រាជធានីភ្នំពេញ៖ នាឱកាសដ៏មហានក្ខត្តឫក្ស និងជាមង្គលដ៏បវរមហាប្រសើរថ្លៃថ្លាបំផុត ទូលព្រះបង្គំជាខ្ញុំ ឃួង ស្រេង អភិបាល នៃគណៈអភិបាលរាជធានីភ្នំពេញ និងភរិយា និងទូលព្រះបង្គំជាខ្ញុំ…
រាជធានីភ្នំពេញ៖ នាឱកាសដ៏មហានក្ខត្តឫក្ស និងជាមង្គលដ៏បវរមហាប្រសើរថ្លៃថ្លាបំផុត ទូលព្រះបង្គំជាខ្ញុំ ឃួង ស្រេង អភិបាល នៃគណៈអភិបាលរាជធានីភ្នំពេញ និងភរិយា និងទូលព្រះបង្គំជាខ្ញុំ ម៉ប់ សារិន ប្រធានក្រុមប្រឹក្សារាជធានីភ្នំពេញ និងភរិយា ព្រមទាំងមន្ត្រីរាជការ កងកម្លាំង និងប្រជាពលរដ្ឋទាំងអស់ក្នុងរាជធានីភ្នំពេញ សូមក្រាបបង្គំអភិវន្ទសម្តែងថ្វាយនូវអំណរសាទរ ឥតឧបមា ក្នុងព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី ព្រះវររាជមាតាជាតិខ្មែរ គម្រប់ព្រះជន្ម ៨៩ ព្រះវស្សា យាងចូល ៩០ ព្រះវស្សា ដែលនឹងប្រព្រឹត្តទៅនៅថ្ងៃពុធ ៨រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៨ ខែមិថុនា ឆ្នាំ២០២៥ នេះ។
ស្ថិតក្នុងព្រះបរមវរោកាសដ៏មហាជ័យមង្គលាភិរម្យថ្លៃថ្លានេះ ទូលព្រះបង្គំ យើងខ្ញុំទាំងអស់គ្នា សូមអភិវន្ទលំឱនកាយវាចាចិត្ត ក្រាបបង្គំសម្តែងនូវកត្តញ្ញូកតវទិតាធម៌ដ៏ជ្រាលជ្រៅ ថ្វាយចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ដែលជានិច្ចកាល ព្រះអង្គបានលះបង់ព្រះកាយពល និងព្រះបញ្ញាញាណ បំពេញព្រះរាជសកម្មភាពដ៏វិសេសវិសាលបំផុត ជាពិសេសព្រះរាជកិច្ចដ៏ឧត្តុង្គឧត្តម ក្នុងព្រះរាជតួនាទីជា “ព្រះប្រធានកិត្តិយសកាកបាទក្រហមកម្ពុជា និងជាព្រះប្រធានកិត្តិយស នៃក្រុមប្រឹក្សាជាតិកម្ពុជាដើម្បីស្ត្រី” ដែល បានរួមចំណែកយ៉ាងធំធេងក្នុងការលើកកម្ពស់សិទ្ធិស្ត្រីខ្មែរ។ បន្ថែមលើនេះ ព្រះអង្គតែងតែបានបរិច្ចាគព្រះរាជទ្រព្យទ្រទ្រង់សកម្មភាព មនុស្សធម៌របស់កាកបាទក្រហមកម្ពុជា ជាចំណែកយ៉ាងធំធេងក្នុងការជួយដល់ប្រជារាស្ត្រកម្ពុជា ជនងាយរងគ្រោះ និងជនរងគ្រោះដោយគ្រោះមហន្តរាយផ្សេងៗ ជាពិសេស នាពេលថ្មីៗនេះ ព្រះអង្គបានប្រោសព្រះរាជូបត្ថម្ភដល់កងទ័ពកម្ពុជាដែលឈរជើងនៅតាម បណ្ដោយព្រំដែន ថែមទៀតផង។
ទូលព្រះបង្គំ យើងខ្ញុំទាំងអស់គ្នា សូមលំឱនកាយវាចាចិត្ត លើកហត្ថប្រណម្យ បួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា ប្ញទ្ធិបារមីទេវតាថែរក្សាព្រះមហាស្វេតច្ឆត្រ និងបុណ្យ បារមីនៃដួងព្រះវិញ្ញាណក្ខន្ធអតីតព្រះមហាក្សត្រ-ព្រះមហាក្សត្រីយានីខ្មែរគ្រប់ព្រះអង្គ សូមជួយបីបាច់ថែរក្សាអភិបាលប្រោះព្រំ ព្រះសព្ទសាធុការពរជ័យគ្រប់ប្រការ ថ្វាយជូន សម្តេចព្រះមហាក្សត្រី ព្រះវររាជមាតាជាតិខ្មែរ សូមបានសមប្រកបដោយព្រះពុទ្ធពរ បួនប្រការគឺ អាយុ វណ្ណៈ សុខៈ និងពលៈ ជានិច្ចនិរន្តរ៍កុំបីឃ្លៀងឃ្លាតឡើយ។
សូម សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ទ្រង់ព្រះមេត្តាទទូលនូវភក្ដីភាព ដ៏ស្មោះស្ម័គ្រ និងអភិវន្ទនកិច្ចដ៏ខ្ពង់ខ្ពស់បំផុត ពីទូលព្រះបង្គំយើងខ្ញុំទាំងអស់គ្នា ៕ អត្ថបទសហការ
ចែករំលែកព័តមាននេះ