រាជធានីភ្នំពេញ ៖ នៅព្រឹកថ្ងៃទី ៣១ មីនា ២០២៤ ក្រុមហ៊ុនធានារ៉ាប់រងអាយុជីវិត FWD Cambodia និងធនាគារ…
រាជធានីភ្នំពេញ ៖ នៅព្រឹកថ្ងៃទី ៣១ មីនា ២០២៤ ក្រុមហ៊ុនធានារ៉ាប់រងអាយុជីវិត FWD Cambodia និងធនាគារ ជីប ម៉ុង បានសហការគ្នារៀបចំឡើងនូវកម្មវិធីរត់ “រត់ដើម្បីកុមារ” (Fun Run) ដែលប្រព្រឹត្តទៅនៅខាងមុខប្រាសាទអង្គរវត្ត ខេត្តសៀមរាប ក្នុងគោលបំណង លើកកម្ពស់សុខភាព សុខុមាលភាពក្នុងសហគមន៍ និងរៃអង្គាសថវិកាដើម្បីគាំទ្រដល់មន្ទីរពេទ្យកុមារអង្គរ ខេត្តសៀមរាប។ កម្មវិធីនេះទទួលបានការចុះឈ្មោះចូលរួមប្រមាណ ៧០០ នាក់ និងរៃអង្គាសថវិកាសប្បុរសធម៌បានច្រើនជាង ១៧ លានរៀល ដែលថវិកាសប្បុរសធម៌នេះត្រូវបានប្រគល់ជូនដល់មន្ទីរពេទ្យកុមារអង្គរនៅព្រឹកថ្ងៃដដែលផងដែរ ។
ថ្លែងក្នុងកម្មវិធីរត់នេះដែរ លោក ជីម គង់ហ៊ុយ អគ្គនាយកនៃក្រុមហ៊ុន FWD Cambodia បានមានប្រសាសន៍ថា ៖ «យើងខ្ញុំមានសេចក្តីសោមនស្សរីករាយដែលបានចូលរួមសហការជាមួយធនាគារជីប ម៉ុង ក្នុងការរៀបចំកម្មវិធីរត់សប្បុរសធម៍ ដែលស្របទៅនឹងការប្ដេជ្ញាចិត្តរបស់ក្រុមហ៊ុនក្នុងការគាំទ្រដល់ការរស់នៅប្រកបដោយភាពរីករាយ។ ដំណើរដែលក្រុមហ៊ុន FWD Cambodia និងធនាគារ ជីប ម៉ុង បាន និងកំពុងតែដើររួមគ្នានេះជាដំណើរប្រកបដោយភាពវិជ្ជមានមួយសម្រាប់ក្រុមគ្រួសារ និងសហគមន៍កម្ពុជា។ នេះគឺជាលើកទីបី ដែលពួកយើងបានរួមគ្នារៀបចំកម្មវិធីរត់ (FUN RUN) នេះឡើង ដោយលើកទីមួយយើងបានរួមគ្នាធ្វើនៅទីក្រុងភ្នំពេញ និងលើកទីពីរនៅខេត្តបាត់ដំបង» ។
កម្មវិធីរត់នេះក៏ទទួលបានការសហការគាំទ្រផងដែរពីមន្ទីរពេទ្យ Royal Angkor, ក្រុមហ៊ុន Khmer Beverages, Chip Mong Supermarket, ចាហួយផ្លែឈើ NuVi និងក្រោមការអនុញ្ញាតពីអាជ្ញាធរជាតិអប្សរា ៕ អត្ថបទសហការ
ចែករំលែកព័តមាននេះ