រាជធានីភ្នំពេញ៖ នៅ​ថ្ងៃ​ទី​២០ ខែមករា ឆ្នាំ​២០២៥ បណ្តាញ​គ្រឹះស្ថាន​អប់រំ និង​បណ្តុះបណ្តាល​វេស​ឡាញ អេ​ឌ្យូ​ខេ​សិន គ្រុប (WEG) និង​ស្ថាប័ន RBS Intellect មក​ពី​ប្រទេស New Zealand បាន​ចុះ​កិច្ច​អនុស្សា​រណៈ​យោគយល់​គ្នា​ក្នុង​ភាព​ជា​ដៃគូ ដើម្បី​ជំរុញ​កិច្ច​សហប្រតិបត្តិការ​អប់រំ ​តាម​រយៈ​បង្កើន​ភាព​ជា​ដៃគូ​រវាង​សាលា​នឹង​គ្រឹះស្ថានឧត្តមសិក្សា​អន្តរជាតិ ការ​ផ្លាស់​ប្តូរ​ការ​សិក្សា​អន្តរជាតិ និង​ការ​ផ្តល់​សេវា​ប្រឹក្សា និង​រៀបចំ​សម្រាប់​ការ​សិក្សា និង​ធ្វើការ​នៅ​ប្រទេស New Zealand ដល់​សិស្សានុសិស្ស​ ។

ឧកញ៉ា ប៉ិច បូ​ឡែ​ន អគ្គនាយក​បណ្តាញ​គ្រឹះស្ថាន​អប់រំ វេស​ឡាញ អេ​ឌ្យូ​ខេ​សិន គ្រុប បាន​មាន​ប្រសាសន៍​ថា “​តាម​រយៈ​សេវាកម្ម​ប្រឹក្សា និង​រៀបចំ​ទៅ​សិក្សា​នៅ​អន្តរជាតិ​របស់​វិទ្យាស្ថាន​អភិវឌ្ឍ​វិស័យ​អប់រំ​(EDI) វេស​ឡាញ បាន​សម្រួល​ផ្តល់​នូវ​ការ​ធ្វើតេស្ត​សមត្ថភាព និង​ភាសា​អង់គ្លេស​ដូច TOEFL Test Pearson Test ​ជាដើម ដល់​សិស្សានុសិស្ស​ជា​ច្រើន ដើម្បី​បន្ត​ការ​សិក្សា​នៅ​ក្រៅ​ប្រ​ទស​ជាង​១០​ឆ្នាំ​មក​ហើយ ហើយ​ការ​ចុះ​អនុស្សា​រណៈ​យោគយល់​គ្នា​ នៅ​ថ្ងៃនេះ មិន​ត្រឹមតែ​ផ្តល់​ឱកាស​ដល់​សិស្សានុសិស្ស​យើង​ អាច​បន្ត​ការ​សិក្សា​បន្ត​នៅ​ក្រៅប្រទេស​ប៉ុណ្ណោះ​ទេ តែ​នឹង​ផ្តល់​ឱ្យ​យើង​អាច​សិក្សា​ជាមួយ​គ្រឹះស្ថានឧត្តមសិក្សា​ ដៃគូ​ដទៃ​ពី​ការ​កំណត់​ក្រេ​ឌី​ត​មុខ​វិជ្ជា ដើ​ម្ប​សិក្សា​បន្ត​នៅ​សាកលវិទ្យាល័យ ឬ​អាច​នឹង​បង្កើត​ឱ្យ​មាន​វគ្គ​សិក្សា​វិជ្ជាជីវៈ​មួយ​ចំនួន​ នៅ​វិទ្យាស្ថាន​អភិវឌ្ឍ​វិស័យ​អប់រំ​ ដោយ​មានការ​ទទួលស្គាល់​ជា​អន្តរជាតិ ​។

លោក​ឧកញ៉ា​បាន​បញ្ចា​ក់ថា ចំពោះ​ប្អូន​ៗ ដែល​មាន​បំណង​ចង់​ផ្ទេរ​ការ​សិក្សា​ថ្នាក់​វិទ្យាល័យ​ទៅ​សិក្សា​នៅ​ប្រទេស New Zealand ឬ​នៅ​ក្រៅប្រទេស ប្អូន​ៗ​ក៏​អាច​មក​ប្រឹក្សា​(EDI) ដើម្បី​ទៅ​សិក្សា​ជាមួយ​សាលា ឬ​សាកលវិទ្យាល័យ​ដៃគូ​ល្បី​ជា​ច្រើន​ទៀត​ផង​ដែរ​ ។

ក្រុមហ៊ុន RBS Intellect គឺជា​ស្ថាប័ន​ដែល​មាន​ទីស្នាក់ការ​ការិយាល័យ​កណ្តាល​នៅ​ទីក្រុង Auckland និង​មាន​ប្រតិបត្តិការ អន្តរជាតិ​ចំនួន​២០ ប្រទេស ផ្សេង​ទៀត រួម​មាន Singapore, Malaysia, Mozambique, Thailand, China, India, Nepal, Sri Lanka, Turkey, Nigeria, the Philippines, South Africa, Bangladesh, Indonesia, Cambodia, Myanmar, Bhutan, Latin America, the UK, និង the UAE​ ។

គួរ​រំ​ឮ​ក​ផង​ដែរ នា​ពេល​កន្លង​មក​បណ្តាញ​គ្រឹះស្ថាន​អប់រំ និង​បណ្តុះបណ្តាល​វេស​ឡាញ អេ​ឌ្យូ​ខេ​សិន គ្រុប (WEG) បាន​ផ្សារ​ភ្ជាប់​ទំនាក់ទំនង​ជាមួយ​ស្ថាប័ន​ដៃគូ អន្តរជាតិ​ដើម្បី​ផ្តល់​ឱកាស​សិក្សា និង​អាហារូបករណ៍​ជា​ច្រើន​សម្រាប់​សិស្សានុសិស្ស​របស់​ខ្លួន ។

សូម​ជម្រាប​ថា ពិធី​ចុះ​អនុស្សរណៈ​យោគយល់​គ្នា​បាន​ប្រារព្ធ​ឡើង​នៅ​សាលារៀន​អន្តរជាតិ ហ្វ​រ​រ៉េ​ស​ហៀ​ល ក្រោម​វត្តមាន​ដ៏​ខ្ពង់ខ្ពស់​របស់​ឧកញ៉ា ប៉ិច បូ​ឡែ​ន​អគ្គនាយក​បណ្តាញ​គ្រឹះស្ថាន​អប់រំ និង​បណ្តុះបណ្តាល​វេស​ឡាញ អេ​ឌ្យូ​ខេ​សិន គ្រុប និង​លោកស្រី សឿ​ន ម៉ា​លី​ដា អ្នកសម្របសម្រួល​អាជីវកម្ម​នៃ​ក្រុមហ៊ុន RBS Intellect ព្រមទាំង​ថ្នាក់ដឹកនាំ​ក្រុមហ៊ុន គណនាយក និង​សិស្សានុសិស្ស​នៃ​សាលារៀន​អន្តរជាតិ ហ្វ​រ​រ៉េ​ស​ហៀ​ល សាលារៀន​វ៉េ​ស្ទ​ឡាញ​ន៍ និង​សាលារៀន​ណ​ត្ស​ឡាញ​ន៍​ ៕ អត្ថបទសហការ