អតីតនិស្សិត IT លោក រិន វីរៈ បោះបង់ប្រាក់ខែពាន់ដុល្លារ ងាកមកបើកអាជីវកម្ម បិតស្គុតរថយន្ត តាមបេះដូង
រាជធានីភ្នំពេញ៖ លោក រិន វីរៈ ហៅ Jack ត្រូវបានគេស្គាល់ថា ជាម្ចាស់អាជីវកម្ម បិតស្គុតឡាន ម៉ូតូ…
រាជធានីភ្នំពេញ៖ លោក រិន វីរៈ ហៅ Jack ត្រូវបានគេស្គាល់ថា ជាម្ចាស់អាជីវកម្ម បិតស្គុតឡាន ម៉ូតូ ដ៏ល្បីឈ្មោះម៉ាក TJ Auto Work’s ប្រចាំប្រទេសកម្ពុជា !
នៅពីក្រោយខ្នងនៃភាពជោគជ័យ របស់លោក រិន វីរៈ គឺបង្គប់នូវការតស៊ូ និងការលះបង់ ដែលគ្រប់គ្នា ពុំបានដឹងទាល់តែសោះ ។
តាមពិតលោក រិន វីរៈ គឺជា អតីតនិស្សិតបរិញ្ញាបត្រ IT 4ឆ្នាំ នៅវិទ្យាស្ថាន ស៊ីតិក SECTEC Institute ក្នុងអំឡុងឆ្នាំ 2012 ។ បន្ទាប់ពីបញ្ចប់ការសិក្សា លោក រិន វីរៈ ក៏បានចូលទៅបម្រើការងារ ក្នុងក្រុមហ៊ុនជប៉ុនធំមួយកន្លែង នៅស្រុកខ្មែរ ដោយទទួលបានប្រាក់ខែ ខ្ទង់ពាន់ដុល្លារ លើតំណែង Management Information System ។
ពេលមួយ លោក រិន វីរៈ បានសម្រេចចិត្តចេញពី ជម្រកដ៏សុខស្រួល បោះបង់ចោលសម្លៀកបំពាក់ហ៊ឺហា នៅការិយាល័យ ងាកមកស្រវា កាន់ដែកកេះ បិតស្គុតឡានម៉ូតូ ដែលជាមុខរបរដែលរូបលោកស្រឡាញ់ ។
លោក រិន វីរៈ បានលើកឡើងថា៖ «ធ្វើការងារដែលខ្លួនឯងស្រឡាញ់ ទោះជាមានព្យុះ ភ្លៀង ដាច់បាយដាច់ទឹកយ៉ាងណាក៏ដោយ ក៏មិនចេះហត់នឿយដែរ ហើយសម្រាប់ប្អូនៗ ដែលទើបប្រឡងបាក់ឌុបជាប់ ចូរស្វែងរកចំណេះជំនាញ ដែលស័ក្តសមនឹងទេពកោសល្យ ក៏ដូចជាចំណង់ចំណូលចិត្តខ្លួនឯង ជាជាងខាតពេលវេលាដូចរូបខ្ញុំ» ។
លោក រិន វីរៈ បានបន្ថែមថា ការផ្លាស់ប្តូរ ពីការអង្គុយក្នុងការិយាល័យ មានម៉ាស៊ីនត្រជាក់ មកអង្គុយហាលថ្ងៃក្តៅ វាមិនមែនជាការងាយស្រួលទេ សម្រាប់អ្នកមិនតស៊ូនឹងក្តីស្រមៃខ្លួនឯង ប៉ុន្តែសម្រាប់រូបលោកផ្ទាល់ គឺបានប្តេជ្ញាចិត្ត តស៊ូ មិនថាជួបរឿងរ៉ាវបែបណា ក៏មិនរុញរាដែរ ព្រោះតែចង់សម្រេចនូវក្តីស្រមៃឱ្យខ្លួន ។
គួររំលឹកផងដែរថា លោក រិន វីរៈ បានចាប់ផ្តើម អាជីវកម្មបិតស្គុតឡាន ម៉ូតូ តាំងពីចុងឆ្នាំ 2015 គិតមកទល់ពេលនេះ មានរយៈពេល 8ឆ្នាំហើយ ដោយបច្ចុប្បន្នលោកបាន បង្កើតនូវម៉ាកយីហោដោយខ្លួនឯង ដែលមានឈ្មោះថា TJ Auto Work’s ដែលមានចំនួនពីរសាខា និងមានសន្ទុះគាំទ្រខ្លាំង ។
អាជីវកម្មបិតស្គុត TJ Auto Work’s របស់លោក រិន វីរៈ មានភាពល្បីល្បាញ និងឆក់យកប្រជាប្រិយភាព ពីសំណាក់អតិថិជនយ៉ាងច្រើនសន្ធឹកសន្ធាប់ ដោយសារតែលោក ប្រកាន់ លើគោលការណ៍គុណភាព ភាពស្មោះត្រង់ និងការទទួលខុសត្រូវជាចម្បង ។
ជារឿយលោក រិន វីរៈ តែងតែបន្ថែមនូវចំណេះជំនាញ និងបច្ចេកទេសថ្មីៗ ផ្នែកអាជីវកម្មបិតស្គុតឡាន ម៉ូតូ តាមរយៈការចូលរួមវគ្គបណ្តុះបណ្តាល ទាំងក្នុងនឹងក្រៅប្រទេស (ថៃ និង ចិន) និងព្យាយាមជ្រើសរើស នូវផលិតផលស្គុត ឬ ហ្វីម ដែលមានគុណភាពល្អ មានប្រភពច្បាស់លាស់ និងមានការទទួលស្គាល់ មានការប្រើប្រាស់ជុំវិញពិភពលោក ៕ អត្ថបទសហការ
ចែករំលែកព័តមាននេះ