រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានស្នើដល់ម្ចាស់ស្ថានីយវិទ្យុឯកជនទាំងអស់ ចាក់ផ្សាយភ្លេងគោរពទង់ជាតិនៃព្រះរាជាណាចក្រកម្ពុជាឲ្យបានព្រមៗគ្នានៅក្នុងពេលតែមួយ និងបទភ្លេងតែមួយ ដោយត្រូវយកគំរូមើលការផ្សាយបន្តផ្ទាល់ពីវិទ្យុជាតិកម្ពុជាFM៩៦MHz ជារៀងរាល់ថ្ងៃ ពេលព្រឹកនៅវេលាម៉ោង៧ៈ០០នាទី និងពេលល្ងាចវេលាម៉ោង១៧ៈ០០នាទី ។
យោងតាមលិខិតរបស់ក្រសួងព័ត៌មាន ដែលចុះហត្ថលេខាដោយលោករដ្ឋមន្ត្រី ខៀវ កាញារីទ្ធ ចេញផ្សាយនៅថ្ងៃទី២៦ ខែធ្នូ ឆ្នាំ២០១៩ បានឲ្យដឹងថា ក្រសួងបានសង្កេតឃើញថា ស្ថានីយវិទ្យុ ទូរទស្សន៍នីមួយៗ បានចាក់ផ្សាយបទភ្លេងគោរពទង់ជាតិដោយឡែកៗពីគ្នា និងនៅពេលវេលាខុសៗគ្នា ។ ស្ថានីយវិទ្យុ ទូរទស្សន៍ខ្លះពេលព្រឹកចាក់ផ្សាយនៅវេលាម៉ោង៧:០០នាទី ហើយនៅពេលល្ងាចចាក់ផ្សាយនៅវេលាម៉ោង១៧:០០នាទី ប៉ុន្តែមានស្ថានីយវិទ្យុ ទូរទស្សន៍ខ្លះទៀត បានចាក់ផ្សាយបទភ្លេងគោរពទង់ជាតិ នៅពេលវេលាខុសៗគ្នា ។
លិខិតរបស់ក្រសួងព័ត៌មានបានបញ្ជាក់ ដូច្នេះ ដើម្បីឱ្យមានការឯកភាពគ្នាក្នុងការចាក់ផ្សាយបទ ភ្លេងគោរពទង់ជាតិនៃព្រះរាជាណាចក្រកម្ពុជា បានព្រមៗគ្នានៅក្នុងពេលវេលាតែមួយ និងបទភ្លេងតែមួយ ក្រសួងសូមឲ្យម្ចាស់ស្ថានីយវិទ្យុឯកជនទាំងអស់ ត្រូវធ្វើការផ្សាយបន្តផ្ទាល់ពីវិទ្យុជាតិកម្ពុជាFM៩៦MHz និងស្ថានីយទូរទស្សន៍ឯកជនទាំងអស់ ត្រូវធ្វើការផ្សាយបន្តផ្ទាល់ពីស្ថានីយទូរទស្សន៍ជាតិកម្ពុជា ឱ្យបានព្រមៗ គ្នាជារៀងរាល់ថ្ងៃ ពេលព្រឹកនៅវេលាម៉ោង៧:០០ នាទីគត់ និងពេលល្ងាចវេលាម៉ោង១៧:០០នាទីគត់ ។
សូមបញ្ជាក់ថា ជារៀងរាល់ថ្ងៃ ស្ថានីយវិទ្យុ ទូរទស្សន៍ទាំងអស់ បានចាក់ផ្សាយបទភ្លេងគោរពទង់ជាតិនៃព្រះរាជាណាចក្រកម្ពុជា នៅតាមស្ថានីយវិទ្យុ ទូរទស្សន៍រៀងៗខ្លួន ពេលព្រឹកនៅវេលាម៉ោង៧:០០នាទី និងពេលល្ងាចនៅវេលាម៉ោង១៧:០០នាទី ដើម្បីឱ្យមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋនៅទូទាំងប្រទេសគោរពទង់ជាតិ និងជាការដាស់តឿនបំផុសស្មារតីរបស់ប្រជាពលរដ្ឋ ឱ្យមានសាមគ្គីភាព ឯកភាពជាតិជាធ្លុងមួយរឹងមាំ ដូចសម័យមហានគរតាមបាវចនា ជាតិ សាសនា ព្រះមហាក្សត្រ និងថែរក្សាបានគង់វង្សនូវអត្តសញ្ញាណជាតិគួរជាទីមោទន: ៕
ចែករំលែកព័តមាននេះ