រាជធានីភ្នំពេញ ៖ វេទិកាហិរញ្ញប្បទានសហគ្រាសធុនតូច និងមធ្យម សកលលោកលើកទី ៩ ឆ្នាំ២០២២ បានប្រព្រឹត្តទៅរយៈពេល៣ថ្ងៃ នៅរាជាធានីភ្នំពេញ ដោយកម្មវិធីលំដាប់អន្តរជាតិមួយនេះបានរៀបចំឡើងដោយស្ថាប័នហិរញ្ញវត្ថុអន្តរជាតិ…
រាជធានីភ្នំពេញ ៖ វេទិកាហិរញ្ញប្បទានសហគ្រាសធុនតូច និងមធ្យម សកលលោកលើកទី ៩ ឆ្នាំ២០២២ បានប្រព្រឹត្តទៅរយៈពេល៣ថ្ងៃ នៅរាជាធានីភ្នំពេញ ដោយកម្មវិធីលំដាប់អន្តរជាតិមួយនេះបានរៀបចំឡើងដោយស្ថាប័នហិរញ្ញវត្ថុអន្តរជាតិ (IFC) និងបានសហការរៀបចំជាមួយនឹងធនាគារជាតិនៃកម្ពុជា ។ ក្នុងនោះដែរ ធនាគារ អេស៊ីលីដា ក៏ត្រូវបានជ្រើសរើសសម្រាប់ការចូលរួមឧបត្ថម្ភកម្មវិធីសម្រាប់វេទិកាហិរញ្ញប្បទានសហគ្រាសធុនតូច និងមធ្យម សកលលោក លើកទី ៩ ឆ្នាំ ២០២២នេះផងដែរ ។
វេទិកាហិរញ្ញប្បទាន សហគ្រាសធុនតូច និងមធ្យម សកលលោក លើកទី ៩ ឆ្នាំ ២០២២ បានប្រព្រឹត្តទៅចាប់ពីថ្ងៃទី ១៩ ដល់ថ្ងៃទី ២១ ខែកញ្ញា ឆ្នាំ ២០២២ គឺមានគោលបំណងពង្រីកនូវលទ្ធភាពទទួលបានហិរញ្ញប្បទានសម្រាប់សហគ្រាសធុនតូច និងមធ្យម ទូទាំងសកលលោក ។
តាមការគូសបញ្ជាក់របស់ ធនាគារ អេស៊ីលីដា បុព្វហេតុចម្បងនៃការចូលរួមឧបត្ថម្ភរបស់ធនាគារ សម្រាប់វេទិកាហិរញ្ញប្បទានសហគ្រាសធុនតូច និងមធ្យម សកលលោកនេះ គឺ ១) ដើម្បីលើកកម្ពស់ដៃគូធុរកិច្ចសម្រាប់បរិយាប័ន្នហិរញ្ញវត្ថុ ស្របតាមបេសកកម្មស្នូលរបស់ធនាគារ អេស៊ីលីដា និង ២) របៀបវារៈនៃវេទិកាហិរញ្ញប្បទានសហគ្រាសធុនតូច និងមធ្យម សកលលោក លើកទី ៩ នេះ ស្តីពី «តំណភ្ជាប់ទៅនឹងឌីជីថលនីយកម្មសម្រាប់ហិរញ្ញប្បទានសហគ្រាសធុនតូច និងមធ្យម ប្របកដោយបរិយាប័ន្ន និងនិរន្តរភាព» ស្របតាមដំណើរការនៃការកម្លាយខ្លួនទៅជាធនាគារឌីជីថលរបស់ ធនាគារ អេស៊ីលីដា ។
សូមបញ្ជាក់ថា ធនាគារ អេស៊ីលីដា ក៏ជាធនាគារមួយដែលត្រូវបាន ទទួលស្គាល់ដោយស្ថាប័ន IFC ពាក់ព័ន្ធនឹងការចូលរួមក្នុងការផ្ដល់កម្ចីគាំទ្រដ៏មានប្រសិទ្ធភាព និងប្រសិទ្ធផលសម្រាប់ការអភិវឌ្ឍវិស័យសហគ្រាសធុនតូច និងមធ្យម នៅកម្ពុជាអស់រយៈពេលប្រហែល ៣ ទសវត្សរ៍កន្លងមកនេះ ។
ដោយមើលឃើញពីការចូលរួមដ៏សកម្ម និងភាពជោគជ័យរបស់ ធនាគារ អេស៊ីលីដា ក្នុងការរួមចំណែកផ្ដល់មូលនិធិកម្ចីគាំទ្រដល់ការរីកចម្រើន នៃវិស័យ SME, ស្ថាប័ន IFC ក៏បានផ្ដល់នូវពានរង្វាន់ចំនួន ២ ដល់ ធនាគារ អេស៊ីលីដា ដោយទី ១ គឺពានរង្វាន់ «ដៃគូធនាគារល្អបំផុតសម្រាប់សហគ្រាសធុនតូច និងមធ្យម នៅក្នុងតំបន់អាស៊ីខាងកើត និងប៉ាស៊ីហ្វិក» និងពានរង្វាន់ទី ២ គឺ «ហិរញ្ញប្បទានសហគ្រាសធុនតូច និងមធ្យមសកលលោក ឆ្នាំ ២០២២ ជាស្ថាប័នដែលផ្តល់ហិរញ្ញប្បទានដល់សហគ្រាសធុនតូច និងមធ្យម ប្រចាំឆ្នាំ» ៕
ចែករំលែកព័តមាននេះ