សាលារៀនវ៉េស្ទឡាញន៍ សាខាទី ១១ និងសាលាភាសាលីដឺលែន សាខាទី ២ ក្រុងតាខ្មៅ សម្ពោធជាផ្លូវការ
រាជធានីភ្នំពេញ ៖ នៅព្រឹកថ្ងៃទី ១២ ខែសីហា ឆ្នាំ ២០២៤ សាលារៀនវ៉េស្ទឡាញន៍ សាខាទី ១១…
រាជធានីភ្នំពេញ ៖ នៅព្រឹកថ្ងៃទី ១២ ខែសីហា ឆ្នាំ ២០២៤ សាលារៀនវ៉េស្ទឡាញន៍ សាខាទី ១១ និងសាលាភាសាលីដឺលែន សាខាទី ២ ស្ថិតនៅក្រុងតាខ្មៅ បានសម្ពោធជាផ្លូវការហើយ ក្រោមអធិបតីភាព ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល ។
លោកឧកញ៉ា ប៉ិច បូឡែន អគ្គនាយក និងប្រធាននាយកប្រតិបត្តិ នៃក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា ដោយចាប់ផ្តើមជាមួយនឹងសាលារៀន ដែលមានសិស្សចំនួន ៦០០ នាក់ និងគ្រូបង្រៀន ព្រមទាំងបុគ្គលិកចំនួន ៧០ នាក់ក្នុងឆ្នាំ ២០០៨ ក្រុមហ៊ុនបានកំពុងពង្រីកវិសាលភាពអប់រំរបស់ខ្លួនរហូតដល់ ២៨ ទីតាំង បុគ្គលិកចំនួនជាង ១៤០០ នាក់ និងមានសិស្សានុសិស្សចំនួន ១៥០០០ នាក់ ក្នុងឆ្នាំ ២០២៤ ។
ចាប់តាំងពីបង្កើតសាលារៀនដំបូងក្នុងឆ្នាំ ២០០៨ ក្រុមហ៊ុនត្រូវបានទទួលស្គាល់យ៉ាងទូលំទូលាយថា ជាក្រុមហ៊ុនអប់រំឈានមុខគេមួយ និងទទួលបានសមិទ្ធផលរំភើបចិត្តដល់ស្ថាប័នជាតិ និងអន្តរជាតិជាច្រើន ។ រហូតមកដល់ពេលនេះ គ្រឹះស្ថានអប់រំ និងបណ្តុះបណ្តាល ជាបុត្រសម្ព័ន្ធរបស់ក្រុមហ៊ុនវេសឡាញមានដូចជា សាលារៀនវ៉េស្ទឡាញន៍ សាលារៀនណត្សឡាញន៍ វិទ្យាស្ថានអោះភិវឌ្ឍវិស័យអប់រំ មជ្ឈមណ្ឌលភាសាចិនឆានឈីង សាលាអន្តរជាតិហ្វររ៉េសហៀល សាលាភាសាលីដឺលែន និងសាលារៀនសហគមន៍ ២១ ។
លោកឧកញ៉ា ប៉ិច បូឡែន បញ្ជាក់ថា តាមរយៈកិច្ចសហប្រតិបត្តិការដៃគូវិនិយោគ ក្រុមហ៊ុនវេសឡាញបានចូលរួមចំណែក ក្នុងការអភិវឌ្ឍវិស័យអប់រំ នៅតាមបណ្តាខេត្តបន្ថែម រួមមាន ខេត្តបាត់ដំបង ខេត្តកណ្តាល និងខេត្តកំពង់ស្ពឺ ។ ហើយសម្រាប់ខេត្តកណ្តាល ក្រៅពីសាលាវ៉េស្ទឡាញន៍ សាខាទី១១ នៅក្រុងតាខ្មៅនេះ ក្រុមហ៊ុនគ្រោងនឹងពង្រីកសាខាបន្ថែមទៀតនៅតាមបណ្តាស្រុក ជាពិសេស គឺការពង្រីកសាលារៀនសហគមន៍ ២១ ដែលផ្តោតទៅលើការអប់រំជំនាញវិជ្ជាជីវៈ ។
ក្នុងឱកាសនោះ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល មានប្រសាសន៍ដោយបានអបអរសាអទរចំពោះការបើកសាខាសាលារៀនវ៉េស្ទឡាញ ទី ១១ ស្ថិតនៅក្រុងតាខ្មៅនេះ។ ឯកឧត្តមមានប្រសាសន៍ថា បើមើលមួយផ្នែក វាគឺជាការអភិវឌ្ឍវិស័យឯកជនដែលដឹកនាំដោយលោកឧកញ៉ា ប៉ិច បូឡែន ដែលបានអភិវឌ្ឍជាបន្តបន្ទាប់ តែវាក៏អាចបញ្ជាក់ផងដែរថា វាជាការរីកចម្រើនថ្មីមួយទៀតផងដែរសម្រាប់ក្រុងតាខ្មៅដែលទទួលបាននូវសាលាដែលមានកម្មវិធីដ៏សម្បូរបែប ក្នុងការជួយបណ្តុះបណ្តាលនូវធនធានមនុស្សរបស់យើង ។
សូមបញ្ជាក់ថា សាលារៀនវ៉េស្ទឡាញន៍ សាខាទី ១១ និងសាលាភាសាលីដឺលែន សាខាទី ២ ក្រុងតាខ្មៅ បានបើកដំណើរការរយៈពេល៣ខែមកហើយ ដោយមានសិស្សចូលរៀនសរុបចំនួន ១៥០ នាក់ និងមានបុគ្គលិកចំនួន ២៣ នាក់ ។ ក្រៅពីអនុវត្តកម្មវិធីសិក្សាគោលរបស់ក្រសួងអប់រំ យុវជន និងកីឡា សាលារៀនវ៉េស្ទឡាញន៍ សាខាទី ១១ ក្រុងតាខ្មៅ បានបន្ថែមកម្មវិធីសិក្សាដែលមកពីក្រៅប្រទេស ដោយផ្តោតទៅលើជំនាញបំណិនសតវត្សរ៍ទី ២១ ដើម្បីជួយឱ្យសិស្ស អាចសម្របខ្លួនទៅនឹងបម្រែបម្រួលបរិបទសង្គម សេដ្ឋកិច្ច ក៏ដូចជាសម្រាប់ទីផ្សារការងារនៅពេលអនាគត ។
បច្ចុប្បន្ន សាលារៀនវ៉េស្ទឡាញន៍ ក្រុងតាខ្មៅ មានកម្មវិធីសិក្សា ដូចជា ១. កម្មវិធីថែទាំ និងអប់រំកុមារតូច (អាយុ១៨ខែឡើង), ២. កម្មវិធីមត្តេយ្យភាសាខ្មែរ អង់គ្លេស ចិន, ៣. កម្មវិធីភាសាអង់គ្លេស-ចិន សម្រាប់កុមារ, ៤. កម្មវិធីចំណេះទូទៅខ្មែរ អង់គ្លេស ចិន , ៥. កម្មវិធីសាភាអង់គ្លេសសម្រាប់សិស្សធំ និង ៦. កម្មវិធីភាសាចិន ៕ អត្ថបទសហការ
ចែករំលែកព័តមាននេះ