រាជធានីភ្នំពេញ ៖ កាលពីព្រឹកថ្ងៃទី ៣០ ខែធ្នូ ឆ្នាំ ២០២៤ នៅវិទ្យាស្ថានបច្ចេកវិទ្យាកម្ពុជា សមាគមសហគ្រិនវ័យក្មេងកម្ពុជា (YEAC)…
រាជធានីភ្នំពេញ ៖ កាលពីព្រឹកថ្ងៃទី ៣០ ខែធ្នូ ឆ្នាំ ២០២៤ នៅវិទ្យាស្ថានបច្ចេកវិទ្យាកម្ពុជា សមាគមសហគ្រិនវ័យក្មេងកម្ពុជា (YEAC) សហការជាមួយអង្គការបណ្តាញសហគ្រិនភាពសកល-កម្ពុជា (GEN Cambodia) និងស្ថាប័នរដ្ឋ ឯកជន និងដៃគូអភិវឌ្ឍ បានរៀបចំ «ទិវាសហគ្រិនភាពកម្ពុជា ២០២៤» ក្រោមមូលបទ «វិនិយោគលើសហគ្រិនវ័យក្មេងដើម្បីសេដ្ឋកិច្ចប្រកបដោយថាមវន្ត និងបរិយាបន្ន» ក្នុងគោលបំណងលើកកម្ពស់សហគ្រិនភាព និងផ្សារភ្ជាប់បណ្ដាញសហគ្រិនកម្ពុជាដែលមានសក្ដានុពល ម្ចាស់អាជីវកម្ម និងវិនិយោគិន ដែលជាសសរទ្រូងដ៏សំខាន់មួយក្នុងការជួយដល់ការអភិវឌ្ឍសេដ្ឋកិច្ចជាតិ ។
ទិវាសហគ្រិនភាពកម្ពុជា ២០២៤ ដ៏ឱឡារិកនេះ មានការអញ្ជើញចូលរួមដ៏ខ្ពង់ខ្ពស់ពីលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីកសួងសេដ្ឋកិច្ច និងហិរញ្ញវត្ថុ ឯកឧត្តម តឹករ៉េត សំរេច រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្ដម លោកជំទាវ ឧកញ៉ា លោក លោកស្រី និងសិស្សនិស្សិតសរុបប្រមាណជាជាង ១៣០០ នាក់ ។
ទិវានេះតែងតែត្រូវបានប្រទេសជាច្រើនរៀបចំឡើងរៀងរាល់ចុងឆ្នាំដូចៗគ្នា ប្រមាណជាជាង ២០០ ប្រទេស ហើយមានអ្នកចូលរួមសរុបប្រហែល ១០ លាននាក់ ។ អស់រយៈពេល ១១ ឆ្នាំកន្លងមក យើងតែងតែប្រារព្ធធ្វើទិវាសប្ដាហ៍សហគ្រិនភាពសកល (GEW) ជារៀងរាល់ឆ្នាំ ប៉ុន្តែនៅឆ្នាំ ២០២៤ នេះ យើងបានផ្លាស់ប្ដូរពី ទិវាសប្ដាហ៍សហគ្រិនភាពសកល (Global Entrepreneurship Week) មកកាន់ ទិវាសហគ្រិនភាពកម្ពុជា (Cambodian Entrepreneurship Day) ដើម្បីបង្ហាញពីការរៀបចំ និងអបអរសាទរ តំណាងជាតិកម្ពុជា ។
នៅរសៀលថ្ងៃដដែលនេះផងដែរ សមាគមសហគ្រិនវ័យក្មេងកម្ពុជា ក៏បានរៀបចំសន្និបាតប្រចាំឆ្នាំ ២០២៤ ដើម្បីធ្វើបច្ចុប្បន្នភាពផែនការយុទ្ធសាស្ត្រ និងបង្ហាញជូននូវរបាយការណ៍សំខាន់ៗទៅកាន់ភាគីពាក់ព័ន្ធ រួមមានសមាជិកសមាជិកា និងស្ថាប័នដៃគូអភិវឌ្ឍន៍នានា ក្នុងនោះរួមមាន របាយការណ៍សកម្មភាពក្នុងឆ្នាំ ២០២៤ ផែនការសកម្មភាពក្នុងឆ្នាំ ២០២៥ របាយការណ៍ហិរញ្ញវត្ថុឆ្នាំ ២០២៤ ផែនការហិរញ្ញវត្ថុនៅឆ្នាំ ២០២៥ និងការស្ទង់មតិដើម្បីសិក្សាពីទំនុកចិត្តលើស្ថានភាពអាជីវកម្ម និងហិរញ្ញវត្ថុរបស់ម្ចាស់អាជីវកម្មនៅកម្ពុជា សម្រាប់ឆ្នាំ ២០២៥ ក៏ដូចជាការស្វែងយល់ពីតម្រូវការក្នុងអាជីវកម្មរបស់សមាជិកសមាជិកា ។
សន្និបាតប្រចាំឆ្នាំ ២០២៤ នេះផងដែរ ក៏មានការចែករំលែកពីវាគ្មិនជំនាញៗ ទៅលើប្រធានបទសំខាន់ៗដូចជា ការពង្រីកអាជីវកម្មតាមរយៈ ការទទួលបានហិរញ្ញប្បទានជាទុន និងទីផ្សារមូលធន ការវិនិយោគលើអាជីវកម្មប្រកបដោយចីរភាព និងការត្រៀមខ្លួន សម្រាប់សហគ្រិនវ័យក្មេងកម្ពុជា ។
ទន្ទឹមនឹងនេះ សមាគមសហគ្រិនវ័យក្មេងកម្ពុជា ក៏បានចុះអនុស្សរណៈ នៃការយោគយល់ជាមួយ CorporateConnections Cambodia ក្នុងគោលបំណងបង្កើនកិច្ចសហប្រតិបត្តិការ ក្នុងភាពជាដៃគូ ដើម្បីចូលរួមក្នុងគំនិតផ្ដួចផ្ដើម សកម្មភាពផ្សេងៗ ដែលផ្ដល់អត្ថប្រយោជន៍ ដល់សមាជិកសមាជិការបស់ស្ថាប័នទាំងពីរ ដូចជាការរៀបចំកម្មវិធីផ្គូផ្គងអាជីវកម្ម ដំណើរទស្សនកិច្ចអាជីវកម្មទៅក្រៅប្រទេស និងវគ្គបណ្ដុះបណ្ដាល ព្រមទាំងសិក្ខាសាលានានាផងដែរ ៕ អត្ថបទសហការ
ចែករំលែកព័តមាននេះ