផល​ជាប់​ៗ​គ្នា​ទាំង​ក្នុង​កម្រិត​តំបន់ និង​ពិភពលោក​នេះ មិន​ត្រឹមតែ​ឆ្លុះ​បញ្ចាំង​ពី​ការ​លះបង់ ការ​ត្រៀមខ្លួន​យ៉ាង​ហ្មត់ចត់ និង​ការ​ប្តេជ្ញា​ចិត្ត​ខ្ពស់​របស់​យុវជន​កម្ពុជា​ប៉ុណ្ណោះ​ទេ ប៉ុន្តែ​ថែម​ទាំង​បង្ហាញ​ឱ្យ​ពិភពលោក​ឃើញ​កាន់តែ​ច្បាស់​ពី​សក្តានុពល​របស់​យុវជន​ជំនាន់​ក្រោយ​របស់​កម្ពុជា ក្នុង​ការ​ឈរ​ប្រកួតប្រជែង​ដោយ​ទំនុកចិត្ត​ជាមួយ​បេក្ខជន​ឆ្នើម​ៗ​មក​ពី​ជុំវិញ​សកលលោក​។
យើងខ្ញុំ សូម​សម្តែង​នូវ​ការ​កោតសរសើរ និង​អបអរសាទរ​យ៉ាង​ស្មោះស្ម័គ្រ​ចំពោះ​ក្រុម​ជ័យ​លា​ភី ក្រុម​គ្រួសារ គ្រូបង្វឹក វិទ្យាស្ថាន​ខេ​ម​អេ​ដ CamEd Business School ក៏​ដូច​ជា​ថ្លែងអំណរគុណ​ចំពោះ​ក្រុម​ប្រកួត​មក​ពី​បណ្តា​ប្រទេស​ទាំងអស់​ដែល​បាន​បង្ហាញ​នូវ​ស្មារតី និង​សមត្ថភាព​ដ៏​អស្ចារ្យ ធ្វើ​ឱ្យ​ការ​ប្រកួត​នេះ​ប្រកបដោយ​គុណភាព​ខ្ពស់​។

ជោគជ័យ​នេះ​គឺជា​មោទនភាព​រួម​របស់​ប្រជាជាតិ​កម្ពុជា​ទាំងមូល និង​ជា​កម្លាំងចិត្ត​ដ៏​សំខាន់​សម្រាប់​យុវជន​កម្ពុជា​ដទៃ​ទៀត ក្នុង​ការ​បន្ត​អភិវឌ្ឍ​ជំនាញ​ទំនាក់ទំនង ការ​គិត​បែប​ស៊ីជម្រៅ និង​ភាព​ជា​អ្នកដឹកនាំ ដើម្បី​នាំ​យក​សំឡេង​របស់​កម្ពុជា​ទៅ​កាន់​ឆាក​អន្តរជាតិ​ ៕ អត្ថបទសហការ