រាជធានីភ្នំពេញ ៖ បច្ចុប្បន្ននេះប្រជាពលរដ្ឋបានយល់ដឹងអំពីអត្ថប្រយោជន៍ និងភាពងាយស្រួលនៃការដាក់ប្រាក់បញ្ញើនៅក្នុងធនាគារ ដែលពីមុនមកពួកគាត់ច្រើនតែរក្សាទុកដាក់ប្រាក់តែនៅក្នុងផ្ទះប៉ុណ្ណោះ ។ ការដាក់ប្រាក់បញ្ញើនៅក្នុងធនាគារក៏កាន់តែមានភាពងាយស្រួលជាងមុនច្រើនណាស់ ហើយធនាគារថែមទាំងមិនតម្រូវឱ្យអតិថិជនដាក់ប្រាក់តម្កល់ថែមទៀតផង ។
ទាំងអស់នេះហើយដែលបានធ្វើឱ្យបងប្អូនប្រជាពលរដ្ឋកម្ពុជាកាន់តែច្រើនឡើងយល់ច្បាស់អំពីអត្ថប្រយោជន៍នៃការទុកដាក់ប្រាក់កាសនៅតាមធនាគារ ។ បច្ចុប្បន្ននេះ ធនាគារ អេស៊ីលីដា ភីអិលស៊ី បានផ្តល់ឱ្យអតិថិជនរបស់ខ្លួននូវគណនីបញ្ញើសំចៃ (Servings Account) ដោយមិនចាំបាច់ដាក់ប្រាក់តម្កល់ដូចពីមុនទៀតឡើយ ហើយថែមទាំងអាចដកប្រាក់តាមវិធីផ្សេងៗបានយ៉ាងងាយស្រួលទៀតផង ។
លោកស្រី សុខ សោភា នាយិកាប្រតិបត្តិទីផ្សារ ធនាគារ អេស៊ីលីដា ភីអិលស៊ី បានមានប្រសាសន៍ឱ្យដឹងថា បញ្ញើសំចៃ (Servings Account) គឺអតិថិជនសន្សំប្រាក់បង្គរទុក ហើយគាត់អាចដកប្រាក់យកទៅប្រើប្រាស់តាមរយ:ម៉ាស៊ីន អេធីអឹម (ATM) ដកតាមបញ្ជរ ឬតាមរយៈ Mobile App គ្រប់ពេលវេលា ហើយអ្វីដែលពិសេសនោះ ការបើកគណនីបញ្ញើសំចៃ (Servings Account) នេះមិនតម្រូវអោយមានប្រាក់តម្កល់ដំបូងឡើយ ហើយក៏មិនតម្រូវអោយមានសមតុល្យអប្បបរមាដូចពីមុនទៀតដែរ ។
«មានអ្នកឆ្ងល់ថា ពីមុនមកហេតុអ្វីចាំបាច់មានប្រាក់តម្កល់ ?» សូមបញ្ជាក់ថា ប្រាក់តម្កល់នេះមិនមានន័យថា ធនាគារយកប្រាក់ដែលអតិថិជនតម្កល់នោះទេ (ឧទាហរណ៍ ៖ ១ម៉ឺនរៀលសម្រាប់គណនីលុយខ្មែរ និង ១០ដុល្លារសម្រាប់គណនីលុយដុល្លារ) ប្រាក់តម្កល់នេះ គឺជាលុយរបស់អតិថិជនដែលគាត់អាចប្រើវិញនៅពេលណាក៏បានដែរ ។ កាន់តែងាយស្រួលដល់អតិថិជនថែមទៀតនោះ ធនាគារលែងតម្រូវឱ្យមានប្រាក់តម្កល់ដំបូងដូចមុនទៀតហើយ ហើយក៏មិនតម្រូវអោយមានសមតុលអប្បបរមាទៀតដែរ ដូច្នេះអតិថិជនអាចប្រើប្រាស់ប្រាក់របស់ខ្លួនរហូតគណនីស្មើសូន្យក៏បានដែរ ៕
ចែករំលែកព័តមាននេះ