ភាពយន្តរឿង «លោកគ្រូប្រពន្ធល្អ» ធ្វើឱ្យ លោក ព្រហ្ម ម៉ាញ រំភើបចិត្តខ្លាំងនឹកស្មានមិនដល់
រាជធានីភ្នំពេញ ៖ នៅក្នុងកិច្ចសម្ភាសន៍ជាមួយអ្នកសារព័ត៌មាន ក្នុងពិធីសម្ពោធរឿង «លោកគ្រូប្រពន្ធល្អ» កាលពីថ្ងៃទី ៣ ខែតុលា ឆ្នាំ ឆ្នាំ…
រាជធានីភ្នំពេញ ៖ នៅក្នុងកិច្ចសម្ភាសន៍ជាមួយអ្នកសារព័ត៌មាន ក្នុងពិធីសម្ពោធរឿង «លោកគ្រូប្រពន្ធល្អ» កាលពីថ្ងៃទី ៣ ខែតុលា ឆ្នាំ ឆ្នាំ ២០២២ វិរៈសិល្បករជើងចាស់ លោក ព្រហ្ម ម៉ាញ បានបង្ហាញពីអារម្មណ៍រីករាយយ៉ាងខ្លាំង ដោយលោកបញ្ជាក់ថា ភាពយន្តដែលលោកសម្ដែងជាតួឯកនេះ នឹងគ្រោងយកទៅផ្សព្វផ្សាយក្នុងមហោស្រពភាពយន្តអន្តរជាតិនៅក្រៅប្រទេស និងត្រៀមដាក់បញ្ចាំងលក់សំបុត្រនៅតាមរោងភាពយន្តនាបណ្ដាប្រទេសមួយចំនួន ។
លោកថា ភាពយន្តនេះផលិតករកងចក្រភាពយន្ត ក្រោមការសហការជាមួយផលិតកម្មដើមត្នោត របស់លោក ឆាយ បូរ៉ា បានបញ្ជាក់ពីគម្រោងរួចហើយ ថានឹងយកភាពយន្តនេះទៅកាន់ឆាកអន្តរជាតិ ។ លោកថា នេះមិនមែនជាស្នាដៃលើកដំបូងដែលលោកបានសម្ដែងនោះទេ តែគឺជារឿងដំបូងដែលលោកបានសម្ដែងជាតួឯក និងជារឿងដែលលោកបានសម្ដែង ក្រោយល្បីជាតារាអាយ៉ៃ ។
លោកថា កាលពីមុនសង្គ្រាម លោកបានសម្ដែងកុនជាច្រើនរឿងណាស់ តែមិនល្បីនោះទេ ទើបលោកមានអារម្មណ៍រីករាយយ៉ាងខ្លាំង ដែលត្រូវបានផលិតករជ្រើសអោយសម្ដែងជាតួលោកគ្រូ ដែលធ្វើអោយលោកពេញចិត្តយ៉ាងខ្លាំង ព្រោះជាការសម្ដែងដែលត្រូវនឹងជំនាញជាគ្រូកន្លងមករបស់លោកដែលតែងតែបង្ហាត់អាយ៉ៃ និងសិល្បៈផ្សេងៗផងដែរ ។ ក្នុងរឿងនេះ ក៏បានបន្សល់នូវប្លង់ដែលធ្វើអោយលោកតែងតែអួលដើមករគ្រប់ពេលនឹកដល់ផងដែរ គឺប្លង់ដែលត្រូវបាននាយកសាលាបណ្ដេញចេញ ហើយធ្វើអោយលោកត្រូវបោះបង់អាជីពដែលលោកស្រលាញ់ ។
មិនខុសពីការលើកឡើងរបស់លោក ព្រហ្ម ម៉ាញ លោក ឆាយ បូរ៉ា ដែលជាអ្នកដឹកនាំសម្ដែងមួយរូប បានអះអាងថាភាពយន្តនេះ គឺពិតជាបានត្រៀមខ្លួនដើម្បីឆ្ពោះទៅកាន់ទីផ្សារពិតប្រាកដមែន ទើបស្នាដៃមួយនេះ ត្រូវបានផលិតកម្មរបស់លោក និងផលិតកម្មកងចក្រ សម្រិតសម្រាំងទាំងគុណភាព និងស្ដង់ដារ ព្រោះតែចង់អោយមានការទទួលស្គាល់ក្នុងពេលឆ្ពោះទៅកាន់ទីផ្សារខាងក្រៅនេះឯង ។
ភាពយន្តនេះត្រូវបានកំណត់ដាក់លក់សំបុត្រគ្រប់រោងចាប់ពីថ្ងៃទី ៥ ខែតុលា តទៅ ហើយគម្រោងនាំយកទៅក្រៅប្រទេស មិនទាន់កំណត់ថ្ងៃច្បាស់នៅឡើយទេ ។ លោកក៏បង្ហាញមោទនភាពខ្ពស់ផងដែរ ដែលក្នុងពិធីសម្ពោធរឿងនេះ គឺមានតារាសិល្បៈ និងភ្ញៀវកិត្តិយសចូលរួមកុះករ ហើយក្នុងពិធីដាក់បញ្ចាំងសាកល្បងកាលពីប៉ុន្មានថ្ងៃមុន ក៏មានអ្នកបានទស្សនាជាច្រើនសរសើរថា ភាពយន្តនេះល្អមើល ៕ អត្ថបទសហការ
ចែករំលែកព័តមាននេះ