រាជធានីភ្នំពេញ ៖ ធនាគារ ប្រ៊ីដ បានប្រកាសដាក់ដំណើរការនូវបច្ចេកវិទ្យាថ្មីរបស់ខ្លួនជាផ្លូវការ ដល់សាធារណជនជាមួយ កម្មវិធីទូរស័ព្ទដៃ BRIDGE Mobile (…
រាជធានីភ្នំពេញ ៖ ធនាគារ ប្រ៊ីដ បានប្រកាសដាក់ដំណើរការនូវបច្ចេកវិទ្យាថ្មីរបស់ខ្លួនជាផ្លូវការ ដល់សាធារណជនជាមួយ កម្មវិធីទូរស័ព្ទដៃ BRIDGE Mobile ( ប្រ៊ីដម៉ូបាល) បង្កើតឡើងដើម្បី ជួយសម្រួលដល់អតិថិជនក្នុងការ ការធ្វើប្រតិបត្តិការហិរញ្ញវត្ថុ លើកម្មវិធីទូរសព្ទចល័តនៅក្នុងដៃកាន់តែងាយស្រួល និងសុវត្ថិភាព ។
យោងតាមសេចក្ដីប្រកាសព័ត៌មាន របស់ធនាគារ ប្រ៊ីដ នៅថ្ងៃទី ៩ ខែធ្នូ ឆ្នាំ ២០២៤ នេះ បានឱ្យដឹងថា ក្នុងនាមជាគ្រឹះស្ថានហិរញ្ញវត្ថុ ដែលតែងតែ ស្វែងរកបច្ចេកវិទ្យាថ្មីៗ ធនាគារ ប្រ៊ីដបានរៀបចំខ្លួន រួចជាស្រេចក្នុងការផ្តល់ជូនឱ្យអតិថិជនគ្រប់រូប អាចគ្រប់គ្រងហិរញ្ញវត្ថុ ជាមួយកម្មវិធីទូរសព្ទជំនាន់ថ្មីរបស់ធនាគារ ប្រ៊ីដ ។
លោក Richard Liew អគ្គនាយកប្រតិបត្តិធនាគារ ប្រ៊ីដ បានមានប្រសាសន៍យ៉ាងរំភើប ក្នុងការដាក់ឱ្យដំណើរការ កម្មវិធីទូរសព្ទដៃរបស់ BRIDGE Mobile ថា តាំងពីថ្ងៃដំបូងនៃការបើកសម្ពោធ ធនាគារពាណិជ្ជ «ប្រ៊ីដ» ជាផ្លូវនៅពាក់កណ្តាលឆ្នាំ ២០២៣ យើងបានខិតខំប្រឹងប្រែងធ្វើការឥតឈប់ឈរ ដើម្បីឱ្យបចេ្ចកវិទ្យាមួយនេះ អាចដាក់ដំណើរការបាននៅចុងឆ្នាំ ២០២៤ ។ នេះគឺជាសមិទ្ធិផលមួយ ដែលយើងជឿជាក់ថា អតិថិជនដែលកំពុងប្រើប្រាស់សេវាធនាគារ ប្រ៊ីដកាន់តែមានទំនុកចិត្ត ងាយស្រួល និងអាចធ្វើប្រតិបត្តិការដោយមិនត្រូវការកាន់សាច់ប្រាក់ផ្ទាល់ ទៅតាមតម្រូវការ ប្រចាំថ្ងៃរបស់ពួកគេ ។
កម្មវិធី BRIDGE Mobile ផ្តល់ជូននូវមុខងារដ៏សម្បូរបែប ដែលអាចឱ្យអតិថិជន គ្រប់គ្រងហិរញ្ញវត្ថុយ៉ាងងាយស្រួល ។ ចំណុចសំខាន់ៗនៃមុខងារកម្មវិធីទូរសព្ទដៃ BRIDGE Mobile រួមមាន កម្មវិធីបញ្ចូលលុយទូរសព្ទ ទូទាត់ទំនិញផ្សេងៗតាមរយៈ KHQR ផ្ទេរប្រាក់ទៅធនាគារផ្សេងទៀតនៅក្នុងស្រុក តាមប្រព័ន្ធបាគង ឬផ្ទេរប្រាក់ទៅគណនីដទៃរបស់ធនាគារ ប្រ៊ីដ ពិនិត្យមើលសមតុល្យសាច់ប្រាក់ អត្រាប្តូប្រាក់ ស្វែងរកទីតាំងសាខាធនាគារ ប្រ៊ីដ និងកន្លែងដាក់ម៉ាស៊ីន ATM ក៏ដូចជាកម្មវិធីផ្តល់ជូនពិសេសៗ ជាច្រើនទៀត ។ អតិថិជនអាចប្រើកម្មវិធីពិសេសទាំងអស់នេះបាននៅលើបច្ចេកវិទ្យាទូរសព្ទដៃ ធនាគារ ប្រ៊ីដ តែមួយគត់ ។
លោក ភី វាសនា នាយកនៃនាយកដ្ឋាន សេវាធនាគារឌីជីថល បានឱ្យដឹងថា កម្មវិធីទូរសព្ទដៃនេះ អាចឱ្យអតិថិជន ត្រួតពិនិត្យសមតុល្យគណនី តាមដានប្រវត្តិប្រតិបត្តិការ និងផ្ទេរប្រាក់បានលឿនរហ័សតាមបាគង និងតាមគណនីធនាគារ ប្រ៊ីដរបស់យើងផ្ទាល់ ។ លើសពីនេះកម្មវិធីទូរសព្ទដៃជំនាន់ថ្មី របស់យើងក៏មានបំពាក់មុខងារប្រើប្រាស់ លើការស្កេន KHQR ដើម្បីផ្ទេរប្រាក់ ឬទិញទំនិញតាមអាជីវករផ្សេងៗ ទៅកាន់ធនាគារក្នុងស្រុក ដែលជាសមាជិករបស់ប្រព័ន្ធបាគងផងដែរ ។ ជាមួយនឹងបច្ចេកវិទ្យាចុងក្រោយ និងផ្តល់ជូននូវបទពិសោធន៍សេវាធនាគារចល័ត ដែលសុវត្ថិភាព និងមានប្រសិទ្ធិភាព យើងក៏មានបំពាក់មុខងារ ជាមួយបច្ចេកវិទ្យាពង្រឹងសុវត្ថិភាពស្កេនផ្ទៃមុខ ឬម្រាមដៃ ។
ជាមួយនឹងការរចនាឡើង នូវបច្ចេកវិទ្យាចុងក្រោយ លោក Richard Liew បានបញ្ចាក់ថា ការផ្តល់ជូនអតិថិជន នូវកម្មវិធីទូរសព្ទដៃដែលបំពាក់ នូវមុខងារសុវត្ថិភាព និងមានភាពងាយស្រួល ដោយពង្រឹងលើលក្ខណៈពិសេស ដែលត្រូវបានទទួលស្គាល់ជាសកល បូករួមនូវមុខងារពិសេសៗជាច្រើន ដែលលោកអ្នកអាចធ្វើប្រតិបត្តិការជាមួយសេវាធនាគារចល័តនៅក្នុងដៃរបស់លោក អ្នកគ្រប់ពេលវេលា គ្រប់ទីកន្លែងយ៉ាងមានសុវត្ថិភាព ។
អតិថិជនអាចទាញយកកម្មវិធីទូរសព្ទដៃចល័ត របស់ធនាគារ ប្រ៊ីដ នៅលើកម្មវិធី Apple store សម្រាប់ទូរសព្ទ IOS និង Play Store សម្រាប់ទូរសព្ទដៃ Android ដើម្បីទទួលយកបទពិសោធន៍ក្នុងការប្រើប្រាស់ សេវាធនាគារជំនាន់ថ្មី ដែលធ្វើឱ្យធនាគារ ប្រ៊ីដ បន្តពង្រីកខ្លួនយ៉ាងរហ័ស ក្នុងវិស័យបច្ចេកវិទ្យា ។ សម្រាប់ព័ត៌មានបន្ថែម អំពីកម្មវិធីទូរសព្ទដៃជំនាន់ថ្មី លោកអ្នកអាចចូលមកកាន់គេហទំព័រ https://shorturl.at/Sutmx ។
គួរបញ្ជាក់ថា ធនាគារ ប្រ៊ីដ គឺជាធនាគារ ដែលប្តេជ្ញាផ្តល់ជូនដំណោះស្រាយសេវាធនាគារ ដែលសមស្របទៅតាម បច្ចេកវិទ្យាពិភពលោក ។ ផ្តល់ជូនសេវាធនាគារ ដ៏សម្បួរបែបរួមទាំងសេវាធនាគារបុគ្គល សេវាធនាគារអាជីវកម្ម ក្នុងគោលបំណងឱ្យវិស័យធនាគារ កាន់តែងាយស្រួល សុវត្ថិភាព និងអាចចូលប្រើប្រាស់បានគ្រប់ៗគ្នា ៕ អត្ថបទសហការ
ចែករំលែកព័តមាននេះ