រាជធានីភ្នំពេញ ៖ ក្រុមហ៊ុន ស៊ីម៉ងត៍ ខេ ស៊ីមេន បានជួបជុំជាមួយតំណាងអ្នកចែកចាយ និងក្រុមហ៊ុនអភិវឌ្ឍន៍សំណង់ដែលជាដៃគូសហការរបស់ខ្លួនមកពីទូទាំងប្រទេសកម្ពុជាដើម្បីធ្វើការបង្ហាញនូវទម្រង់អភិវឌ្ឍន៍ថ្មីនៃផលិតផលម៉ាក ខេ ស៊ីមេន…
រាជធានីភ្នំពេញ ៖ ក្រុមហ៊ុន ស៊ីម៉ងត៍ ខេ ស៊ីមេន បានជួបជុំជាមួយតំណាងអ្នកចែកចាយ និងក្រុមហ៊ុនអភិវឌ្ឍន៍សំណង់ដែលជាដៃគូសហការរបស់ខ្លួនមកពីទូទាំងប្រទេសកម្ពុជាដើម្បីធ្វើការបង្ហាញនូវទម្រង់អភិវឌ្ឍន៍ថ្មីនៃផលិតផលម៉ាក ខេ ស៊ីមេន របស់ខ្លួនជា មួយនឹងការប្ដេជ្ញាចិត្តបន្តលើកកម្ពស់ការរស់នៅកាន់តែប្រសើរឡើងរបស់ប្រជាជនកម្ពុជា។ ពិធីជួបជុំនេះបានធ្វើឡើងកាលពីល្ងាចថ្ងៃទី០៥ ខែកុម្ភៈ ឆ្នាំ២០២១ នៅសណ្ឋាគារ ហ្គោលឌិន ស៊ីធី រាជធានីភ្នំពេញ ។
នៅក្នុងឱកាសជួបជុំនេះ «ថ្មី» បីយ៉ាងត្រូវបានបង្ហាញជូន ទី ១ គឺការរចនាសំបកបាវថ្មីសម្រាប់ស៊ីម៉ងត៍ ខេ ស៊ីមេន ទី ២ គឺរូបមន្តថ្មីសម្រាប់ស៊ីម៉ងត៍ ខេ ស៊ុបពែរ និងទី ៣ គឺផលិតផលថ្មី ខេ ផោវើរ ផ្លាស្ទ័ររីង ។
លោក Ratchayut Kasemchaisiri នាយកគ្រប់គ្រង អេសស៊ីជី ប្រចាំកម្ពុជា បានថ្លែងទៅកាន់តំណាងអ្នកចែកចាយ និងដៃគូថា ទោះបីជាឆ្នាំ ២០២០ កន្លងមកវាជាពេលវេលាលំបាកបំផុតចំពោះក្រុមហ៊ុនអាជីវកម្មទាំងអស់ក្ដី តែយើងបានបង្ហាញឲ្យឃើញពីសាមគ្គីភាព និងបានឆ្លងកាត់វិបត្តិនេះរួមជាមួយគ្នាបានមួយឆ្នាំរួចហើយ ។ លោក Ratchayut មានប្រសាសន៍ថា យើងប៉ាន់ប្រមាណថា ឆ្នាំនេះក៏មិនមែនងាយស្រួលដែរសម្រាប់អាជីវកម្មគ្រប់វិស័យ ប៉ុន្តែនៅក្រុមហ៊ុន អេសស៊ីជី និង ខេ ស៊ីមេន យើងតែងតែខំប្រឹងប្រែងជំរុញខ្លួនឯងដើម្បីជម្នះការលំបាក និងធ្វើឲ្យអាជីវកម្មយើងរីកលូតលាស់ជាបន្ត ។
លោកបានបន្ថែមថា នៅឆ្នាំ ២០២១ នេះ យើងគ្រោងចាប់ផ្ដើមទសវត្សរ៍ថ្មីជាមួយនឹងការអភិវឌ្ឍទម្រង់ថ្មីសម្រាប់ផលិតផលស៊ីម៉ងត៍ ខេ ស៊ីមេន ។ ការអភិវឌ្ឍថ្មីៗនេះគឺផ្ដើមចេញពីមហិច្ឆតាដ៏រឹងមាំរបស់យើងដើម្បីរក្សាភាពឈានមុខគេរបស់យើងនៅក្នុងចំណែកទីផ្សារ និងភាពល្អប្រណីតលើសគេផ្នែកម៉ាកយីហោ ។
យោងតាមលោក Ratchayut ស៊ីម៉ងត៍ ខេ ស៊ីមេន នឹងមានសំបកបាវថ្មី ហើយរចនាបថនៃសំបកបាវថ្មីនេះគឺកើតចេញពីឆន្ទៈមុះមុតរបស់យើងក្នុងការបោះជំហានឲ្យលឿនឆ្ពោះទៅរកអនាគត ដោយប្រើកេរដំណែល និងបទពិសោធន៍របស់យើងក្នុងនាមជាម៉ាកយីហោខ្មែរដំបូងគេបំផុតនៅក្នុងទីផ្សារកម្ពុជា ។
ស៊ីម៉ងត៍ ខេ ស៊ុបពែរ មានរូបមន្តថ្មី ។ វាត្រូវបានកែលម្អឲ្យក្លាយជាស៊ីម៉ងត៍ដែលអាចប្រើបានសម្រាប់ការងារចម្រុះ ។ អ្នកប្រើប្រាស់នឹងវាយតម្លៃខ្ពស់ចំពោះគុណតម្លៃរបស់ ខេ ស៊ុបពែរ ជាស៊ីម៉ងត៍មួយប្រភេទសម្រាប់ការងារចម្រុះគ្រប់មុខ គឺការចាក់សាប និងគ្រឿងបង្គុំស្រាលៗ ការរៀបឥដ្ឋ និងការងារបូក ។
រីឯផលិតផលថ្មីគឺ ស៊ីម៉ងត៍ ខេ ផោវើរ ផ្លាស្ទ័ររីង វិញ ត្រូវគេចាត់ទុកថាជាស៊ីម៉ងត៍បូកដែលល្អបំផុត ដែលធ្វើឲ្យជញ្ជាំងមានភាពរលោងស្អាតបំផុត និងគ្មានស្នាមប្រេះ ។
ជាមួយនឹងការអភិវឌ្ឍថ្មីទាំងនេះ លោក Ratchayut សង្ឃឹមថា អត្តសញ្ញាណថ្មី និងផលិតផលថ្មីទាំងនេះនឹងបំពេញសេចក្ដីត្រូវការរបស់អតិថិជនកាន់តែល្អបន្ថែមទៀត និងជួយឲ្យអ្នកចែកចាយទាំងអស់សម្រេចបានបរិមាណលក់កើនឡើង និងមានភាពងាយស្រួលក្នុងការលក់ផលិតផលទាំងនេះទៅឲ្យអតិថិជនរបស់ខ្លួន ។
លោក Ratchayut បានបន្ថែមថា គោលដៅធំបំផុតគឺជួយជំរុញឲ្យមាននវានុវត្តន៍ និងកំណើនប្រកបដោយចីរភាពដល់វិស័យសំណង់ និងការរស់នៅរបស់ប្រទេសកម្ពុជាដែលនឹងនាំមកនូវការរស់នៅប្រកបដោយគុណភាពកាន់តែប្រសើរឡើងចំពោះម្ចាស់លំនៅដ្ឋានគ្រប់រូបនៅកម្ពុជា ៕ ដោយសហការ
ចែករំលែកព័តមាននេះ