រាជធានីភ្នំពេញ ៖ ធនាគារជាតិនៃកម្ពុជា សហការជាមួយក្រុមការងារយុវជន និងស្ថាប័នជំនាញ បើកសិក្ខាសាលាស្តីពីការរៀបចំផែនការអាជីព និងការជ្រើសរើសជំនាញសិក្សាសម្រាប់សិស្សថ្នាក់ទី១២ ធ្វើការស្វែងយល់នូវមូលដ្ឋានគ្រឹះមួយចំនួនទៅនឹងតម្រូវការទីផ្សារការងារនា ពេលបច្ចុប្បន្ន និងអនាគត…
រាជធានីភ្នំពេញ ៖ ធនាគារជាតិនៃកម្ពុជា សហការជាមួយក្រុមការងារយុវជន និងស្ថាប័នជំនាញ បើកសិក្ខាសាលាស្តីពីការរៀបចំផែនការអាជីព និងការជ្រើសរើសជំនាញសិក្សាសម្រាប់សិស្សថ្នាក់ទី១២ ធ្វើការស្វែងយល់នូវមូលដ្ឋានគ្រឹះមួយចំនួនទៅនឹងតម្រូវការទីផ្សារការងារនា ពេលបច្ចុប្បន្ន និងអនាគត ។
លោកជំទាវបណ្ឌិត ជា សិរី ទេសាភិបាលធនាគារជាតិនកម្ពុជា ថ្លែងលើកឡើងក្នុងពិធីបើកសិក្ខាសាលា ស្តីពីការរៀបចំ ផែនការអាជីព និងការជ្រើសរើសជំនាញសិក្សាសម្រាប់សិស្សថ្នាក់ទី ១២ ឆ្នាំសិក្សា ២០២៤-២០២៥ នៅស្រុកសន្ទុក ខេត្តកំពង់ធំ ថ្ងៃទី ២០ ខែមិថុនា ឆ្នាំ ២០២៥ នេះថា សិក្ខាសាលាថ្ងៃនេះពិតជាមានសារៈសំខាន់ណាស់ ក្នុងគោលបំណងឱ្យសិស្សានុសិស្ស ស្វែងយល់អំពីចំណុចគន្លឹះចំនួនរួមមាន ៖ ស្វែងយល់ពីខ្លួនឯងឱ្យបានច្បាស់លាស់ តាមរយៈការពិនិត្យលើចំណូលចិត្ត ជំនាញ គុណតម្លៃ និងបុគ្គលិកលក្ខណៈរបស់ខ្លួនឯង, ស្វែងយល់ពីអាជីព និងមុខរបរដែលសមស្រប តាមជំនាញឯកទេស, ស្វែងយល់ពីតម្រូវការ កម្លាំងពលកម្មតាមជំនាញឯកទេស និងទិន្នន័យនៃប្រាក់បៀរវត្ស សម្រាប់ពេលបច្ចុប្បន្ន និងអនាគត ទាំងកម្រិតក្នុងប្រទេស និងកម្រិតតំបន់, ស្វែងយល់ពីលទ្ធភាពកត្តាជំរុញ និងកត្តារារាំង ចំពោះការសម្រេចគោលដៅរបស់ខ្លួន, និងរៀបចំផែនការអាជីព និងការសិក្សាឱ្យបានសមស្រប និងកែសម្រួលទៅតាមរយៈកាលខ្លី ឬវែង ។
លោកជំទាវបណ្ឌិត បន្តថា តាមរយៈការសិក្សានេះ ធនាគារជាតិនៃកម្ពុជា បានបន្តលើកកម្ពស់ការអប់រំដល់សិស្សនុសិស្ស តាមរយៈការឧបត្ថម្ភវគ្គបំប៉នបន្ថែមជារៀងរាល់ឆ្នាំ សម្រាប់សិស្សប្រឡងសញ្ញាបត្រមធ្យមសិក្សាទុតិយភូមិ ការបញ្ជ្រាបចំណេះដឹងផ្នែក ហិរញ្ញវត្ថុដល់សិស្សានុសិស្ស ក្នុងកម្មវិធីសិក្សាចំណេះដឹងទូទៅពីថ្នាក់ទី ១ ដល់ទី ១២ និងយុទ្ធនាការអប់រំខ្លីៗដូចជា ការបោះពុម្ពសៀវ ភៅ“តោះ ! និយាយពីលុយ” ដែលលើកកម្ពស់ការយល់ដឹង លើការគ្រប់គ្រងប្រាក់កាស ប្រកបដោយភាពវៃឆ្លាត ។ ទន្ទឹមនេះធនាគារជាតិនៃកម្ពុជា ក៏បានឧបត្ថម្ភ និងបំពាក់កុំព្យូទ័រជាច្រើនគ្រឿង នៅក្នុងបន្ទប់សិក្សាកុំព្យូទ័រ ព្រមទាំងផ្តល់ជូននូវការបង្រៀនកុំព្យូទ័រដល់ សិស្ស ក្នុងនោះគ្រូបង្រៀនសុទ្ធសឹងជាមន្ត្រីផ្នែកព័ត៌មានវិទ្យា ដែលមានបទពិសោធន៍បម្រើការងារយូរឆ្នាំផងដែរ ។
លោកជំទាវបណ្ឌិត ជា សិរី បញ្ជាក់ថា ឲ្យតែយើងមានជំនាញច្បាស់ គឺមិនខ្វះការងារធ្វើនោះទេ ដូចនេះគប្បីប្អូនៗពេល បញ្ចប់ថ្នាក់ទី ១២ ត្រូវជ្រើសរើស និងមានការសម្រេចចិត្តឲ្យត្រឹមត្រូវ ហើយគួរចាប់យកមុខជំនាញណាសមស្របសមត្ថភាពខ្លួនមាន ។ ជាមួយនេះដែរ ត្រូវចេះស្វែងរកនូវអាហារូបករណ៍ ដើម្បីអាចបន្តការសិក្សាតាមមហាវិទ្យាល័យក្នុង និងក្រៅស្រុក និងមានការកំណត់ គោលការណ៍សម្រាប់ជីវិត ព្រោះវាជាផ្នែកមួយនៅក្នុងការតម្រង់ទិសសម្រាប់ខ្លួនឯង ។ កន្លងមកធានាគារជាតិនៃកម្ពុជា ក៏បានផ្ដល់ អាហារូបករណ៍ សម្រាប់សិស្សមកពីបណ្ដាខេត្ត ក្នុងនោះខេត្តកំពង់ធំ សិស្សនិទ្ទេស A (អេ) និង B ផងដែរ ។ លើសពីនេះ ធនាគារ ជាតិនៃកម្ពុជា ក៏កំពុងសស្រាក់សស្រាំ ជ្រើសរើសគ្រូបង្រៀនភាសាអង់គ្លេស ដែលជាមន្ត្រីរបស់ធនាគារជាតិនៃកម្ពុជា ដើម្បីផ្ដល់នូវ ការបំពាក់បំប៉នភាសាអង់គ្លេសបន្ថែមដល់សិស្ស សម្រាប់ជាទុនត្រៀមចូលមហាវិទ្យាល័យ ឬបន្តសិក្សាជំនាញបច្ចេកទេសផ្សេងៗ ។
លោកជំទាវបណ្ឌិតទេសាភិបាល ជឿជាក់យ៉ាងមុតមាំថា សិស្សានុសិស្សទាំងអស់ នឹងជ្រើសរើសជំនាញសិក្សាឱ្យបានត្រឹមត្រូវ ហើយ ខិតខំប្រឹងប្រែងរៀនសូត្រ បន្តការសិក្សាថ្នាក់ឧត្តមសិក្សា និងថ្នាក់ក្រោយៗទៀត ដើម្បីអភិវឌ្ឍចំណេះដឹងរបស់ខ្លួន និងចូលរួមចំណែក អភិវឌ្ឍប្រទេសយើង ឆ្ពោះទៅសម្រេចបានចក្ខុវិស័យ ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេស ដែលមានចំណូលខ្ពស់នៅ ឆ្នាំ ២០៥០ ផងដែរ ៕ អត្ថបទសហការ
ចែករំលែកព័តមាននេះ