ធនាគារ ABA បានចូលរួមក្នុងកញ្ចប់ឥណទានបៃតងរួម (Green Syndicated Loan) ដែលមានទំហំទឹកប្រាក់ 182 លានដុល្លារអាមេរិក ដើម្បីផ្ដល់ហិរញ្ញប្បទានដល់គម្រោងសាងសង់ប្រព័ន្ធស្តុកថាមពលអគ្គិសនី (Battery Energy Storage System – BESS) កម្រិតឧស្សាហកម្មដំបូងបង្អស់នៅកម្ពុជា ដោយ ABA បានផ្តល់ហិរញ្ញប្បទានធំជាងគេក្នុងប្រតិបត្តិការនេះ ។

ការផ្ដល់ហិរញ្ញប្បទាននេះ បង្ហាញពីសមត្ថភាពរបស់ធនាគារ ABA ក្នុងការគាំទ្រគម្រោងហេដ្ឋារចនាសម្ពន្ធខ្នាតធំនានា ដែលរួមចំណែកដល់ការអភិវឌ្ឍសេដ្ឋកិច្ច សន្តិសុខថាមពល និងគោលដៅចីរភាពរបស់កម្ពុជា ។
ពិធីចុះហត្ថលេខាត្រូវបានរៀបចំឡើង ក្រោមវត្តមានដ៏ខ្ពង់ខ្ពស់របស់លោកជំទាវបណ្ឌិត ជា សិរី ទេសាភិបាលនៃធនាគារជាតិនៃកម្ពុជា ដោយមានការចូលរួមពីថ្នាក់ដឹកនាំធនាគារ ABA និងគ្រឹះស្ថានហិរញ្ញវត្ថុនានាដែលបានចូលរួមក្នុងហិរញ្ញប្បទាន
នេះ។ ឥណទានរួមក្នុងទំហំទឹកប្រាក់ 182 លានដុល្លារនេះ ត្រូវបានគាំទ្រដោយគ្រឹះស្ថានផ្តល់ឥណទានចំនួន 7 រួមមាន ធនាគារចិន (ហុងកុង) សាខាភ្នំពេញ ធនាគារចិន (ហុងកុង) ជាសហប្រធានដឹកនាំការរៀបចំហិរញ្ញប្បទាន ធនាគារ ABA និងធនាគារដៃគូចំនួន 4 ផ្សេងទៀតដែលបានចូលរួមក្នុងហិរញ្ញប្បទាននេះ។

គម្រោងនេះ ត្រូវបានអភិវឌ្ឍដោយ SchneiTec Legacy ដែលជាក្រុមហ៊ុនក្នុងសម្ពន្ធ SchneiTec Group ហើយនឹងបង្កើតប្រព័ន្ធស្តុកថាមពលដោយថ្មដែលមានសមត្ថភាពសរុប 1,000 មេហ្គាវ៉ាត់ម៉ោង នៅក្នុងខេត្តពោធិ៍សាត់ និងខេត្តកំពង់ឆ្នាំង។ នៅពេលដំណើរការពេញលេញ គម្រោងនេះត្រូវបានរំពឹងថានឹងជួយពង្រឹងស្ថិរភាពបណ្តាញអគ្គិសនីជាតិ បង្កើនលទ្ធភាពប្រើប្រាស់ថាមពលកកើតឡើងវិញ និងលើកកម្ពស់សន្តិសុខថាមពលរយៈពេលវែងរបស់ព្រះរាជាណាចក្រកម្ពុជា ។
លោក Zhiger Atchabarov អគ្គនាយករងប្រតិបត្តិ, នាយកប្រតិបត្តិការ, និងជានាយករងប្រតិបត្តិរបស់ធនាគារ ABA បានមានប្រសាសន៍ថា “ធនាគារ ABA មានមោទនភាពដែលបានចូលរួមគាំទ្រគម្រោងហេដ្ឋារចនាសម្ពន្ធដ៏សំខាន់នេះ ដែលនឹងរួមចំណែកពង្រឹងសន្តិសុខថាមពល និងការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជា។ ក្នុងនាមជាធនាគារដែលផ្តល់ហិរញ្ញប្បទានធំជាងគេ ក្នុងកញ្ចប់ឥណទានរួមនេះ ការចូលរួមរបស់ធនាគារយើង បានឆ្លុះបញ្ចាំងពីការប្តេជ្ញាចិត្តរបស់ធនាគារ ក្នុងការគាំទ្រហេដ្ឋារចនាសម្ពន្ធជាតិ និងបង្កើតអត្ថប្រយោជន៍យូរអង្វែងសម្រាប់ប្រទេសជាតិ និងប្រជាពលរដ្ឋទូទាំងប្រទេស។

ក្នុងឱកាសនោះដែរ លោកបណ្ឌិត ហេង សុជាតិ អគ្គនាយកប្រតិបត្តិនៃក្រុមហ៊ុន SchneiTec Group បានមានប្រសាសន៍ថាហិរញ្ញប្បទាននេះ គឺជាព្រឹត្តិការណ៍ដ៏សំខាន់មួយ មិនត្រឹមតែសម្រាប់ SchneiTec ប៉ុណ្ណោះទេ ប៉ុន្តែសម្រាប់អនាគតវិស័យថាមពលរបស់កម្ពុជាទាំងមូល ។ ការគាំទ្រយ៉ាងរឹងមាំពីដៃគូធនាគាររបស់យើង បង្ហាញពីទំនុកចិត្តចំពោះភាពរឹងមាំនៃសេដ្ឋកិច្ចកម្ពុជា និងដំណើរផ្លាស់ប្តូរថាមពលរបស់ប្រទេស ខណៈជួយបង្កើតហេដ្ឋារចនាសម្ពន្ធដែលនឹងពង្រឹងស្ថិរភាពបណ្តាញអគ្គិសនី និងគាំទ្រដល់អនាគតដ៏ស្អាត និងប្រកបដោយចីរភាពជាងមុន។
គម្រោងនេះ បង្ហាញកាន់តែច្បាស់ថា ធនាគារ ABA តែងតែត្រៀមខ្លួនជានិច្ច ជាមួយសមត្ថភាពខ្ពស់ ក្នុងការចូលរួមគាំទ្រគម្រោងអភិវឌ្ឍន៍ជាតិខ្នាតធំនានា។ ធនាគារបានត្រៀមខ្លួនរួចជាស្រេច ក្នុងការផ្តល់ការគាំទ្រដល់គម្រោងហេដ្ឋារចនាសម្ពន្ធ និងការវិនិយោគជាយុទ្ធសាស្ត្រសំខាន់ៗ តាមរយៈរចនាសម្ពន្ធហិរញ្ញប្បទានឯកទេស និងឥណទានសាជីវកម្មទំហំធំ លើវិស័យសំខាន់ៗ រួមមាន ថាមពល កសិកម្ម និងហេដ្ឋារចនាសម្ពន្ធ។ តាមរយៈការផ្តល់ហិរញ្ញប្បទានទាំងនេះ ធនាគារ ABA បន្តដើរតួនាទីជាដៃគូហិរញ្ញវត្ថុយូរអង្វែងក្នុងវឌ្ឍនភាពរបស់កម្ពុជា ។

ចែករំលែកព័តមាននេះ