ខេត្តសៀមរាប ៖ លោកស្រី ទ្រី ដាណា ដែលគេស្គាល់ថា ជាម្ចាស់ហាងពេជ្រដ៏ធំមួយនៅព្រែកព្នៅ បានចំណាយថវិកាផ្ទាល់ខ្លួនធ្វើសកម្មភាពមនុស្សធម៌ជាបន្តបន្ទាប់ដូចភ្លៀងរលឹមគួរឱ្យសរសើរ ។ កាលពីពេលថ្មីៗនេះលោកស្រីក៏បាននាំយកអំណោយស្បៀងអាហារជាច្រើនប្រគល់ជូនរដ្ឋបាលខេត្តសៀមរាប…
ខេត្តសៀមរាប ៖ លោកស្រី ទ្រី ដាណា ដែលគេស្គាល់ថា ជាម្ចាស់ហាងពេជ្រដ៏ធំមួយនៅព្រែកព្នៅ បានចំណាយថវិកាផ្ទាល់ខ្លួនធ្វើសកម្មភាពមនុស្សធម៌ជាបន្តបន្ទាប់ដូចភ្លៀងរលឹមគួរឱ្យសរសើរ ។ កាលពីពេលថ្មីៗនេះលោកស្រីក៏បាននាំយកអំណោយស្បៀងអាហារជាច្រើនប្រគល់ជូនរដ្ឋបាលខេត្តសៀមរាប ដើម្បីចាត់ចែងជួយដល់ប្រជាជនរងផលប៉ះពាល់ដោយសារកូវីដ១៩ និងប្រជាជនជួបការលំបាកផ្សេងៗ ។
អំណោយដែលលោកស្រី ទ្រី ដាណា ប្រគល់ជូនរដ្ឋបាលខេត្តសៀមរាប រួមមាន ៖ អង្ករ ៥ តោន, មី ៥០ កេសធំ ស្មើនឹង ៣០០ កេសតូច, ត្រីខ ៣០ កេស ស្មើនឹង ៣០០ យួរ និងទឹកពិសារបរិសុទ្ធចំនួន ១០០ កេស ។ ការផ្ដល់ជំនួយរបស់លោកស្រី ទ្រី ដាណា គឺចំពេលដែលប្រជាជនកំពុងត្រូវការ ខណៈពេលដែលខេត្តសៀមរាប ទើបរួចផុតពីការបិទខ្ទប់ ដើម្បីទប់ស្កាត់ការរាលដាលនៃជំងឺកូវីដ ១៩ ។
ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានបង្ហាញអារម្មណ៍រីករាយចំពោះសកម្មភាពរបស់លោកស្រី ទ្រី ដាណា ដោយចាត់ថា ជាកាយវិការយកចិត្តទុកដាក់ចូលរួមជាមួយរាជរដ្ឋាភិបាល និងរដ្ឋបាលខេត្តសៀមរាប ដើម្បីប្រយុទ្ធប្រឆាំងជាមួយជំងឺកូវីដ ១៩ ។ ឯកឧត្តមអភិបាលខេត្តក៏បានក្រើនរំឭកដល់ប្រជាពលរដ្ឋឱ្យចេះសម្របខ្លួនរស់នៅតាមគន្លងថ្មី និងអនុវត្ត ៣កាពារ ៣កុំ ។
នៅលើទំព័រ Facebook ផ្ទាល់របស់អភិបាលខេត្តបានបង្ហោះសារថា ៖ សូមថ្លែងអំណរគុណចំពោះលោកស្រី ទ្រី ដាណា ដែលបាននាំយកអំណោយប្រគល់ជូនរដ្ឋបាលខេត្តសៀមរាប ដែលនេះជាកាយវិការមួយបង្ហាញពីការគាំទ្រ និងយកចិត្តទុកដាក់ ក្នុងការចូលរួមចំណែកជាមួយរាជរដ្ឋាភិបាល និងរដ្ឋបាលខេត្តសៀមរាប ក្នុងអំឡុងពេលប្រយុទ្ធប្រឆាំង ទប់ស្កាត់ការឆ្លងរីករាលដាលដោយជំងឺកូវីដ-១៩ ៕ ដោយសហការ
ចែករំលែកព័តមាននេះ