ខេត្តកណ្តាល ៖ ដីបឹងធំ បឹងតូច សាធារណៈរបស់រដ្ឋរាប់ពាន់ហិកតា នៅក្នុងស្រុកកៀនស្វាយ ខេត្តកណ្តាល ត្រូវអ្នកមានលុយ មានអំណាច បោះបង្គោលថ្មរំលោភបំពានវាតយកធ្វើជាកម្មសិទ្ធិឯកជនយ៉ាងអនាធិបតេយ្យ។…
ខេត្តកណ្តាល ៖ ដីបឹងធំ បឹងតូច សាធារណៈរបស់រដ្ឋរាប់ពាន់ហិកតា នៅក្នុងស្រុកកៀនស្វាយ ខេត្តកណ្តាល ត្រូវអ្នកមានលុយ មានអំណាច បោះបង្គោលថ្មរំលោភបំពានវាតយកធ្វើជាកម្មសិទ្ធិឯកជនយ៉ាងអនាធិបតេយ្យ។
ប្រភព័ព៌តមានបានឱ្យដឹងថា បឹងធំ បឹងតូចនេះ គឺជាបឹងធម្មជាតិកើតមានតាំងពីដូនតាមកម៉្លេះ ហើយបឹងនេះមានសារសំខាន់សម្រាប់ប្រជាជននៃឃុំចំនួន៤ រស់នៅជុំវិញមាត់បឹងក្នុងស្រុកកៀនស្វាយ គឺឃុំឈើទាល ឃុំភូមិធំ ឃុំគគីរ និងឃុំដីឥដ្ឋ ដែលជាតម្រូវការចាំបាច់យកទឹកបឹងនេះប្រើប្រាស់ដូចជា ៖ មុជ ដាំស្ល និងស្រោចស្រពផលដំណាំផ្សេងៗ ជាពិសេសគឺជាបឹងធម្មជាតិដែលបងប្អូនប្រជាជនតែងតែប្រកបមុខរបររកនេសាទត្រី ដកព្រលឹត ដកក្រអៅឈួក រកខ្យង រកខ្ចៅជាលក្ខណៈគ្រួសារ គ្រាន់បានចិញ្ចឹមជីវិតតាំងពីដើមមកផងដែរ។
មិនតែប៉ុណ្ណោះបឹង នេះគឺជាអាងស្តុបទឹកដ៏ធំ ហើយក៏ជាប្រព័ន្ធរំដោះទឹកជំនន់ នារដូវទឹកដំឡើងទៅតាមបឹងនានា នៃស្រុកស្អាង ស្រុកកោះធំ ស្រុកលើកដែក ហូរធ្លាក់ចេញទៅវៀតណាមផងដែរ។
ស្រាប់តែឥឡូវ បែរជាអ្នកមានលុយ មានអំណាច មកបោះបង្គោលថ្មរំលោភបំពានវាតយកដីបឹងសាធារណៈរបស់រដ្ឋធ្វើជាកម្មសិទ្ធិឯកជនយ៉ាងគឃ្លើន ដោយខ្លះកំពុងតែប្រើប្រាស់គ្រឿងចក្រជីកកាយចាក់ដីលុបបណ្តើរៗហើយ តែដូចជាពុំឃើញមានអាជ្ញាធរ ឬមន្ត្រីជំនាញស្ថាប័នណាមួយចុះមកទប់ស្កាត់បង្ក្រាបឡើយ ធ្វើឱ្យមហាជនជាច្រើនមានការព្រួយបារម្ភជាខ្លាំង ខ្លាចទៅថ្ងៃក្រោយគេចាក់ដីលុបបឹងនេះអស់ ប្រជាជនប្រាកដជាជួបការលំបាក គ្មានទឹកប្រើប្រាស់ជាក់ជាមិនខានឡើយ ណាមួយអាចប្រឈមនឹងការលិចលង់ផ្ទះសម្បែង និងផលដំណាំ នៅពេលរដូវទឹកឡើង។
ប្រភពបន្តទៀតថា អ្នកដែលមកបោះបង្គោលថ្មព័ទ្ធយកដីបឹងខាងលើ គឹភាគច្រើនសុទ្ធតែជាអ្នកមានឋានៈ ឧកញ៉ា ឯកឧត្តម អ្នកមានលុយ មានអំណាច មកពីភ្នំពេញ។ បើប្រជាពលរដ្ឋធម្មតានោះ គឺមិនអាចទៅបោះបង្គោលព័ទ្ធយកដីសាធារណៈរបស់រដ្ឋបាននោះទេ។បញ្ហានេះ ធ្វើឱ្យមហាជ ដាក់ការសង្ស័យថា បើគ្មានការឃុបឃិតត្រូវរ៉ូវគ្នាជាប្រព័ន្ធនោះទេ ក៏មិនអាចមកយកដីរដ្ឋឆៅៗបានដែរ។
ពាក់ព័ន្ធការរំលោភយកដីបឹងធំ-បឹងតូចសាធារណៈរបស់រដ្ឋនេះ ភ្នាក់ងារយើងបានព្យាយាមទូរស័ព្ទសុំការបំភ្លឺពី លោក អ៊ូ ឈាង អភិបាលស្រុកកៀនស្វាយដែរ តែលោកប្រាប់ថាជាប់រវល់ប្រជុំបក្ស។
ចំណែក លោក កេត សុផល ប្រធាន់ការិយាល័យភូមិបាល ស្រុកកៀនស្វាយ លោកក៏ទទួលស្គាល់ថា ដីបឹងធំ-បឹងតូច គឺពិតជាបឹងអាងស្តុបទឹក និងជាប្រព័ន្ធរំដោះទឹកសាធារណៈរបស់រដ្ឋប្រាកដមែន ហើយបុគ្គលដែលទៅបោះបង្គោលយកដីបឹងនោះ គឺគ្មានច្បាប់ទេ។ ឥឡូវលោកកំពុងឱ្យក្រុមការងារសិក្សាវាស់វែង និងធ្វើរបាយការណ៍ដាក់ជូន ឯកឧត្តមអភិបាលខេត្ត ដើម្បីចុះបញ្ជីរក្សាការពារដីរដ្ឋ៕ (កែសម្រួលដោយ ៖ បុប្ផា)
ចែករំលែកព័តមាននេះ