រាជធានីភ្នំពេញ ៖ កាលពីពេលថ្មីៗកន្លងមកនេះ ក្នុងពិធីផ្សព្វផ្សាយអាហារូបករណ៍ ដល់សិស្សថ្នាក់ទី១២ នៃសាលារៀនវ៉េស្ទឡាញ និងសាលារៀនណត្សឡាញន៍ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ នាពេលខាងមុខ លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានលើកទឹកចិត្តដល់សិស្សានុសិស្សទាំងអស់ ពេលបញ្ចប់ថ្នាក់វិទ្យាល័យ និងបន្តទៅឧត្តមសិក្សា សូមជ្រើសរើសយកជំនាញសិក្សាទៅតាមអាជីព ដែលខ្លួនស្រឡាញ់ ត្រូវនឹងទេពកោសល្យ និងទីផ្សារការងារនៅពេលអនាគត ដោយកុំជ្រើសរើសជំនាញនៅតាមអាហារូបករណ៍ ។
លោកឧកញ៉ា ប៉ិច បូឡែន មានប្រសាសន៍ថា កន្លងមកមាននិស្សិតមួយចំនួន ដែលទោទន់រៀនតាមរយៈអាហារូបករណ៍ដែលខ្លួនទទួលបាន ឬគេផ្តល់ឱ្យ ប៉ុន្តែរៀនមិនចំជំនាញដែលខ្លួនស្រឡាញ់ និងទេពកោសល្យ រហូតដល់ទៅឆ្នាំទី ២ ទើបសុំផ្លាស់ប្តូរសាលា ឬជំនាញ, លោកឧកញ៉ា មានប្រសាសន៍ថា ការរៀនមិនចំជំនាញដែលខ្លួនស្រឡាញ់ គឺធ្វើឱ្យខាតពេលវេលា ដូច្នេះសិស្សានុសិស្ស ចាំបាច់ត្រូវមើលទៅលើចំណង់ចំណូលចិត្តខ្លួនឯង មើលទៅលើទេពកោសល្យ និងទីផ្សារការងារនៅពេលអនាគត ព្រមទាំងជ្រើសរើសជំនាញទៅតាមអាជីពដែលខ្លួនស្រឡាញ់ ហើយប្រសិនបើទទួលបានអាហារូបករណ៍មិនចំជំនាញ ដែលខ្លួនចូលចិត្តទេ សិស្សានុសិស្សគួរបង់លុយសិក្សា ដោយត្រូវចាត់ទុកថា នេះជាការវិនិយោគ ព្រោះនៅពេលដែលយើងរៀនចំជំនាញ ដែលខ្លួនស្រឡាញ់ គឺយើងនឹងធ្វើបានល្អ ។
ជាមួយគ្នានេះដែរ លោកឧកញ៉ា ប៉ិច បូឡែន ក៏បានផ្តាំផ្ញើទៅដល់សិស្សានុសិស្សទាំងអស់ កុំមើលរំលងទៅលើជំនាញមួយចំនួន ដែលចាំបាច់ក្នុងបរិបទសង្គមបច្ចុប្បន្ន និងអនាគត នោះគឺជំនាញភាសាបរទេស ដែលមានដូចជាភាសាអង់គ្លេស និងចិន បច្ចេកវិទ្យាឌីជីថល ក៏ដូចជាជំនាញទំនាក់ទំនង ។ លោកឧកញ៉ាបញ្ជាក់ថា បច្ចុប្បន្ននៅពេលទៅបំពេញការងារ ឬទៅធ្វើការនៅតាមស្ថានប័ន ឬក្រុមហ៊ុន គឺចាំបាច់ត្រូវមានចំណេះដឹងបន្ថែមទាំងនោះ ទើបល្បឿននៃការងារមិនចាញ់គេ ។ ក្នុងនោះដែរ សិស្សានុសិស្សទាំងអស់ ក៏ត្រូវគិតឱ្យហើយដែរថា ឱកាសការងាររបស់ប្អូនៗ គឺមិនមែនត្រឹមតែកម្ពុជានោះទេ ពោលគឺប្អូនៗត្រូវគិតថា ឱកាសការងារក្នុងតំបន់អាស៊ានទាំងមូល គឺជារបស់យើង ដូច្នេះ ចាំបាច់ត្រូវមានគុណវុឌ្ឍ ចំណេះជំនាញគ្រប់គ្រាន់ ដើម្បីធ្វើការបានក្នុងតំបន់អាស៊ាន ។
ម្ចាស់គ្រឹះស្ថានអប់រំខាងលើបានសង្កត់ធង្ងន់ថា ត្រូវដាក់ចិត្តថានៅអាស៊ាន មិនមែនកម្ពុជាទេ អញ្ចឹងដើម្បីប្រកួតប្រជែងទីផ្សារការងារ កូនត្រូវចេះអង់គ្លេសចាំបាច់ ត្រូវចេះភាសាចិន បំណិនជំនាញរបស់យើង ការប្រាស្រ័យទាក់ទង និងជំនាញបច្ចេកវិទ្យាគឺចាំបាច់ ទើបកូនអាចធ្វើការនៅក្នុងអាស៊ានបាន ។
ក្នុងឱកាសនោះ លោកឧកញ៉ា ប៉ិច បូឡែន ក៏បានលើកឡើងអំពីសារៈសំខាន់ នៃមុខវិជ្ជាវិទ្យាសាស្ត្រពិត ដែលសិស្សានុសិស្សគួរចាប់អារម្មណ៍ ព្រោះមុខវិជ្ជានេះ សំខាន់សម្រាប់ប្រទេសអភិវឌ្ឍ ខណៈប្រទេសកម្ពុជា គ្រោងនឹងចាកចេញពីប្រទេសដែលកំពុងអភិវឌ្ឍ ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅក្នុងឆ្នាំ២០៥០ ។ បើតាមប្រសាសន៍របស់លោកឧកញ៉ា ប៉ិច បូឡែន នៅពេលដែលប្រទេសកម្ពុជាក្លាយទៅជាប្រទេសអភិវឌ្ឍ គឺពិភពការងារនឹងផ្លាស់ប្តូរ ដោយវិស័យកសិកម្ម នឹងត្រូវប្តូរទៅជាបច្ចេកវិទ្យាកសិកម្ម និងឧស្សាហកម្ម ដែលចាំបាច់ត្រូវចេះកែច្នៃផលិតផល ដោយទាំងនេះគឺចាំបាច់ត្រូវការនូវជំនាញវិទ្យាសាស្ត្រ ។
សូមជម្រាបថា ជារៀងរាល់ថ្ងៃ បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប តែងតែរៀបចំកម្មវិធីផ្សព្វផ្សាយអាហារូបករណ៍របស់គ្រឹះស្ថានអប់រំ ដៃគូក្នុង និងក្រៅប្រទេសដល់សិស្សថ្នាក់ទី១២ ក្នុងគោលបំណងផ្តល់ឱកាសពិសេស និងលើកទឹកចិត្តឱ្យសិស្សានុសិស្សខិតខំ ប្រឹងប្រែងរៀនសូត្រ ។ សម្រាប់ឆ្នាំ២០២៤ នេះ គ្រឹះស្ថានអប់រំដៃគូដែលបានចូលរួមផ្សព្វផ្សាយមាន៖ សាកលវិទ្យាល័យពុទិ្ធសាស្ត្រ, សាកលវិទ្យាល័យកម្ពុជា សាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា (CamTech) សាកលវិទ្យាល័យលីមកុកវីង សាកលវិទ្យាល័យអន្តរជាតិផារ៉ាហ្គន សាលវិទ្យាល័យគ្រប់គ្រង East Asia និងសាកលវិទ្យាល័យ De Montfort University Cambodia ។
ក្នុងកម្មវិធីនេះ សាលារៀនក៏បានសហការ ជាមួយទីភ្នាក់ងារជាតិនិងមុខរបរ នៃក្រសួងការងារ និងបណ្តុះបណ្តាលវិជ្ជាជីវៈ ដើម្បីរៀបចំផែនការអាជីព និងការតម្រង់ទិសវិជ្ជាជីវៈ សម្រាប់សិស្សផងដែរ ៕ អត្ថបទសហការ
ចែករំលែកព័តមាននេះ