រាជធានីភ្នំពេញ ៖ មន្ទីរការងារ និងគ្រឹះស្ថានសិក្សា នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៦ ខែតុលា ឆ្នាំ២០២៥នេះ បានបង្ហាញការសាទរ…
រាជធានីភ្នំពេញ ៖ មន្ទីរការងារ និងគ្រឹះស្ថានសិក្សា នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៦ ខែតុលា ឆ្នាំ២០២៥នេះ បានបង្ហាញការសាទរ ចំពោះកិច្ចព្រមព្រៀងសន្តិភាព កម្ពុជា-ថៃ ដែលបង្ហាញពីជោគជ័យ ក្នុងកិច្ចខិតខំប្រឹងប្រែងរបស់រាជរដ្ឋាភិបាល តាមរយៈយុទ្ធសាស្ត្រស្ងាត់តែមិនស្ងៀម ដែលបាននាំយកសន្តិភាពពិតប្រាកដ ជូនជាតិមាតុភូមិ ។
លោក តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ បានបង្ហាញការអបអរសាទរយ៉ាងក្លៀវក្លាប្រកបដោយមោទនភាព ចំពោះជោគជ័យថ្មីមួយទៀតរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត ដែលសម្រេចបាននូវសមិទ្ធផលជាប្រវត្តិសាស្ត្រនេះ ។
លោកថ្លែងថា៖ «យើងខ្ញុំទាំងអស់គ្នាក្នុងនាមជាប្រជាពលរដ្ឋខ្មែរនៅទូទាំងប្រទេស សូមគោរពកោតសរសើរ និងស្ញប់ស្ញែងយ៉ាងក្រៃលែងចំពោះការដាក់ចេញនូវយុទ្ធសាស្ត្រនយោបាយ ស្ងាត់តែមិនស្ងៀម របស់ សម្តេចធិបតី ដែលនាំមកនូវជោគជ័យដ៏ធំធេងសម្រាប់ជាតិ និងប្រជាជន» ។
ទន្ទឹមនេះ លោក មាស ដារ៉ា ប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តបាត់ដំបង ក៏បានចូលរួមអបអរសាទរចំពោះ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីចុះហត្ថលេខា លើកិច្ចព្រមព្រៀងសន្តិភាពកម្ពុជា-ថៃ នៅចំពោះមុខ ឯកឧត្តមប្រធានាធិបតីសហរដ្ឋអាមេរិក ដូណាល់ ត្រាំ នាថ្ងៃទី២៦ ខែតុលា ឆ្នាំ២០២៥ នៅក្នុងកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួរ ប្រទេសម៉ាឡេស៊ី ។
លោកថ្លែងថា៖ «ខ្ញុំបាទជឿជាក់លើគោលនយោបាយរបស់ រាជរដ្ឋាភិបាលដែល ដឹកនាំដោយសម្តេចធិបតី ហ៊ុន ម៉ាណែត ដែលបានដាក់ចេញនូវអភិក្រម “ស្ងៀមស្ងាត់ ស្ងាត់តែមិនស្ងៀម” ជាអភិក្រមប្រកបដោយគតិបណ្ឌិតជាក់ស្តែងនាថ្ងៃនេះអភិក្រមនេះ ក៏ទទួលបានផ្លែផ្កាដ៏ត្រចេះត្រចង់ដែលមិនអាចកាត់ថ្លៃបានគឺកិច្ចព្រមព្រៀងសន្តិភាពកម្ពុជា-ថៃ» ។
ស្រដៀងគ្នានេះ លោក នួន ស៊ីណា ប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តបន្ទាយមានជ័យ ក៏បានបង្ហាញការអបសាទរ ចំពោះការចុះកិច្ចព្រមព្រៀងសន្តិភាព កម្ពុជា-ថៃ ។ លោកបានបង្ហាញពីក្តីមោទនភាពបំផុត ចំពោះសម្តេចទាំងទ្វេ ដែលចំណាយទាំងកម្លាំងកាយ និងកម្លាំងចិត្តក្នុងការដឹកនាំនាវាកម្ពុជា ឆ្ពោះទៅរកការអភិវឌ្ឍ ជាពិសេស ការស្វែងរកសន្តិភាពក្នុងពេលនេះ ។
លោកថ្លែងថា៖ «ខ្ញុំពិតជាសប្បាយចិត្តខ្លាំងណាស់ចំពោះភាពជោគជ័យក្នុងការចុះហត្ថលេខាលើកិច្ចព្រមព្រៀងសន្តិភាពនេះ ព្រោះវាបាននាំមកនូវ ការរក្សា ផ្ទះសំបែង ទ្រព្យសម្បត្តិ អាយុជីវិតរបស់ប្រជាជន និងកងកម្លាំងរបស់ប្រទេសទាំងពីរ» ។
ថ្នាក់ដឹកនាំមន្ទីរការងារ និងគ្រឹះស្ថានសិក្សា នៃក្រសួងការងារ និងបណ្តុះបណ្តាលវិជ្ជាជីវៈ ក៏បានអំពាវនាវ ដល់បងប្អូនប្រជាពលរដ្ឋទាំងអស់ បន្តរួមគ្នាកុំឱ្យបែកសាមគ្គី និងជឿជាក់លើគោលនយោបាយ របស់រាជរដ្ឋាភិបាលដែលដឹកនាំដោយ សម្តេចធិបតី ហ៊ុន ម៉ាណែត ជានាយករដ្ឋមន្ត្រី ដោយអនុវត្តនូវអភិក្រម “ស្ងៀមស្ងាត់ ស្ងាត់តែមិនស្ងៀម” ៕ អត្ថបទសហការ
ចែករំលែកព័តមាននេះ