ADផ្ទាំងផ្សព្វផ្សាយពាណិជ្ជកម្ម

ក្រុមហ៊ុន​បច្ចេកវិទ្យា​អវកាស​របស់​បារាំង Thales និង​សាកលវិទ្យាល័យ ខេ​មតិច ចាប់​ដៃគូ​ស្វែងរក​កិច្ច​សហប្រតិបត្តិការ​លើ​ការ​អប់រំ និង​ការ​ស្រាវជ្រាវ​ក្នុង​វិស័យ​អវកាស​នៅ​កម្ពុជា

12 ម៉ោង មុន

រាជធានីភ្នំពេញ, ថ្ងៃ​ទី ២០ ខែវិច្ឆិកា ឆ្នាំ ២០២៦ ៖ ក្រុមហ៊ុន «Thales» មក​ពី​ប្រទេស​បារាំង និង​សាកលវិទ្យាល័យ ខេ​មតិច (CamTech) បាន​ចុះហត្ថលេខា​លើ​អនុស្សរណៈ​នៃ​ការ​យោគយល់​គ្នា (MoU) កាលពី​ថ្ងៃ​ទី ១៦ ខែវិច្ឆិកា ឆ្នាំ ២០២៦ ដើម្បី​ស្វែងរក​កិច្ច​សហប្រតិបត្តិការ​លើ​វិស័យ​អប់រំ និង​ការ​ស្រាវជ្រាវ​ផ្នែក​អវកាស និង​អាកាសចរណ៍ ​។ កិច្ចព្រមព្រៀង​នេះ​ត្រូវ​បាន​ចុះហត្ថលេខា​ដោយ​ឧកញ៉ា​វេជ្ជបណ្ឌិត ពុង ការ៉ូ​លី​ន សមាជិក​ក្រុមប្រឹក្សាភិបាល​នៃ​សាកលវិទ្យាល័យ ខេ​មតិច និង​ជា​អនុប្រធាន​ក្រុមប្រឹក្សាភិបាល​នៃ​ក្រុមហ៊ុន កា​ណា​ឌី​យ៉ា គ្រុប ព្រមទាំង​លោក Nicolas Bernardin នាយក​ប្រចាំ​ប្រទេស​របស់​ក្រុមហ៊ុន Thales ប្រចាំ​នៅ​កម្ពុជា វៀតណាម និង​ឡាវ​ ។

កិច្ច​សហប្រតិបត្តិការ​នេះ​មាន​គោលបំណង​ផ្តល់​ឱកាស​កាន់តែ​ច្រើន​ដល់​និស្សិត និង​អ្នក​ស្រាវជ្រាវ​កម្ពុជា ក្នុង​ការ​សិក្សា​ស្វែង​យល់​អំពី​បច្ចេកវិទ្យា​អវកាស និង​អាកាសចរណ៍ ព្រមទាំង​ទទួល​បាន​ចំណេះដឹង​ជាក់ស្តែង​ពី​អ្នកជំនាញ​ក្នុង​វិស័យ​នេះ​ ។ ពិធី​ចុះហត្ថលេខា​នេះ​បាន​ប្រព្រឹត្ត​ទៅ​ក្រោម​វត្តមាន​របស់ ឯកឧត្តម ស៊ុន ចាន់​ថុ​ល ឧបនាយករដ្ឋមន្ត្រី និង​ជា​អនុប្រធាន​ទី​ ១ នៃ​ក្រុមប្រឹក្សា​អភិវឌ្ឍន៍​កម្ពុជា​, លោក​ជំទាវ ចម និម្មល រដ្ឋមន្ត្រីក្រសួង​ពាណិជ្ជកម្ម​, លោកស្រី Éléonore Caroit រដ្ឋមន្ត្រី​ប្រតិភូ​នៃ​ប្រទេស​បារាំង ទទួល​បន្ទុក​កិច្ចការ​ហ្វ្រ​ង់​កូ​ហ្វូ​នី (Francophonie) ភាព​ជា​ដៃគូ​អន្តរជាតិ និង​ពលរដ្ឋ​បារាំង​ដែល​រស់នៅ​ក្រៅប្រទេស និង​លោក Thierry Tea អនុប្រធាន​ក្រុមហ៊ុន អូ​ស៊ី​អាយ​ស៊ី (OCIC) ព្រមទាំង​ជា​សមាជិក​ក្រុមប្រឹក្សាភិបាល​នៃ​សាកលវិទ្យាល័យ ខេ​មតិច​ ។

កា​រត​ភ្ជាប់​វិស័យ​អប់រំ​ក្នុង​វិស័យ​អវកាស​ជាមួយនឹង​ជំនាញ និង​បទ​ពិសោធន៍
Thales គឺជា​ក្រុម​ក្រុមហ៊ុន​បច្ចេកវិទ្យា​អន្តរជាតិ​មួយ ដែល​មាន​បុគ្គលិក​ជាង ៨៥០០០ នាក់ នៅ​ក្នុង​ចំនួន ៦៥ ប្រទេស ដោយ​ធ្វើ​ប្រតិបត្តិការ​លើ​វិស័យ​អវកាស​, ការពារ​ជាតិ​, សន្តិសុខ​សាយ​ប័​រ (cyber security) និង​បច្ចេកវិទ្យា​ឌី​ជី​ថ​ល ​។ ប្រតិបត្តិការ​ក្នុង​វិស័យ​អាកាសចរណ៍​របស់​ក្រុមហ៊ុន​នេះ រួម​មាន​ប្រព័ន្ធ​ណែនាំ​ផ្លូវ (navigation) ប្រព័ន្ធ​ឃ្លាំមើល និង​ប្រព័ន្ធ​គ្រប់គ្រង​ចរាចរណ៍​ផ្លូវអាកាស​ ។ ក្រុមហ៊ុន​នេះ​មាន​ជំនាញ​ឯកទេស​លើ​ផ្នែក​បញ្ញា​សិប្បនិម្មិត (AI) សម្រាប់​ប្រព័ន្ធ​សំខាន់​ៗ និង​ផ្នែក​សន្តិសុខ​សាយ​ប័​រ ​។ ជា​រៀង​រាល់​ឆ្នាំ ក្រុមហ៊ុន​បាន​ចំណាយ​ថវិកា​ប្រមាណ ៤,៩ ពាន់​លាន​ដុល្លារ​អា​មេ​រិ​ក សម្រាប់​ការ​ស្រាវជ្រាវ និង​អភិវឌ្ឍ​នៅ​ក្នុង​ផ្នែក​ធុរកិច្ច​ផ្សេង​ៗ​របស់​ខ្លួន រួម​ទាំង​បញ្ញា​សិប្បនិម្មិត សន្តិសុខ​សាយ​ប័​រ និង​បច្ចេកវិទ្យា​កង់​ទិច (quantum technologies) ព្រមទាំង​កាន់កាប់​កម្មសិទ្ធិបញ្ញា (​ប៉ាតង់​) ច្រើន​ជាង ២២០០០ ផង​ដែរ ​។

លោក Thierry Tea ដែល​ជា​អ្នក​ផ្តួចផ្តើម​គម្រោង​រវាង ខេ​មតិច និង Thales បាន​ពន្យល់​ពី​មូលហេតុ​ថា​៖ «Thales គឺជា​ក្រុមហ៊ុន​ឈានមុខ​គេ​មួយ​ក្នុង​ពិភពលោក​លើ​វិស័យ​អវកាស និង​អាកាសចរណ៍ ហើយ​បាន​ធ្វើការ​កែសម្រួល និង​បង្កើត​ថ្មី​នូវ​ឧត្តមភាព​នៃ​ស្ថាប័ន​របស់​ខ្លួន​ជា​បន្តបន្ទាប់ ចាប់តាំងពី​ឆ្នាំ ១៨៩៣ មក ​។ ដើម្បី​បណ្តុះបណ្តាល​វិស្វករ​កម្ពុជា​ដ៏​ឆ្នើម​សម្រាប់​ពេល​អនាគត យើង​ត្រូវការ​ដៃគូ​អន្តរជាតិ​ដ៏​ល្អ​បំផុត ដើម្បី​ជួយ​អភិវឌ្ឍ​ខ្លឹមសារ​នៃ​កម្មវិធី​សិក្សា​របស់​យើង ​។ ខ្ញុំ​ផ្ទាល់​បាន​ធ្វើការ​ជាមួយ Thales អស់​រយៈពេល​ជាង ២០ ឆ្នាំ​មក​ហើយ ហើយ​ខ្ញុំ​មាន​មោទនភាព​ដែល​បាន​នាំ​យក Thales មក​កាន់​វិស័យ​អប់រំ​នៅ​កម្ពុជា ដើម្បី​ជួយ​ឱ្យ​កម្មវិធី​សិក្សា​ផ្នែក​វិស្វកម្ម​របស់​យើង​ឈាន​ដល់​ស្តង់ដារ​អន្តរជាតិ» ​។​

យោង​តាម​អនុស្សរណៈ​នៃ​ការ​យោគយល់​គ្នា (MoU) សាកលវិទ្យាល័យ ខេ​មតិច និង​ក្រុមហ៊ុន Thales នឹង​រួម​គ្នា​ស្វែងរក​ឱកាស​សម្រាប់​កិច្ច​សហប្រតិបត្តិការ​ក្នុង​វិស័យ​អវកាស (Aerospace) ព្រមទាំង​វិស័យ​ពាក់ព័ន្ធ​នានា ​។ គោលបំណង​គឺ​ដើម្បី​ជំរុញ​ការ​ផ្លាស់​ប្តូរ​ចំណេះដឹង លើកកម្ពស់​នវានុវត្តន៍ និង​ស្វែងរក​វិស័យ​ដែល​អាច​សហការ​គ្នា​លើ​ផ្នែក​សិក្សា បច្ចេកទេស និង​ឧស្សាហកម្ម​ ។ កិច្ច​សហប្រតិបត្តិការ​ទាំងនេះ​អាច​រួម​មាន ការ​ធ្វើ​ស្រាវជ្រាវ​រួម​គ្នា និង​គំនិត​ផ្តួចផ្តើម​នៃ​ការ​បង្កើត​ថ្មី ការ​ចែករំលែក​ចំណេះដឹង និង​ជំនាញ​វិជ្ជាជីវៈ ការ​ចូលរួម​របស់​និស្សិត និង​កម្មវិធី​ហាត់​ការ​ ។

ឧកញ៉ា​វេជ្ជបណ្ឌិត ពុង ការ៉ូ​លី​ន បាន​មាន​ប្រសាសន៍​ថា ​៖ «​យើង​ចង់ឱ្យ​សិស្សានុសិស្ស​នៅ​កម្ពុជា​កាន់តែ​ច្រើន អាច​កសាង​អាជីព​ក្នុង​វិស័យ​អាកាសចរណ៍ និង​អវកាស​ ។ ការ​ធ្វើការ​ជាមួយ​ក្រុមហ៊ុន Thales ផ្តល់​ឱកាស​ឱ្យ​ពួក​គេ​រៀនសូត្រ​ដោយ​ផ្ទាល់​ពី​អ្នកជំនាញ​ដែល​បង្កើត​ប្រព័ន្ធ​ទាំងនេះ​ជា​រៀងរាល់ថ្ងៃ ហើយ​បទ​ពិសោធន៍​នេះ​អាច​ផ្លាស់​ប្តូរ​ទស្សនៈ​របស់​សិស្ស​ចំពោះ​អនាគត​របស់​ពួក​គេ​។ ខ្ញុំ​សង្ឃឹមថា នេះ​គ្រាន់តែ​ជា​ជំហាន​ដំបូង​នៃ​កិច្ច​សហប្រតិបត្តិការ​ជា​ច្រើន​បន្តបន្ទាប់​ទៀត» ​។​

លោក Thierry Tea បាន​បន្ថែម​ថា ​៖ «​ពិធី​ចុះហត្ថលេខា​នេះ​ក្លាយជា​រឿង​ដ៏​គួរ​ឱ្យ​រំភើប​មួយ ក្នុង​ការ​ស្វែងរក​គំនិត​ផ្តួចផ្តើម​រួម​គ្នា​ក្នុង​វិស័យ​អាកាសចរណ៍​និង​អវកាស វិស្វកម្ម និង​បច្ចេកវិទ្យា​ថ្មី​ៗ នៅ​ឯ​មជ្ឈមណ្ឌល Connexion Innovation Lab ​។ យើង​មាន​គម្រោង​បង្កើត​មជ្ឈមណ្ឌល​ស្រាវជ្រាវ​អនុវត្ត (Applied Research Center) មួយ​នៅ​កោះ​ពេជ្រ ដែល​កំពុង​អភិវឌ្ឍ​ខ្លួន​ក្លាយជា​មជ្ឈមណ្ឌល​ប្រមូលផ្តុំ​ធនធានមនុស្ស​ដែល​មាន​ទេព​កោសល្យ​ផ្នែក​បច្ចេកវិទ្យា និង​វិស្វកម្ម​នៅ​ក្នុង​តំបន់​មេគង្គ​ ។ ចក្ខុវិស័យ​របស់​យើង​គឺ​ដើម្បី​ពង្រឹងសមត្ថភាព​វិស្វករ​កម្ពុជា​ក្នុងស្រុក ព្រមទាំង​លើកកម្ពស់​ជំនាញ​បច្ចេកទេស និង​សមត្ថភាព​របស់​ពួក​គេ ​។ នេះ​គ្រាន់តែ​ជា​ដំណាក់កាល​ចាប់ផ្តើម​ប៉ុណ្ណោះ ហើយ​យើង​ពិតជា​រីករាយ​ណាស់​ដែល​ក្រុមហ៊ុន Thales ជឿជាក់​លើ​ចក្ខុវិស័យ​របស់​យើង ក្នុង​ការ​កសាង​ប្រព័ន្ធ​អេកូឡូស៊ី​វិស្វកម្ម​កម្រិតស្តង់ដារ​អន្តរជាតិ» ​។​

កិច្ចព្រមព្រៀង​នេះ​ក៏​ឆ្លុះ​បញ្ចាំង​ផង​ដែរ​អំពី​ការ​ចូលរួម​យ៉ាង​សកម្ម​កាន់តែ​ខ្លាំង​ឡើង​របស់​ក្រុមហ៊ុន កា​ណា​ឌី​យ៉ា គ្រុប (Canadia Group) នៅ​ក្នុង​វិស័យ​អប់រំ​ផ្នែក​អាកាសចរណ៍ តាម​រយៈ​ការ​គាំទ្រ​ដល់​សាកលវិទ្យាល័យ ខេ​មតិច និង​ភាព​ជា​ដៃគូ​រវាង​ក្រុមហ៊ុន អូ​ស៊ី​អាយ​ស៊ី (OCIC) ជាមួយ​ស្ថាប័ន «World Citi Colleges International» (WCCI) ដើម្បី​បង្កើត​សាកលវិទ្យាល័យ​ផ្នែក​អាកាសចរណ៍​ដំបូង​គេ​នៅ​កម្ពុជា ​។ គំនិត​ផ្តួចផ្តើម​ទាំងនេះ​រួម​គ្នា មាន​គោលបំណង​ពង្រីក​ឱកាស​សម្រាប់​ការ​អប់រំ​ឯកទេស ការ​ស្រាវជ្រាវ និង​ការ​បណ្តុះបណ្តាល​នៅ​ក្នុង​ប្រទេស​កម្ពុជា​ ៕ អត្ថបទសហការ