រាជធានី​ភ្នំពេញ​, ថ្ងៃ​ទី ៣១ ខែកក្កដា ឆ្នាំ ២០២៥ ៖ ភ្នំពេញ​ស៊ី​ធី​សេន​ធ័​រ (Phnom Penh City Center – PPCC) ដែល​ដឹកនាំ​ដោយ ឧកញ៉ា ឡាវ សុខ​ហ៊ុយ​, ឧកញ៉ា ពេ​ជ អភិ​រៈ និង​លោក ឡាវ អៀវ​ចុង សូម​បង្ហាញ​នូវ​ការ​គាំទ្រ​យ៉ាង​ពេញទំហឹង​ចំពោះ​កិច្ច​ខិតខំ​ប្រឹងប្រែង​របស់​រាជរដ្ឋាភិបាល​កម្ពុជា ដឹកនាំ​ដោយ សម្ដេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា ក្នុង​ការ​រក​ដំណោះស្រាយ​សន្តិភាព​ចំពោះ​ស្ថានភាព​តានតឹង​បច្ចុប្បន្ន ។

PPCC សូម​អបអរសាទរ និង​គាំទ្រ​ជា​ខ្លាំង​ចំពោះ​កិច្ចចរចា​ដែល​នាំ​ឱ្យ​មានការ​ឈប់​បា.ញ់​រវាង​ភាគី​ទាំង​ពីរ ដោយ​ជឿជាក់​ថា សន្តិភាព គឺជា​គន្លង​ដ៏​ល្អ​បំផុត​សម្រាប់​អនាគត​រុងរឿង​នៃ​តំបន់ ។ ក្នុង​នាម​ជា​សកម្មភាព​ជាក់ស្តែង​នៃ​ការ​រួមចំណែក​សង្គម PPCC បានចូលរួមឧបត្ថម្ភ​ថវិកា​ចំនួន USD 50,000 ដើម្បី​ជួយ​ទិញ​សម្ភារ​ប្រើប្រាស់​ចាំបាច់​សម្រាប់​កងទ័ព​ជួរ​មុខ និង​ប្រជាជន​ដែល​ត្រូវ​បាន​រង​គ្រោះ​ដោយ​សង្គ្រាម ។

បន្ថែម​ពី​នេះ PPCC កំពុង​ដឹកនាំ​យុទ្ធនាការ​លើកទឹកចិត្ត​ដល់​សាធារណជន​ឱ្យ​ចូលរួម​បរិច្ចាគ​ដោយ​ស្ម័គ្រចិត្ត​តាម​រយៈ​មូលនិធិ​ជា​ផ្លូវការ​របស់ PPCC ។ លោក​អ្នក​អាច​ចូលរួម​បរិច្ចាគ​ដោយ​ផ្ទាល់​ដៃ​មក​កាន់​ទីតាំង​របស់ PPCC ផ្ទាល់​តែ​ម្តង ។

PPCC សូម​ថ្លែងអំណរគុណ​ដល់​សប្បុរសជន​ទាំងអស់​ដែល​បាន​និង​កំពុង​ចូលរួម​ឧបត្ថម្ភ មិន​ថា​ជា​ថវិកា ឬ​សម្ភារ​ក៏​ដោយ ។ បើ​ទោះបីជា​ការ​ឈប់​បា.ញ់​បាន​ព្រមព្រៀង​គ្នា​តែ PPCC នៅ​តែ​បន្ត​ទទួល​ការ​ឧបត្ថម្ភ ដើម្បី​ចូលរួម​ជួយ​សង្គ្រោះ​បងប្អូន​រង​គ្រោះ​រហូត​ដល់​សង្គ្រាម​ត្រូវ​បាន​បញ្ចប់​ទាំងស្រុង ។
សម្ភារ និង​ថវិកា ដែល​ទទួល​បាន​នឹង​ត្រូវ​ប្រើប្រាស់​សម្រាប់​ការ​ជួយ​សង្គ្រោះ​បន្ថែម ។ អ្នក​ដែល​ចង់​ចូលរួម​បរិច្ចាគ​សម្ភារ​អាច​នាំ​មក​ប្រគល់​នៅ​ទីតាំង​កែង​បុរី The Edge ក្នុង​តំបន់ PPCC ។ សូម​ចុច​តំណ​ភ្ជាប់​នេះ​ដើម្បី​ចូល​ទៅ​កាន់​ទីតាំង ៖ https://maps.app.goo.gl/FtcbRzhui79AEW7PA ។

PPCC ក៏​កំពុងធ្វើការ​ផ្តល់​ឱកាស​ការងារ​ដល់​បងប្អូន​ខ្មែរ​ដែល​បាន​ត្រឡប់​មក​ពី​ប្រទេស​ថៃ ដោយ​រួម​សហការ​ជាមួយ​អាជីវកម្ម​នៅ​ក្នុង​តំបន់​ផ្ទាល់ខ្លួន ។ ក្នុង​ទីបំផុត PPCC ជឿជាក់​យ៉ាង​ពេញចិត្ត​លើ​ការ​សហប្រតិបត្តិការ​ពាណិជ្ជកម្ម និង​សន្តិភាព​អន្តរជាតិ​ដោយ​គ្មាន​ការ​រើសអើង ឬ​លក្ខខណ្ឌ​ណាមួយ ។ ហើយ​សម្រាប់​ព័ត៌មាន​បន្ថែម សូម​ទំនាក់ទំនង​ក្រុមការងារ PPCC ឬ​អញ្ជើញ​មក​កាន់​ទីតាំង​ផ្ទាល់ ៕ អត្ថបទសហការ