ខេត្តកោះកុង ៖ បើគ្រាន់តែយើងធ្វើដំណើរទៅដល់មុខផ្សារស្រែអំបិលហើយជួបអ្នករត់ម៉ូតូឌុប ឬក្មេងតូចៗ រួចសួរពួកគេថា តើមានផ្ទះណាបើកលេងល្បែងស៊ីសងធំជាងគេនៅក្នុងស្រុកស្រែអំបិល ខេត្តកោះកុងនេះពួកគេទាំងនោះឆ្លើយយ៉ាងលឿន ហើយច្បាស់ទៀតថា មានផ្ទះមន្ត្រីបរិស្ថានស្រុកមួយបើកបនល្បែងឡើងដុះស្លែរាប់ខែរាប់ឆ្នាំមកហើយគ្មានអ្នកណាហ៊ានបង្ក្រាបឡើយ។
ប្រភពរាយការណ៍ពីស្រុកស្រែអំបិលបញ្ជាក់ច្បាស់ថា ផ្ទះបើកបនល្បែងធំជាងគេនៅស្រុកស្រែអំបិលនោះមានលើកស្លាកមីមីបាយមាន់ គឺជាផ្ទះប្រជានការិយាល័យបរិស្ថានស្រុកស្រែអំបិលឈ្មោះតិច ក្នុងផ្ទះនេះមានល្បែងច្រើនប្រភេទដូចជាបៀ ដូមីណូ យូគី ដែលចាក់ក្នុងមួយដៃៗស៊ីសងរាប់ពាន់ដុល្លារហើយនៅទល់មុខផ្ទះមន្ត្រីបរិស្ថានរូបនេះក៏មានផ្ទះមេឆ្នោតធំជាងគេមួយទៀតដែរប្រចាំស្រុកស្រែអំបិល។
ផ្ទះទាំង២នេះរកស៊ីបើកបនល្បែងកាក់កបខ្លាំងណាស់ ព្រោះគ្មានសមត្ថកិច្ចណាហ៊ានបង្ក្រាបទេ មិនតែប៉ុណ្ណោះផ្ទះទាំង២បានជួលប្រធានប៉ុស្តិ៍រដ្ឋបាលម្នាក់ទៀតឱ្យចាំយាមផ្លូវ។ មន្ត្រីរាជការជាច្រើនបាននិយាយថា អ្នកញៀនល្បែងទាំងឡាយដែលចូលទៅលេងល្បែងនៅផ្ទះខាងលើនេះភាគច្រើនជិះម៉ូតូ ចំណែកម្ចាស់ផ្ទះមានរថយន្តហាយឡិនឌ័របិទគូទពីក្រៅ ដោយគ្មានញញើតខ្លាចសមត្ថកិច្ចក្នុងស្រុកនោះឡើយ ឬក៏គេបង់ខែអស់ក៏មិនដឹងទើបសមត្ថកិច្ចរាយការណ៍ប្រាប់ថ្នាក់ខេត្តថា ភូមិ-ឃុំមានសុវត្ថិភាព៕
ចែករំលែកព័តមាននេះ