រាជធានីភ្នំពេញ ៖ យោងតាមកំណត់ហេតុប្រជុំ ក្រោយពីការសម្រុះសម្រួលរវាងបុរី VIP និងអតិថិជន ក្រោមការដឹកនាំរបស់លោកស្រីអភិបាលខណ្ឌដង្កោ គឺបុរី VIP និងអតិថិជនដែលមានប្រតិកម្មជុំវិញការសាងសង់មានការយឺតយ៉ាវព្រោះបញ្ហាកូវីដ ១៩ បានបង្ហាញពីដំណោះស្រាយមួយជាវិជ្ជមានហើយ ដោយឈានដល់ការឯកភាព ក្រោមវត្តមានអភិបាលខណ្ឌដង្កោ ជាអ្នកដឹកនាំកិច្ចសម្រុះសម្រួល និងជាសាក្សីផ្ទាល់ ។
លោក ស៊ុ ស៊ីដេត ប្រធានគ្រប់គ្រងបុរី VIP ជាតំណាងអោយលោក ហម រ៉ន និង លោក វ៉ន វណ្ណៈ នាយកក្រុមហ៊ុនបុរី VIP បានលើកឡើងថា ជាការឯកភាព គឺក្នុងឆ្នាំ ២០២២ នេះ ក្រុមហ៊ុននឹងសម្រេចផែនការហិរញ្ញវត្ថុ បញ្ចប់គម្រោងសាងសង់ផ្ទះទាំងអស់ ជូនដល់ប្រ ជាពលរដ្ឋ ដោយនឹងចេញប័ណ្ណកម្មសិទ្ធិជាផ្លូវការផង ជូនដល់ម្ចាស់ផ្ទះនីមួយៗតាមលំដាប់ ។ ក្រុមហ៊ុន នឹងមិនធ្វើអោយមានការយឺតយ៉ាវក្នុងការប្រគល់ផ្ទះជូននោះឡើយ ក្រោយការឯកភាព ។
មកទល់ពេលនេះ ក្រុមហ៊ុនបានបញ្ចប់ការសាងសង់រួចរាល់លើសពី ៨០ ភាគរយរួចហើយ ហើយបញ្ហាដែលបានយឺតយ៉ាវ រហូតអ្នកខ្លះផ្ទុះការតវ៉ានោះ មិនមែនជាចេតនារបស់ ក្រុមហ៊ុននោះទេ ប៉ុន្តែគឺបណ្ដាលមកពីបញ្ហាកូវីដ ១៩ ដែលបានរាំងស្ទះក្នុងគម្រោងសាងសង់ ព្រោះតែបញ្ហាកម្មករមិនហ៊ានមកធ្វើការ និង ដោយសារតែសម្ភារសំណង់ស្ទើរគ្រប់ផ្នែកដែល ក្រុមហ៊ុនបានកុម្ម៉ង់ពន្លឿនការសាងសង់ ត្រូវបានរាំងស្ទះ ព្រោះតែច្រកដឹកជញ្ជូនមួយចំនួន ត្រូវរាំងខ្ទប់ និងមានអតិថិជនជាច្រើនបានពន្យារការបង់ប្រាក់ប៉ុណ្ណោះ។ ក្នុងនោះការបង្រួមក្បាលដី បញ្ហាដូរប្រភេទក្បាលដីក្នុងកាបំបែកក្បាលដី ជូន ដល់ពលរដ្ឋក៏ត្រូវប្រើពេលវេលាផងដែរ ទើបការងារកន្លងមកមានភាពយឺតយ៉ាវ ហើយបង្ក អោយអតិថិជនខ្លះមានរឿងអន់ចិត្ត ។
នៅចំពោះមុខ លោកស្រី គឹម ញឹក អភិបាលខណ្ឌដង្កោ លោក ស៊ុ ស៊ីដេត បានបញ្ជាក់នៅក្នុងឯកសារថា គម្រោងផ្ទះទាំងអស់របស់ក្រុមហ៊ុនបុរី VIP នៅភ្នំពេញ នឹង សម្រេចប្រគល់ផ្ទះជូនដល់អតិថិជនមិនអោយហួសពីចុងឆ្នាំ ២០២២ នេះឡើយ ហើយក្រុមហ៊ុនក៏ធ្វើប័ណ្ណបំបែកក្បាលដីជាបន្តបន្ទាប់ និងអោយបានលឿនបំផុតក្រោយការប្រគល់ ផ្ទះជូន ។
ក្រុមហ៊ុនក៏បានដាក់កំហិតអោយក្រុមហ៊ុនសាងសង់ត្រូវតែបញ្ចប់ការសាងសង់ អោយបានទាំងស្រុងនៅចុងខែធ្នូ ក្នុងឆ្នាំ ២០២២ ដើម្បីអោយមានទំនុកចិត្តដល់គ្រប់អតិថិជន ក្រោយការព្រមព្រៀង ។ លោកថា ក្រុមហ៊ុនសូមទទូចអោយអតិថិជនដែលមានចម្ងល់ និង មានបញ្ហាចង់អោយក្រុមហ៊ុនធ្វើការដោះស្រាយ សូមទំនាក់ទំនងទៅកាន់ការិយាល័យបុរី VIP ដែលស្ថិតនៅ ភូមិម៉ឺនត្រា សង្កាត់ស្ពានថ្ម ក្នុងខណ្ឌដង្កោ នៅត្រង់ច្រកចូលបុរីគ្រប់ម៉ោងធ្វើការ ចៀសវាងមានការមិនពេញចិត្តអ្វីមួយ ហើយមានការតវ៉ា ។
ក្រោយការបញ្ជាក់អមដោយលិខិតកំណត់ហេតុផ្លូវការរបស់លោក ស៊ុ ស៊ីដេត គេឃើញអតិថិជន ជាច្រើនដែលចូលរួមដោះស្រាយក្នុងបញ្ហាចម្រូងចម្រាស់នៅក្នុងថ្ងៃនោះ អបអរសាទរ និងសប្បាយចិត្តក្នុងការទទួលយកយ៉ាងខ្លាំង ដែលចរន្តនៃការឯកភាពនេះ ក៏បង្ហាញអោយឃើញកាន់តែច្បាស់ពីជំហរដោះស្រាយរបស់បុរី ទៅកាន់អតិថិជន ដើម្បី បញ្ចប់នូវរាល់បាតុភាពផ្សេងៗដែលធ្លាប់កើតឡើង ។
ក្រឡេកទៅមើលបុរី VIP ឯណោះវិញ ក៏ឃើញមានសកម្មភាពសាងសង់ពីសំណាក់ កម្មករយ៉ាងគគ្រឹកគគ្រេងខុសប្លែកពីពេលមុនផងដែរផង ដើម្បីអោយការសាងសង់រួចរាល់មុន កំណត់ ព្រោះបើតាមការរំពឹងទុករបស់លោក ស៊ុ ស៊ីដេត គឺគម្រោងទាំងមូលនឹងអាច ប្រគល់ផ្ទះជូនដល់អតិថិជនមុនកំណត់ ប្រសិនបើគ្មានការប្រែប្រួល ៕ ដោយសហការ
ចែករំលែកព័តមាននេះ