រាជធានីភ្នំពេញ ៖ ព្រឹត្តិការណ៍ GUMBALL 3000 x Chip Mong នៅកម្ពុជា នឹងមានការចូលរួមពីបណ្ដាជនមានឥទ្ធិពល…
រាជធានីភ្នំពេញ ៖ ព្រឹត្តិការណ៍ GUMBALL 3000 x Chip Mong នៅកម្ពុជា នឹងមានការចូលរួមពីបណ្ដាជនមានឥទ្ធិពល កំពូលតារា កីឡាករ និងអ្នកជំនួញ មកពីបណ្ដាប្រទេសជាង ៤០ ជាតិសាសន៍ផ្សេងគ្នា ធ្វើដំណើរដោយរថយន្តទំនើបៗដូចជា Supercars, Luxury Cars និង Sport cars ប្រមាណ ១៣០-១៥០ មកកាន់ប្រទេសកម្ពុជា ដែលជាកត្ដាជំរុញលើកស្ទួយកិត្យានុភាពនៃវិស័យទេសចរណ៍ជាតិ ។
កាលពីពេលថ្មីៗនេះ ក្រសួងទេសចរណ៍ ក្រុមហ៊ុន ជីប ម៉ុង និងស្ថាប័នពាក់ព័ន្ធនានា បានរៀបចំពិធីក្រុងពាលីដើម្បីសុំសេចក្ដីសុខក្នុងកំឡុងពេលនៃការរៀបចំព្រឹត្តិការណ៍ Gumball 3000 x Chip Mong នៅកម្ពុជា នាពេលដ៏ខ្លីខាងមុខនេះ ។ ពិធីក្រុងពាលីនេះ ត្រូវបានធ្វើឡើងនៅពីរទីតាំងធំៗផ្សេងគ្នា ទី ១ គឺនៅទីតាំងសួនច្បារវត្តបទុមវតី ដែលជាទីតាំងសម្រាប់រៀបចំព្រឹត្តិការណ៍ Gumball 3000 x Chip Mong នៅភ្នំពេញ និងទីតាំងទី ២ នៅ ទីលានជល់ដំរី ខេត្តសៀមរាប ដែលជាទីតាំងទី ២ សម្រាប់ព្រឹត្តិការណ៍នេះផងដែរ ។
សូមបញ្ជាក់បន្ថែមថា ព្រឹត្តិការណ៍ Gumball 3000 x Chip Mong នេះ មិនមែនជាព្រឹត្តិការណ៍ដែលបង្កើតឡើងក្នុងគោលបំណងបង្អួតរថយន្តទំនើបៗពីសំណាក់អភិជននៅកម្ពុជាទេ ផ្ទុយទៅវិញវាជាព្រឹត្តិការណ៍ដែលរៀបចំឡើងក្នុងគោលបំណងសំខាន់ចំនួន ៤ ដែលជួយឲ្យប្រទេសយើងចំណេញច្រើនណាស់ រួមមាន ៖
១). ការជំរុញវិស័យទេសចរណ៍នៅកម្ពុជា កេរ្តិ៍ឈ្មោះរបស់ប្រទេសទៅកាន់ពិភពលោក
២). ការចូលរួមចំណែកក្នុងសប្បុរសធម៌ដ៏ធំទៅមន្ទីរ ពេទ្យកុមារអង្គរខេត្តសៀមរាប
៣). ការបើកឱកាសរវាងវិ និយោគគិនឯកជនបរទេសនិងនៅក្នុងស្រុកបានជួបគ្នា
៤). ការបង្កើតកំណត់ត្រា ពិភពលោកហ្គីណេស «ការចូលរួមចតរថយន្តច្រើនជាងគេនៅមុខប្រាសាទអង្គរវត្ត» ដែលមិនធ្លាប់មានពីមុនមក ។
មួយវិញទៀត ព្រឹត្តិការណ៍ Gumball 3000 x Chip Mong ដ៏អស្ចារ្យមួយនេះ នឹងអនុញ្ញាតឱ្យសាធារណជនចូលរួមទស្សនាកម្សាន្តដោយសេរី ហើយចំពោះបងប្អូនដែលមានរថយន្តចង់ចូលរួមដាក់តាំងបង្ហាញ ក៏អាចចូលរួមតាមរយៈការជាវកញ្ចប់បរិច្ចាគទៅតាមប្រភេទនៃកញ្ចប់នីមួយៗផងដែរ ។ ចំពោះថវិកាដែលបានមកពីការបរិច្ចាគរបស់សប្បុរសជននានា នឹងប្រគល់ជូន មន្ទីរពេទ្យកុមារអង្គរ ខណៈដែលការបរិច្ចាគនេះ គេរំពឹងថានឹងទទួលបានថវិកាយ៉ាងតិច ២០ ម៉ឺន ដុល្លារ ៕ អត្ថបទសហការ
ចែករំលែកព័តមាននេះ