សិស្សសាលារៀនសហគមន៍ ២១ កម្រិតមត្តេយ្យខ្មែរ និងអង់គ្លេសចំនួន ២០០ នាក់ ទទួលវិញ្ញាបនបត្របញ្ចប់ភូមិសិក្សា និងរង្វាន់លើកទឹកចិត្ត
រាជធានីភ្នំពេញ ៖ នៅថ្ងៃទី ១៩ ខែតុលា ឆ្នាំ ២០២៤ កន្លងមកនេះ សាលារៀនសហគមន៍ ២១…
រាជធានីភ្នំពេញ ៖ នៅថ្ងៃទី ១៩ ខែតុលា ឆ្នាំ ២០២៤ កន្លងមកនេះ សាលារៀនសហគមន៍ ២១ បានរៀបចំពិធីប្រគល់វិញ្ញាបនបត្របញ្ចប់ភូមិសិក្សា បណ្ណសរសើរ និងរង្វាន់ដល់សិស្សពូកែគ្រប់កម្មវិធីសិក្សាចំនួន ២០០ នាក់ ប្រចាំឆ្នាំសិក្សា ២០២៣-២០២៤ នៅមជ្ឈមណ្ឌលសហប្រតិបត្តិការ កម្ពុជា-កូរ៉េ ។
កញ្ញា ប៉ិច មករា នាយិកាប្រតិបត្តិការសាលារៀន សហគមន៍ ២១ បានឱ្យដឹងថា ៖ «ការសិក្សាក្នុងវ័យកុមារមានសារៈសំខាន់ និងផ្តល់បទពិសោធន៍ដ៏មានតម្លៃបំផុត សម្រាប់កុមារគ្រប់រូប ។ ព្រោះនៅក្នុងវ័យនេះ កុមារគ្រប់រូបចាប់ផ្តើមបង្កើតនូវការគិត ទម្លាប់ និងកសាងនូវអត្តសញ្ញាណប្រចាំខ្លួន ។ ម្យ៉ាងទៀត ការចាប់ផ្តើមជាមួយនឹងភាពជោគជ័យ នៃការសិក្សា ក្នុងវ័យកុមារ ផ្តល់នូវមោទកភាព និងទំនុកចិត្តខ្ពស់ ដល់កុមារក្នុងការសិក្សា ក៏ដូចជាការសម្រេចការងារផ្សេងទៀត នៅពេលពួកគេរីកចម្រើនពេញវ័យ» ។
កញ្ញានាយិកា បានបញ្ជាក់ថា ៖ «ពិធីប្រគល់វិញ្ញាបនបត្របញ្ចប់ភូមិសិក្សានៅថ្ងៃនេះ បញ្ជាក់ឱ្យឃើញនូវលទ្ធផល ប្រកបដោយជោគជ័យ ការខិតខំ តស៊ូព្យាយាម រៀនសូត្រ ដោយយកចិត្តទុកដាក់ ពីសំណាក់សិស្សានុសិស្ស នៃគ្រប់កម្មវិធីសិក្សា» ។
ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានមានប្រសាសន៍ថា ៖ «សាលារៀនសហគមន៍២១ មានគុណភាពអប់រំ និងកម្មវិធីសិក្សាអមផ្តោតលើបំណិនជីវិតសតវត្សរ៍ទី ២១ ដូចនឹងសាលារៀនវ៉េស្ទឡាញន៍ផងដែរ ។ ប៉ុន្តែយើងព្យាយាមបន្ធូរបន្ថយតម្លៃសិក្សា ឱ្យទាបជាងសាលារៀនវ៉េស្ទឡាញន៍ ពីរទៅបីដង ដើម្បីសម្រួលដល់ជីវភាពរបស់ប្រជាពលរដ្ឋ ក៏ដូចជាផ្តល់ឱកាសដល់សិស្សានុសិស្ស ទទួលបានសិក្សានៅសាលារៀនសហគមន៍» ។
លោកឧកញ៉ា បានស្នើដល់អ្នកអាណាព្យាបាលសិស្ស ត្រូវចូលរួមឈ្វេងយល់ពីកម្មវិធីសិក្សា របស់សាលារៀនឱ្យបានច្បាស់លាស់ ជាជាងផ្តោតតែលើលទ្ធផលសិក្សា និងបន្តកិច្ចសហការជាមួយសាលារៀន ឬគ្រូបង្រៀនជាប្រចាំ ដើម្បីតាមដានការសិក្សា ក៏ដូចជាការអភិវឌ្ឍអាកប្បកិរិយាកូនៗ ។
សូមជម្រាបថា សាលារៀនសហគមន៍ ២១ ត្រូវបានបង្កើតឡើងក្នុងឆ្នាំ ២០២២ ដែលមានបេសសកម្ម ចូលរួមជាមួយរាជរដ្ឋាភិបាលកម្ពុជា ក្នុងទិសដៅរួមចំណែកអភិវឌ្ឍវិស័យអប់រំ និងវិស័យសេដ្ឋកិច្ចសហគមន៍ តាមរយៈការបណ្តុះបណ្តាល ជំនាញវិជ្ជាជីវៈដល់សិស្សានុសិស្ស ចាប់តាំងពីថ្នាក់វិទ្យាល័យ ។ សាលារៀនសហគមន៍ ២១ អនុវត្តកម្មវិធីអប់រំ ចំណេះទូទៅខ្មែរ ចាប់ផ្តើមពីកម្រិតមត្តេយ្យសិក្សា ដល់ថ្នាក់ទី ១២ តាមស្តង់ដារគុណភាព របស់ក្រសួងអប់រំ យុវជន និងកីឡា និងអនុវត្តកម្មវិធីអប់រំភាសាអង់គ្លេស តាមកម្មវិធីសិក្សាអាមេរិកាំង ពីកម្រិតមត្តេយ្យ ដល់កម្រិតខ្ពស់ ។
លើសពីនេះទៅទៀត សាលារៀនបានដាក់បញ្ចូលកម្មវិធី សិក្សាបន្ថែម ជាច្រើនទៀត នឹងជួយផ្តល់ឱ្យសិស្សានុសិស្ស នូវជំនាញនៃសតវត្សទី ២១ លើកម្មវិធីសិក្សាគោល រួមមាន៖ (១) កម្មវិធី Money Tree មកពីប្រទេសសឹង្ហបូរី ផ្តល់នូវចំណេះដឹងហិរញ្ញវត្ថុ ដែលផ្តោតលើការគ្រប់គ្រង និងការប្រើប្រាស់លុយកាក់ បានត្រឹមត្រូវ និងការការពារខ្លួន ពីសម្ពាធសម្ភារនិយមក្នុងសង្គម ។ (២) កម្មវិធី The Leader_In_Me មកពីសហរដ្ឋអាមេរិក សិក្សាពីទម្លាប់ទាំង ៧ របស់បុគ្គលឆ្នើម ដែលនឹងដឹកនាំ សិស្សានុសិស្ស ឱ្យមានចំណេះដឹង និងជំនាញក្នុងការត្រិះរិះពិចារណា ការប្រាស្រ័យទាក់ទងគ្នា ការដោះស្រាយបញ្ហា គំនិតច្នៃប្រឌិត និងការបង្កើតថ្មី ការសហប្រតិបត្តិការ ការធ្វើការងារជាក្រុម មានសីលធម៌ សុជីវធម៌ល្អ មានផ្នត់គំនិត ឈានមុខគេ និងមានភាពជាអ្នកដឹកនាំ។ (៣) កម្មវិធីសិក្សាកុំព្យូទ័រ – ផ្តល់នូវជំនាញបច្ចេកវិទ្យា និងជួយឱ្យសិស្សចេះប្រើប្រាស់ចំណេះដឹងកុំព្យូទ័រមូលដ្ឋាន សម្រាប់ការសិក្សា រួមមានការយល់ដឹង ពីសមាសភាគកុំព្យូទ័រ ការរៀបចំអត្ថបទ ការធ្វើបទបង្ហាញ ការស្រាវជ្រាវឯកសារ និងការប្រើប្រាស់អ៉ីនធឺណែត អ៉ីម៉ែលជាដើម ។
គិតត្រឹមឆ្នាំ ២០២៤ នេះ សាលារៀនសហគមន៍ ២១ មានចំនួន ៧ សាខា ៖ សាលារៀនសហគមន៍ ២១ សាខាក្រាំងធ្នង់ សាខាព្រែកអញ្ចាញ សាខាផ្សារគគី សាខាកំបូល សាខាសន្ទុ្កក សាខាបឹងធំ សាខាពញាឭ និងសាខាឬស្សីកែវ ។
សាលារៀនសហគមន៍ ២១ គឺជាបណ្តាញគ្រឹះស្ថានអប់រំមួយ ក្នុងចំណោមបណ្តាញគ្រឹះស្ថានអប់រំ និងបណ្តុះបណ្តាល របស់ក្រុមហ៊ុន វេសឡាញ អេឌ្យូខេសិនគ្រុប រូមមាន៖ សាលារៀនវ៉េស្ទឡាញន៍ សាលារៀនណត្សឡាញន៍ វិទ្យាស្ថានអភិវឌ្ឍវិស័យអប់រំ EDI មជ្ឈមណ្ឌលភាសាចិនឆាងចឹង សាលាភាសាអង់គ្លេសលីដឺលែន និងសាលាអន្តរជាតិហ្វរ៉េសហីល ៕ អត្ថបទសហការ
ចែករំលែកព័តមាននេះ