អង្គការសុវណ្ណកុមារ ចុះហត្ថលេខាលើអនុស្សារណៈនៃការយោគយល់គ្នាជាមួយក្រសួងការបរទេស
រាជធានីភ្នំពេញ ៖ ថ្ងៃទី ២០ ខែកញ្ញា ឆ្នាំ ២០២១ អង្គការសុវណ្ណកុមារ អិលអិលស៊ី មានសេចក្ដីសោមន្សរីករាយក្នុងការជម្រាបជូនសាធារណជនថា…
រាជធានីភ្នំពេញ ៖ ថ្ងៃទី ២០ ខែកញ្ញា ឆ្នាំ ២០២១ អង្គការសុវណ្ណកុមារ អិលអិលស៊ី មានសេចក្ដីសោមន្សរីករាយក្នុងការជម្រាបជូនសាធារណជនថា អង្គការបានចុះហត្ថលេខាលើអនុស្សារណៈនៃការយោគយល់គ្នាថ្មីមួយដែលមានសុពលភាពរយៈពេល ០៣ ឆ្នាំ ជាមួយនឹងក្រសួងការបរទេស និងសហប្រតិបត្តិការអន្ដរជាតិ ។ អង្គការសូមថ្លែងអំណរគុណដល់ក្រសួងចំពោះសកម្មភាពវិជ្ជមាននេះ ។
អនុស្សារណៈនៃការយោគយល់គ្នានេះ បានបង្ហាញពីការទទួលស្គាល់ជាផ្លូវការនូវការងាររបស់អង្គការ ដែលទទួលបានការឧបត្ថម្ភដោយគ្រួសារ Johnson ដែលជាគ្រួសារស្ថាបនិកនៃក្រុមហ៊ុន Johnson & Johnson ។ ថ្មីៗនេះ រដ្ឋាភិបាលសហរដ្ឋអាមេរិកបានបរិច្ចាគវ៉ាក់សាំង Johnson & Johnson ប្រហែល ០១ លានដូសដល់ព្រះរាជាណាចក្រកម្ពុជា ដើម្បីជួយប្រយុទ្ធប្រឆាំងនឹងជំងឺកូវីដ-១៩ ។
យើងខ្ញុំសូមថ្លែងអំណរគុណដល់ ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ឯកឧត្ដម លុយ ដាវីត រដ្ឋលេខាធិការ និងឯកឧត្ដម កៅ គឹមហួន ព្រមទាំងមន្ដ្រីរាជរដ្ឋាភិបាលកម្ពុជាជាច្រើនរូបទៀត ដែលបានគាំទ្រដល់ការដាក់ពាក្យស្នើសុំអនុស្សារណៈនៃការយោគយល់គ្នាសារជាថ្មីរបស់អង្គការ ។ យើងខ្ញុំក៏សូមអរគុណដល់ថ្នាក់ដឹកនាំថ្មីរបស់អង្គការ ដែលកំពុងផ្ដល់ការថែទាំដល់ក្មេងជំទង់កំព្រា និងក្មេងជំទង់ដែលត្រូវបានគេបោះបង់ចោល នៅក្នុងអង្គការសុវណ្ណកុមារ អិលអិលស៊ី ខណៈពេលដែលពួកគេត្រៀមខ្លួនក្លាយជាមនុស្សពេញវ័យ ។
ដើម្បីអបអរសាទរអនុស្សារណៈនៃការយោគយល់គ្នាថ្មីនេះ យើងខ្ញុំសូមធ្វើការប្រកាសអំពីការចាប់ផ្តើមនៃកម្មវិធីអាហារូបករណ៍ Elizabeth R. Johnson ។ ជាមួយនឹងអាហារូបករណ៍ពិសេសនេះ គ្រួសារ Jonhson ធានាថា ក្រុមសិស្សវ័យក្មេងដែលមានសមត្ថភាពរបស់អង្គការសុវណ្ណកុមារ អិលអិលស៊ី នឹងទទួលបានថវិកាសម្រាប់ថ្នាក់ មហាវិទ្យាល័យ និងការអប់រំវិជ្ជាជីវៈ ។ និស្សិតអាហារូបករណ៍ក្នុងក្រុមដំបូងមានចំនួន ០៤ នាក់ ដែលកំពុងសិក្សាជំនាញផ្សេងៗគ្នា ។
គ្រួសារ Jonhson នៅតែបន្តប្តេជ្ញាចិត្តចំពោះកម្ពុជា ។ ចាប់តាំងពីឆ្នាំ ២០០៣ មក គ្រួសារ Jonhson បានចិញ្ចឹមបីបាច់ និងថែទាំក្រុមកុមារកំព្រា និងកុមារដែលត្រូវបានគេបោះបង់ចោល ។ ខណៈពេលដែលយើងខ្ញុំបោះជំហានបន្ដទៅមុខនេះ យើងខ្ញុំស្នើសុំការគាំទ្រពីសាធារណជនដើម្បីធានាថា កុមាររបស់អង្គការសុវណ្ណកុមារ អិលអិលស៊ី នឹងទទួលបានយុត្ដិធម៌នៅក្នុងតុលាការនៃព្រះរាជាណាចក្រកម្ពុជា ។ អង្គការបានដាក់ពាក្យបណ្ដឹងព្រហ្មទណ្ឌចំនួន ០៤ ប្រឆាំងនឹងអតីតនាយកប្រតិបត្ដិរបស់អង្គការ និងបក្ខពួករបស់លោក ដែលត្រូវបានចៅក្រមស៊ើបសួររកឃើញថា មានជាប់ពិរុទ្ធក្នុងបទរំលោ.ភបំពានឃោរឃៅលើអនីតិជន និងការក្លែងបន្លំជាប្រព័ន្ធ ។
អំពីអង្គការសុវណ្ណកុមារ អិលអិលស៊ី
អង្គការសុវណ្ណកុមារ អិលអិលស៊ី ត្រូវបានបង្កើតឡើងក្នុងឆ្នាំ ២០០៣ ដើម្បីមើលថែទាំកុមារកំព្រា និងកុមារដែលត្រូវបានគេបោះបង់ចោលនៅកម្ពុជា ។ បេសកកម្មរបស់អង្គការសុវណ្ណកុមារ អិលអិលស៊ី គឺបង្កើតបរិស្ថានមួយដែលផ្តល់នូវកន្លែងស្នាក់នៅដែលមានសុវត្ថិភាព និងចិញ្ចឹមបីបាច់ថែរក្សាកុមារកំព្រា និងកុមារដែលត្រូវបានគេបោះបង់ចោល ធ្វើយ៉ាងណាដើម្បីអាចផ្តល់ឱ្យកុមារអភិវឌ្ឍបានទាំងរាងកាយ សតិបញ្ញា អារម្មណ៍ និងស្មារតីប្រកប ដោយសក្តានុពលពេញលេញរបស់ពួកគេ ។
សម្រាប់ការសាកសួរព័ត៌មានបន្ថែមសូមទាក់ទងមកកាន់អង្គការសុវណ្ណកុមារ អិលអិលស៊ី តាមរយៈអ៉ីមែល ៖ Sovannkomarmedia@gmail.com ៕ ដោយសហការ
ចែករំលែកព័តមាននេះ