សមិទ្ធផលនានាក្នុងអារាមចំនួន៣ ស្ថិតក្នុងក្រុងបាត់ដំបង ខេត្តបាត់ដំបង ក្រោយពីបានជួសជុលរួចរាល់ជាស្ថាពរ ក្រោមការជួយឧបត្ថម្ភថវិកាពីសំណាក់ឯកឧត្តម បណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងលោកជំទាវ…
សមិទ្ធផលនានាក្នុងអារាមចំនួន៣ ស្ថិតក្នុងក្រុងបាត់ដំបង ខេត្តបាត់ដំបង ក្រោយពីបានជួសជុលរួចរាល់ជាស្ថាពរ ក្រោមការជួយឧបត្ថម្ភថវិកាពីសំណាក់ឯកឧត្តម បណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងលោកជំទាវ ខៀវ ស៊ីណា ជាចាន់តូ បានប្រារព្ធពិធីបុណ្យឆ្លង ក្រោមព្រះអធិបតីភាពសម្តេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋាននៃព្រះរាជាណាចក្រកម្ពុជា ព្រះអគ្គាធិការរងនៃអគ្គាធិការដ្ឋានពុទ្ធិកសិក្សាជាតិ និងជាព្រះមេគណ រាជធានីភ្នំពេញនៅរសៀល ថ្ងៃទី២៧ ខែមករា ឆ្នាំ២០២៣។
សមិទ្ធផលដែលបានធ្វើពិធីបុណ្យឆ្លងនាឱកាសនេះ ចំណាយថវិកាអស់ចំនួនជាងមួយសែនប្រាំបីម៉ឺនដុល្លារអាមេរិក (១៨៨,២០៤.៣៩ )ហើយសំណង់ទាំងនេះសុទ្ធសឹងជាសំណង់បុរាណនាសម័យអាណានិគមន៍ផងដែររួមមាន ៖ ពុទ្ធិកបឋមសិក្សា វត្តពោធិ៍វាល- សាលាឆាន់វត្តពោធិ៍វាល -កុដិលោកគ្រូចៅអធិការវត្តពោធិ៍វាល – សាលាអ៊ឹង ធួខាងមុខ- សាលា អ៊ឹង ធួង ខាងក្រោយ- រោងភត្តវត្តពោធិ៍ក្នុង និង ព្រះវិហារវត្តអន្លង់វិល ។
លោកជំទាវ ខៀវ ស៊ីណា ជា ចាន់តូ មានប្រសាសន៍ថា ៖ ដោយការស្រឡាញ់វប្បធម៌ទំនៀមទម្លាប់ដ៏ល្អផូរផង់របស់បុព្វបុរសខ្មែរ និងចង់អភិរក្ស កេរដំណែលបុរាណដ៏ល្អវិសេសនេះ សម្រាប់ទុកជាប្រយោជន៍ដល់កូនខ្មែរជំនាន់ក្រោយ បានឃើញ និងបានជាគំនិតសិក្សារៀនសូត្របន្តនាងខ្ញុំនិងគ្រួសារបានមូលមតិគ្នាសម្រេចធ្វើការជួយជួសជុលអគារបុរាណទាំងនេះឲ្យបានល្អស្អាតឡើងវិញ ដើម្បីរួមចំណែករក្សាឲ្យបានគង់វង្ សនិងដើម្បីឲ្យបូជនីដ្ឋាន និងអគារទាំងនេះក្លាយជាសម្បត្តិវប្បធ៌មមានតម្លៃរបស់មនុស្សជាតិ។
លោកជំទាវបានបញ្ជាក់ដែរថា ៖ សមិទ្ធផលដែលបានជួយឧត្ថម្ភនេះ គឺតិចតួចស្ដួតស្ដើងបំផុតមួយតែប៉ុណ្ណោះ ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងលើកស្តួយវិស័យព្រះពុទ្ធសាសនា និងការបណ្ដុះបណ្ដាលធនធានមុស្សតាមសាលាពុទ្ធិកសិក្សា។
ថ្លែងក្នុងឱកាសនោះដែរឯកឧត្តម អ៊ូ ដារី អភិបាលរងនៃខេត្តបាត់ដំបង បានចាត់ទុកការជួយឧបត្ថមពីសំណាក់ ឯកឧត្តម បណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងលោកជំទាវ ខៀវ ស៊ីណា ជា ចាន់តូ ដល់វិស័យពុទ្ធសាសនាក្នុងខេត្តបាត់ដំបងនេះ គឺជាគំរូដ៏ល្អបំផុតដែលធ្វើឡើងប្រកបដោយសទ្ធាយ៉ាងមុតមាំ ។ហើយសមិទ្ធផលនៅក្នុងវិស័យនេះឯកឧត្ដម និងលោកជំទាវមិនត្រឹមតែជួយនៅក្នុងខេត្តបាត់ដំបងតែមួយប៉ុណ្ណោះទេ គឺឃើញស្ទើរគ្រប់ទីកន្លែងឲ្យតែមានព្រះសង្ឃសិក្សារៀនសូត្រ ដោយបានប្រើប្រាស់នូវធនធានផ្ទាល់ខ្លួនផង និងដឹកនាំសប្បុរសជនក្នុង និងក្រៅប្រទេសឲ្យមានឱកាសបានធ្វើសេចក្តីល្អជាមួយផងដែរ។
ទាំងនេះជាមហាទានដ៏ប្រពៃថ្លៃថ្លា និងចាត់ជាសេនាសនទានផង ជាធម្មទានផង ព្រោះជាទានដែលនឹងត្រូវចូលរួមចំណែកអភិវឌ្ឍធនធានមនុស្ស ដោយចំពោះគឺផ្នែកពុទ្ធិកសិក្សានិងជួយដល់ការទ្រទ្រង់ព្រះពុទ្ធសាសនានៅកម្ពុជាឲ្យមានការរីកចម្រើន និងតាំងនៅបានយូរអង្វែងទៀតផង។
សម្តេចព្រះពុទ្ធជ័យមុនី ឃឹម សន មានថេរះដីកាថា ៖ សម្ដេចពិតជាមានសេចក្តីសោមនស្សរីករាយយ៉ាងក្រៃលែងចំពោះសទ្ធាជ្រះថ្លា និង ការខិតខំប្រឹងប្រែងធ្វើការងារជាបុណ្យកុសលរបស់ឯកឧត្តមបណ្ឌិត និង លោកជំទាវ ព្រមទាំងក្រុមគ្រួសារ និង សហការី ចំពោះស្ថាប័នព្រះពុទ្ធសាសនា ជាពិសេសផ្នែកពុទ្ធិកសិក្សា ដែលតាំងពីបុរាណកាលមកបានដើរតួនាទីយ៉ាងសំខាន់ក្នុងការចូលរួមចំណែកបណ្តុះបណ្តាលធនធានមនុស្ស ជួយដល់ព្រះសង្ឃចេញពីត្រកូលក្រីក្រ ឲ្យមានឱកាសបានសិក្សារៀនសូត្រ ក្រេបជញ្ជក់យកចំណេះដឹង កសាងសមត្ថភាពមានអនាគតភ្លឺថ្លា អាចជួយខ្លួនឯងគ្រួសារ និងចូលរួមអភិវឌ្ឍសង្គមបានតាមលទ្ធភាព និងសមត្ថភាព។
សម្ដេចមានថេរះដីកាឲ្យដឹងដែរថា៖ កាលសម័យរុរាណអ្នកប្រាជ្ញ បណ្ឌិត កោវិទ និង វិទូ ភាគច្រើន គឺចេញពី វិស័យពុទ្ធិកសិក្សានេះដូចមានសម្តេចព្រះមហាសង្ឃរាជ ជួន ណាត ជាឧទាហរណ៍ស្រាប់។ ហើយរាល់សមិទ្ធផលរីកចម្រើននានាទាំងអស់នេះ បើគ្មានវត្តមាននៃសុខសន្តិភាពពេញលេញនៅក្នុងផ្ទៃប្រទេសក៏មិនអាចកើតមានបានដែរ៕
ចែករំលែកព័តមាននេះ