រាជធានីភ្នំពេញ៖ ការអប់រំពេញលេញមួយ គឺចាំបាច់ត្រូវមានបញ្ញាស្មារតី ព្រមជាមួយនឹងសុខភាពល្អ ព្រោះបើមានតែបញ្ញា តែមិនមានសុខភាពល្អ សិស្សក៏មិនអាចក្លាយទៅជាមូលធនមនុស្ស សម្រាប់សង្គមនៅពេលអនាគតបានដែរ ។ ដោយមើលឃើញពីសារៈសំខាន់សុខភាពសិស្សនេះ កាលពីថ្ងៃទី២៧ ខែមេសា ឆ្នាំ២០២៤ សាលារៀន វ៉េស្ទឡាញន៍ សាខាតាខ្មៅ បានចុះអនុស្សរណៈយោគយល់គ្នាជាមួយនឹងមន្ទីរព្យាបាល និងសម្ពពចតុមុខ ក្នុងការថែទាំសុខភាពសិស្សានុសិស្ស ។
លោក ជា កញ្ញារិទ្ធិ នាយកសាលារៀន វ៉េស្ទឡាញន៍ សាខាតាខ្មៅ បានមានប្រសាសន៍ថា សាលារៀនវ៉េស្ទឡាញន៍ បានគិតគូរនិងផ្តោតជាសំខាន់ទាំងសេវាអប់រំ និងការថែទាំសុខភាព ដោយសាលាមានគិលានុបដ្ឋាយិកា និងគ្រូពេទ្យដាច់ដោយឡែក សម្រាប់ថែទាំសុខភាពសិស្ស ក៏ដូចជាប្រឹក្សាសុខភាពផ្លូវចិត្ត ។ លោកថា ការចុះអនុស្សរណៈយោគយល់គ្នា រវាងសាលារៀនវ៉េស្ទឡាញន៍ សាខាតាខ្មៅ និងមន្ទីរព្យាបាល និងសម្ពពចតុមុខ គឺស្តែងចេញពីការយកចិត្តទុកដាក់របស់សាលា ទាំងគុណភាពអប់រំ និងសុខភាពរបស់សិស្សានុសិស្សទាំងអស់ ។
ជាមួយគ្នានេះ លោក ជា កញ្ញារិទ្ធិ ក៏បានបញ្ជាក់ដែរថា ដើម្បីអបអរសាទរសម្រាប់វត្តមានជាលើកដំបូង របស់សាលារៀន វ៉េស្ទឡាញន៍ នៅលើទឹកដីក្រុងតាខ្មៅ ដែលជាសាខាទី១១ សាលានៅបន្តចុះឈ្មោះបុត្រធីតារបស់លោកអ្នក ដោយផ្តល់ជូនអាហារូបករណ៍ ២០% មានសុពលភាព២ឆ្នាំ ហើយចុះឈ្មោះបុត្រធីតារៀននៅវ៉េសឡាញន៍ គឺសិក្សាបានទាំងគ្រួសារ ។ សម្រាប់ការសាកសួរព័ត៌មានបន្ថែមលោក លោកស្រីអាចទំនាក់ទំនង មកសាលារៀនយើងតាមរយៈ ៖ ០១១ ៣៦៩ ១៦៨ ឬ ០១៥ ៧៩៨ ១២៣ ។
សម្រាប់លោក ឈឿន ប៊ុណ្ណារិទ្ធ នាយកប្រតិបត្តិមន្ទីរសម្រាកព្យាបាល និងសម្ពពចតុមុខ មានប្រសាសន៍ថា មន្ទីរព្យាបាលចតុមុខ បានបើកដំណើរការអស់រយៈពេលប្រមាណ ៥ ឆ្នាំមកហើយ ដោយមានសេវាជាច្រើន ដូចជាជំងឺទូទៅ សម្ពព និងជាពិសេសជំងឺកុមារ, លោកថា ការចុះអនុស្សរណៈយោគយល់គ្នារវាងមន្ទីរព្យាបាល និងសម្ពព ចតុមុខ និងសាលារៀនវ៉េស្ទឡាញន៍ សាខាតាខ្មៅ គឺជាឱកាសក្នុងការសហការផ្តល់នូវសេវាថែទាំសុខភាព ទាំងបញ្ញាស្មារតីផងដែរ ជូនដល់សិស្សានុសិស្សដែលបានសិក្សានៅសាលារៀន វ៉េស្ទឡាញន៍ ។ លោកបញ្ជាក់ថា ការចុះអនុស្សរណៈយោគយល់គ្នានេះ ក៏ផ្តល់ផងដែរនូវអត្ថប្រយោជន៍ ដល់អ្នកអាណាព្យាបាលដូចគ្នា ដោយផ្តល់ជូននូវការបញ្ចុះតម្លៃជារួម ៥ភាគរយគ្រប់សេវាកម្មរបស់មន្ទីរព្យាបាល និងសម្ពព ចតុមុខ ។
លោកឧកញ៉ា ប៉ិច បូឡែន អគ្គនាយក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា ការងារអប់រំ និងវិស័យសុខាភិបាល គឺត្រូវដើរទន្ទឹមគ្នា ដើម្បីទទួលបាននូវមូលធនមនុស្ស ដែលពោរពេញដោយចំណេះដឹង បទពិសោធន៍ និងសុខភាពល្អ ។ ដូច្នេះហើយបានជានៅគ្រប់សាលារៀន វ៉េស្ទឡាញន៍ទាំងអស់ គឺមានគិលានុបដ្ឋាយិកា នៅជាប្រចាំ ដើម្បីតាមដាន ប្រឹក្សាសុខភាព ការសង្គ្រោះបឋម បង្កើតវគ្គអប់រំសុខភាពទៅ ដល់អ្នកអាណាព្យាបាល ក៏ដូចជាផ្តល់នូវសេវាត្រួតពិនិត្យសុខភាពផ្សេងៗ ជូនដល់កុមារ រួមជាមួយអ្នកអាណាព្យាបាលផងដែរ ហេតុនេះហើយបណ្តាញសាលារៀន វ៉េស្ទឡាញន៍តែងសហការជាមួយមន្ទីរពេទ្យ ដែលមានគុណភាពខ្ពស់ ព្រោះតែយើងត្រូវការមន្ទីរពេទ្យ ដែលទុកចិត្តបំផុតមកធ្វើជាដៃគូ ។
បើតាមប្រសាសន៍របស់អគ្គនាយកក្រុមហ៊ុន វេសឡាញ អេឌ្យូខេសិន គ្រុប នៅបណ្តាញសាលារៀនវ៉េស្ទឡាញន៍ គឺតែងតែគិតពីបញ្ហាសុខភាពរបស់សិស្សានុសិស្ស ដោយជារៀងរាល់ ៣ ខែម្តង សាលាតែងតែចេញនូវសៀវភៅកំណត់ត្រាសុខភាពកុមារ ហើយក៏បានអញ្ជើញមាតាបិតាមកជំរាបជូនពីសុខភាពរបស់កូនៗ ដោយសូម្បីតែបញ្ហាសុខភាពផ្លូវចិត្ត ក៏សាលាយកចិត្តទុកដាក់ផងដែរ ព្រោះប្រសិនបើយើងមើលតែបញ្ញា ហើយមិនពិនិត្យមើលសុខភាពរាងកាយ និងសុខភាពផ្លូវចិត្តទេ នោះសិស្សានុសិស្សនឹងមិនអាចសម្របខ្លួន ឱ្យជោគជ័យក្នុងអាជីវកម្ម ក៏ដូចជាអាជីពការងារនៅពេលអនាគតបានដែរ ៕ អត្ថបទសហការ
ចែករំលែកព័តមាននេះ