សិស្សសាលារៀន វ៉េស្ទឡាញន៍ ទទួលជ័យលាភីលេខ ៣ ក្នុងកម្មវិធីប្រឡងតែងនិពន្ធស្តីពី ពិធីបុណ្យអាសាឡបូជា (ពិធីបុណ្យចូលព្រះវស្សា)
រាជធានីភ្នំពេញ ៖ កាលពីថ្ងៃទី ១៤ ខែកក្កដា ឆ្នាំ ២០២៤ កន្លងមកនេះ ក្រសួងអប់រំ យុវជន…
រាជធានីភ្នំពេញ ៖ កាលពីថ្ងៃទី ១៤ ខែកក្កដា ឆ្នាំ ២០២៤ កន្លងមកនេះ ក្រសួងអប់រំ យុវជន និង កីឡា និងវត្តនិគ្រោធវ័ន គល់ទទឹង បានសហការរៀបចំកម្មវិធីប្រឡង តែងនិពន្ធស្តីពី ពិធីបុណ្យអាសាឡបូជា (ពិធីបុណ្យចូលព្រះវស្សា) ដោយមានការចូលរួមពីគ្រឹះស្ថានសិក្សាចំនួន ៣០ នៅក្នុងរាជធានីភ្នំពេញ និងនៅក្នុងខេត្តកណ្តាល មានសិស្សានុសិស្សចំនួន ៣០០ នាក់ចូលរួម ពីកម្រិតថ្នាក់ទី ១០ ដល់ថ្នាក់ទី ១២ ។
ក្នុងកម្មវិធីប្រឡងខាងលើនេះ យុវតីឈ្មោះ លី សុខនី ជាសិស្សថ្នាក់ទី ១០ មកសាលារៀនវ៉េស្ទឡាញន៍ សាខាទួលទំពូង បានទទួលជ័យលាភីលេខ ៣ ក្នុងចំណោមបេក្ខជនទាំង ៣០០ នាក់ ។ ការប្រឡងតែងនិពន្ធនេះ រៀបចំឡើងក្នុងគោលបំណងឱ្យសិស្សានុសិស្សសិក្សាឈ្វេងយល់អំពីពិធី បុណ្យអាសាឡបូជា ជាពិសេស ធម្មចក្កប្បវត្តនសូត្រ ជាធម្មទេសនាទី ១ (បឋមទេសនា) ដែលព្រះសម្មាសម្ពុទ្ធ ជាម្ចាស់សម្តែងប្រោសដល់បញ្ចវគ្គិយភិក្ខុក្នុងថ្ងៃ ១៥ កើត ខែអាសាឍ (ថ្ងៃបុណ្យចូលព្រះវស្សា ឬហៅថា អាសាឡបូជា) ។ កម្មវិធីនេះ ចូលរួមលើកកម្ពស់ចរិយាធម៌ សីលធម៌ របស់យុវជន ដើម្បីក្លាយជាសរសរទ្រូង ប្រទេសជាតិប្រកបដោយប្រសិទ្ធភាព ។
សូមជម្រាបថា កម្មវិធីរៀបចំឡើងក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រះមង្គលធម្មកិច្ច ភួង សុវណ្ណ ព្រះគ្រូចៅអធិការ និងព្រះមេធានុរ័ក្ខ បណ្ឌិត គូ សុភាព ព្រះគ្រូសូត្រស្ដាំវត្តនិគ្រោធវ័ន (គល់ទទឹង) និងមានការចូលរួមពី ឯកឧត្តម លោកជំទាវថ្នាក់ដឹកនាំក្រោមឱវាទ លោកគ្រូ អ្នកគ្រូ និងសិស្សានុសិស្សមកពីសាលារៀនចំនួន ២៣ ។
គួរបញ្ជាក់ថា ការប្រឡងនេះបែងចែកជា ០២ ដំណាក់កាលគឺ ៖ ទី ១. ការប្រឡងសរសេរអត្ថបទស្រាវជ្រាវ ៖ អនុញ្ញាតឱ្យសិស្សានុសិស្សធ្វើការសិក្សាស្រាវជ្រាវ ហើយ សរសេរអត្ថបទដោយដៃ (២-៣ ទំព័រ) ដែលត្រូវប្រគល់ជូនគណៈកម្មការប្រឡង នៅថ្ងៃទី ០១ ខែកក្កដា ឆ្នាំ ២០២៤ ។ ការប្រឡងអត្ថបទស្រាវជ្រាវនេះ បេក្ខជនទទួលបានពិន្ទុ ៥០% នៃពិន្ទុសរុប ។ ទី ២.ការប្រឡងឆ្លើយសំណួរ ៖ តម្រូវឱ្យសិស្សានុសិស្សទាំងអស់អញ្ជើញមកវត្តនិគ្រោធវ័ន គល់ទទឹង ដើម្បីចូលរួមប្រឡង នៅថ្ងៃទី ១៤ ខែកក្កដា ឆ្នាំ ២០២៤ វេលាម៉ោង ១៤:០០ នាទីរសៀល ដល់ម៉ោង ១៥:០០ នាទីរសៀល ដែលបេក្ខជននឹងទទួលបានពិន្ទុ ៥០% នៃពិន្ទុសរុប ៕ អត្ថបទសហការ
ចែករំលែកព័តមាននេះ